• Today Weather
• ગુજરાત સહિત દેશભરમાં ઠંડીનું મોજું ફરી વળ્યું
• દેશના અનેક રાજ્યોમાં ત્રણ દિવસ વરસાદની આગાહી
• હવામાન વિભાગે કહ્યું છે કે ઉત્તર ભારતમાં થોડી ઠંડી રહેશે
• દક્ષિણ ભારતના કેટલાક ભાગોમાં ભારે વરસાદની શક્યતા
• ફરી એકવાર દેશવાસીઓને સહન કરવો પડશે બેવડી ઋતુનો માર

Today Weather : ગુજરાત સહિત સમગ્ર દેશમાં હાલ બેવડી ઋતુનો માહોલ જોવા મળી રહ્યો છે. એક તરફ ઉત્તર અને પશ્ચિમ ભારતના વિસ્તારોમાં તીવ્ર ઠંડીનું મોજું ફરી વળ્યું છે, તો બીજી તરફ દક્ષિણ ભારતમાં ભારે વરસાદ અને ગાજવીજ સાથે વરસાદની આગાહી કરવામાં આવી છે. ભારતીય હવામાન વિભાગ (IMD) અનુસાર, આગામી દિવસોમાં આ વિપરીત હવામાન દેશવાસીઓને સહન કરવું પડશે.

ગુજરાત અને રાજસ્થાનમાં કડકડતી ઠંડી!

દેશના પશ્ચિમી અને મધ્ય ભાગોમાં હાલ કડકડતી ઠંડીનો પ્રકોપ જોવા મળી રહ્યો છે, જ્યાં લઘુતમ તાપમાન સતત ઘટી રહ્યું છે. ગુજરાતમાં કાતિલ ઠંડી યથાવત છે, જેમાં નલિયા 10.8 ડિગ્રી સેલ્સિયસ સાથે રાજ્યનું સૌથી ઠંડુ શહેર બન્યું છે અને લઘુતમ તાપમાન 10 ડિગ્રીની આસપાસ જળવાઈ રહ્યું છે. બીજી તરફ, રાજસ્થાનનું શેખાવતી ક્ષેત્ર પણ તીવ્ર ઠંડીની ચપેટમાં છે, જ્યાં ફતેહપુરમાં પારો 6.1 ડિગ્રી સેલ્સિયસ નોંધાયો છે, જે સામાન્ય કરતાં 3-4 ડિગ્રી સેલ્સિયસ ઓછો છે.

હવામાન વિભાગની આગાહી મુજબ, પશ્ચિમ મધ્યપ્રદેશમાં 21 અને 22 નવેમ્બરના રોજ શીત લહેર (Cold Wave) આવવાની સંભાવના છે, જ્યારે આગામી 6 દિવસમાં ઉત્તરપશ્ચિમ ભારતના મેદાની વિસ્તારોમાં તાપમાનમાં 2-3°Cનો વધુ ઘટાડો જોવા મળી શકે છે. જોકે, દક્ષિણ ગુજરાતમાં પૂર્વીય પવનોને કારણે તાપમાનમાં નજીવો વધારો થવાની શક્યતા છે.

ગુજરાતમાં લઘુતમ તાપમાનનો પારો ગગડ્યો

ગુજરાતમાં હાલ ઠંડીનું મોજું યથાવત છે અને લઘુતમ તાપમાનમાં ઘટાડો નોંધાયો છે, જેના કારણે રાજ્યભરમાં તીવ્ર ઠંડીનો અનુભવ થઈ રહ્યો છે. હવામાન વિભાગના આંકડા મુજબ, નલિયા 10.8 ડિગ્રી સેલ્સિયસ સાથે રાજ્યનું સૌથી ઠંડુ શહેર બન્યું છે. નલિયા ઉપરાંત અન્ય શહેરોમાં પણ ઠંડીનો પારો ગગડ્યો છે, જેમાં ભૂજ 14.5°C, કંડલા એરપોર્ટ 12.6°C, અમરેલી 12.6°C, રાજકોટ 12.6°C અને કેશોદ 13.1°C જેટલું નીચું તાપમાન નોંધાયું છે. રાજ્યના મુખ્ય શહેરોની વાત કરીએ તો અમદાવાદમાં 15.1°C, ગાંધીનગરમાં 13.5°C અને વડોદરામાં 14.0°C લઘુતમ તાપમાન નોંધાયું છે, જ્યારે દરિયાકાંઠાના વિસ્તારોમાં દ્વારકા 19.0°C અને ઓખા 22.4°C માં તાપમાન અન્ય વિસ્તારોની તુલનામાં પ્રમાણમાં ઊંચું રહ્યું છે.

દક્ષિણ ભારતમાં ભારે વરસાદનું એલર્ટ

એક તરફ ઉત્તર ભારત શીત લહેર અનુભવી રહ્યું છે, ત્યારે દક્ષિણ ભારતમાં આગામી દિવસોમાં હવામાન ભીનું રહેવાનું છે. ભારતીય હવામાન વિભાગની આગાહી મુજબ, 21 થી 26 નવેમ્બર દરમિયાન તમિલનાડુના અનેક વિસ્તારોમાં હળવાથી મધ્યમ વરસાદની સાથે અલગ-અલગ સ્થળોએ ભારે વરસાદ અને ગાજવીજ થવાની સંભાવના છે. આ ઉપરાંત, કેરળ અને માહેમાં પણ 21 થી 23 નવેમ્બર દરમિયાન વરસાદી માહોલ રહેશે, જ્યારે 26 નવેમ્બરે દરિયાકાંઠાના આંધ્રપ્રદેશ, યાનમ અને રાયલસીમામાં પણ વરસાદની શક્યતા છે.

તમિલનાડુ, કેરળ અને માહેના વિસ્તારોમાં 21 થી 24 નવેમ્બર દરમિયાન વાવાઝોડાની પણ ચેતવણી આપવામાં આવી છે. ખાસ કરીને આંદામાન અને નિકોબાર ટાપુઓ પર 21 અને 22 નવેમ્બરના રોજ ભારે વરસાદની સાથે 21 અને 23 નવેમ્બર દરમિયાન પવનની ગતિ 50-60 કિમી પ્રતિ કલાક સુધી પહોંચવાની ચેતવણી અપાઈ છે.

આ પણ વાંચો :   Gujarat: ઠંડીને લઇ હવામાન નિષ્ણાત અંબાલાલ પટેલની આગાહી સામે આવી