Gandhinagar News: કલોલમાં કપિરાજનો આતંક, 5 થી વધુ લોકોને ભર્યા બચકાં

GEB કચેરીમાં કપિરાજે મચાવ્યો આતંક

મળતી માહિતી મુજબ શહેરની GEB કચેરીમાં કપિરાજે અચાનક પ્રવેશ કરીને ભારે ઉત્પાત મચાવ્યો હતો. આ દરમિયાન કચેરીમાં કામ કરી રહેલા કર્મચારીઓ અને વીજબીલ ભરવા માટે આવેલા ગ્રાહકોને ટાર્ગેટ બનાવી હુમલો કરવામાં આવ્યો હતો. કપિરાજના અચાનક હુમલાને કારણે કચેરીમાં હાજર લોકો જીવ બચાવવા માટે આમ-તેમ દોડવા મજબૂર બન્યા હતા. આ ઘટનામાં કેટલાક લોકોને ગંભીર ઈજાઓ પહોંચતા તેમને સારવાર માટે હોસ્પિટલ ખસેડવા પડ્યા હતા.

અન્ય વિસ્તારોના લોકોને પણ ભર્યા બચકાં

માત્ર GEB કચેરી જ નહીં, પરંતુ કલોલના અન્ય વિસ્તારોમાં પણ આ કપિરાજે પોતાનો આતંક યથાવત રાખ્યો હતો. અહીં પણ કપિરાજે  ઘણા લોકોને બચકાં ભરી ઈજાગ્રસ્ત કર્યા હોવાનું સામે આવ્યું છે. એક જ દિવસમાં પાંચ વ્યક્તિઓ પર હુમલાની ઘટના બાદ સ્થાનિક રહેવાસીઓમાં ભારે રોષ અને ડર જોવા મળી રહ્યો છે.

વન વિભાગે કપિરાજને પકડવા માટે પાંજરું ગોઠવાયું

સ્થાનિકોની ફરિયાદને પગલે હવે વન વિભાગ હરકતમાં આવ્યું છે. કલોલના રહેણાંક વિસ્તારોમાં આતંક મચાવનાર આ કપિરાજને પકડવા માટે વન વિભાગની ટીમ દ્વારા તાત્કાલિક ધોરણે પાંજરું ગોઠવવામાં આવ્યું છે. હાલ વન વિભાગના કર્મચારીઓ કપિરાજ પર નજર રાખી રહ્યા છે, જેથી તેને વહેલી તકે પાંજરે પૂરીને સુરક્ષિત સ્થળે ખસેડી શકાય અને નાગરિકોને આ આતંકમાંથી મુક્તિ મળે.

આ પણ વાંચોઃ LIVE: Gujarat Latest News: જે થયું તેની યોગ્ય તપાસ કરાશે: સુરતમાં ડિમોલિશન મામલે ડેપ્યુટી મેયર સુધાકર ચૌધરીનું નિવેદન