Ahmedabad Census: વસ્તી ગણતરીનો પ્રથમ તબક્કો, હાઉસ લિસ્ટિંગ કામગીરી શરૂ
Ahmedabad Census: અમદાવાદ શહેરમાં વસ્તી ગણતરી (Census 2026) ના પ્રથમ તબક્કા અંતર્ગત આજે હાઉસ લિસ્ટિંગ અને હાઉસિંગ સેન્સસની કામગીરીનો સત્તાવાર રીતે પ્રારંભ થયો છે. અમદાવાદ મ્યુનિસિપલ કોર્પોરેશન (AMC) ના માર્ગદર્શન હેઠળ હાથ ધરવામાં આવેલી આ મેગા ડ્રાઈવમાં સમગ્ર શહેરને આવરી લેવામાં આવશે. શહેરમાં અંદાજે 10,700 બ્લોક તૈયાર કરવામાં આવ્યા છે, જ્યાં આ કામગીરી સઘન રીતે પૂર્ણ કરવામાં આવશે.
Ahmedabad: પાયાની સુવિધાઓની માહિતી નોંધવામાં આવશે
આ મહત્વપૂર્ણ કામગીરી માટે 13,000 થી વધુ ગણતરીદારો (Enumerators) અને સુપરવાઇઝરોની ખાસ ટીમ મેદાનમાં ઉતારવામાં આવી છે. આ ટીમો દ્વારા દરેક મકાનનું નંબરિંગ કરવામાં આવશે, સાથે જ વિસ્તારના નકશા નિર્માણ અને ઘરોની યાદી તૈયાર કરવામાં આવશે. આ પ્રક્રિયા દરમિયાન દરેક પરિવારના વડા અને સભ્યોની પ્રાથમિક વિગતો એકત્રિત કરવામાં આવશે. આ સાથે જ ઘરોમાં ઉપલબ્ધ પાણી, વીજળી અને શૌચાલય જેવી પાયાની સુવિધાઓ અંગેની માહિતી પણ નોંધવામાં આવશે.
ગણતરીદારોને સંપૂર્ણ સહકાર આપવા અપીલ
AMC દ્વારા શહેરના નાગરિકોને અપીલ કરવામાં આવી છે કે તેઓ આ કામગીરીમાં ગણતરીદારોને સંપૂર્ણ સહકાર આપે. નાગરિકોએ કામગીરીમાં આવતા અધિકારીઓના ઓળખપત્રની ચકાસણી કરવી અને તેમને સાચી માહિતી આપવી. આ સમગ્ર પ્રક્રિયા 'સેન્સસ એક્ટ 1948' (Census Act 1948) હેઠળ હાથ ધરવામાં આવી રહી છે, જેથી નાગરિકોની તમામ માહિતી સંપૂર્ણપણે ગુપ્ત રાખવામાં આવશે. આ વસ્તી ગણતરી શહેરના આયોજન અને ભવિષ્યની સુવિધાઓના નિર્ધારણ માટે પાયાની કામગીરી સાબિત થશે.