Bhavnagar: ગારીયાધારના નિવૃત્ત આર્મીમેનનું ભવ્ય સ્વાગત, રતનવાવના મનોજભાઈ પરમારનું ગામલોકોએ કર્યું સન્માન

રતનવાવ પ્રાથમિક શાળા દ્વારા સાંસ્કૃતિક કાર્યક્રમનું આયોજન

મનોજભાઈના આગમનને યાદગાર બનાવવા માટે ગામ સમિતિ તેમજ રતનવાવ પ્રાથમિક શાળા દ્વારા એક ભવ્ય અને પ્રેરણાદાયી સાંસ્કૃતિક કાર્યક્રમનું વિશેષ આયોજન કરવામાં આવ્યું હતું. આ કાર્યક્રમની શરુઆત દેશના રાષ્ટ્રધ્વજને વંદન કરીને અને રાષ્ટ્રગાનના ગાન સાથે કરવામાં આવી હતી, જેનાથી ઉપસ્થિત સૌ કોઈના હૃદયમાં દેશભક્તિની ભાવના ઉજાગર થઈ હતી. આ અવસરે રતનવાવ પ્રાથમિક શાળાના નાના-નાના વિદ્યાર્થીઓએ દેશભક્તિના પ્રેરણાદાયી ગીતો અને આકર્ષક સાંસ્કૃતિક કૃતિઓ રજૂ કરીને ઉપસ્થિત તમામ મહેમાનો તથા ગ્રામજનોના મન મોહી લીધા હતા. બાળકોની આ સુંદર પ્રસ્તુતિએ કાર્યક્રમમાં ચાર ચાંદ લગાવી દીધા હતા.

 Bhavnagar: 17 વર્ષની લાંબી અને નિષ્કલંક સેવાને બિરદાવી

આ ભવ્ય સન્માન સમારોહમાં ગામના અગ્રણીઓ, વડીલો, શિક્ષકો અને મોટી સંખ્યામાં ગ્રામજનો ઉપસ્થિત રહ્યા હતા. સૌએ એકસૂરે મનોજભાઈ પરમાર દ્વારા ભારતીય સેનામાં આપવામાં આવેલી 17 વર્ષની લાંબી અને નિષ્કલંક સેવાને બિરદાવી હતી. ગ્રામજનોએ સૈનિકને સલામ કરીને તેમની વતન વાપસીના આ શુભ અવસરે અપાર ગર્વ અને આનંદની લાગણી વ્યક્ત કરી હતી.

ઘનશ્યામભાઈ નાવડિયા દ્વારા સન્માન કરાયું

આ વિશેષ સન્માન સમારોહનું સૌથી મોટું આકર્ષણ રતનવાવના અગ્રણી ઘનશ્યામભાઈ નાવડિયા દ્વારા કરવામાં આવ્યું હતું. ઘનશ્યામભાઈ નાવડિયાએ દેશના આ વીર જવાનની સેના પ્રત્યેની નિષ્ઠા અને સમર્પણથી પ્રભાવિત થઈને તેમને ભેટ સ્વરૂપે એક કાર અર્પણ કરી હતી. આ ભેટ મળતાની સાથે જ સમગ્ર કાર્યક્રમમાં વિશેષ ગૌરવ અને ઉત્સાહનો માહોલ છવાઈ ગયો હતો. આ પ્રસંગે ગ્રામજનોએ ભારતીય સેનાના જવાનો અને તેમના પરિવારજનોના ત્યાગ પ્રત્યે પોતાની કૃતજ્ઞતા વ્યક્ત કરી હતી અને જણાવ્યું હતું કે સૈનિકો છે તો જ આપણે આપણા ઘરોમાં સુરક્ષિત છીએ. આ સમગ્ર આયોજને સમગ્ર ગારીયાધાર પંથકમાં દેશભક્તિની એક નવી મિસાલ કાયમ કરી છે.

આ પણ વાંચો: Gujarat Rain Forecast: ઓગસ્ટમાં બે ગ્રહણ બદલશે વાતાવરણ! અંબાલાલ પટેલે આપી વરસાદની તારીખો