Boriya village flood: તાપી-સુરત જિલ્લાની બોર્ડર પર આવેલા બોરિયા ગામ બેટમાં ફેરવાયું, ગામમાં પાણી ઘૂસી જતા જનજીવન પ્રભાવિત

ઘરોમાં પાણી ઘૂસી જતા લોકો પરેશાન

ગામના ત્રણ જેટલા ઘરોમાં પાણી ઘૂસી જવાથી ઘરવખરી અને પશુધનને ભારે નુકસાન થયું છે, સાથે જ ગામની આંગણવાડીમાં પણ પાણી ભરાઈ જતા બાળકો માટેનું શિક્ષણ અને આરોગ્યનું સ્થળ જોખમમાં મુકાયું છે. વરસાદી પાણીના નિકાલનો કોઈ કાયમી રસ્તો ન હોવાથી જ્યારે પણ વરસાદ પડે છે, ત્યારે ગ્રામજનોએ આવી દયનીય સ્થિતિનો સામનો કરવો પડે છે.

ધારાસભ્ય, કલેક્ટરને જૂઆતો કરવામાં આવી

સૌથી દુઃખદ બાબત એ છે કે, આ સમસ્યાનો ઉકેલ લાવવા માટે ગ્રામજનો દ્વારા સ્થાનિક ધારાસભ્ય અને જિલ્લા કલેક્ટરને અનેકવાર લેખિત તથા મૌખિક રજૂઆતો કરવામાં આવી છે. છતાં પણ તંત્ર દ્વારા કોઈ નક્કર કાર્યવાહી કરવામાં આવી નથી. માત્ર આશ્વાસનો મળતા હોવાથી ગ્રામજનોનો રોષ ચરમસીમા પર છે.

Boriya village flood: બોરિયા ગામના લોકોની તંત્ર પાસે માંગ

ગામના લોકોએ જણાવ્યું હતું કે, દર વર્ષે વરસાદની મોસમમાં તેમને ઘર છોડીને સુરક્ષિત સ્થળે આશરો લેવાની નોબત આવે છે. જો વહેલી તકે પાણીના નિકાલ માટે ડ્રેનેજ સિસ્ટમ અથવા કોતરની સફાઈ કરવામાં નહીં આવે, તો આગામી સમયમાં મોટી જાનહાનિ થવાની ભીતિ સેવાઈ રહી છે. તંત્ર દ્વારા માત્ર કાગળ પર જ આયોજન કરવામાં આવે છે કે ખરેખર કોઈ કામગીરી થશે, તે એક મોટો પ્રશ્ન છે. બોરિયા ગામના લોકો હવે સત્વરે કાયમી ઉકેલની માંગ કરી રહ્યા છે, જેથી તેઓ ભયમુક્ત જીવન જીવી શકે.

આ પણ વાંચો: Surendranagar: લીંબડીથી બોગસ ડોક્ટર ઝડપાયો, ક્લિનિકમાંથી અલગ અલગ એલોપેથી દવાઓ ઝડપાઈ