Chhotaudepur: અંધશ્રદ્ધાનો કરુણ અંત, તાંત્રિક વિધિના વહેમમાં પાડોશીએ કરી મહિલાની હત્યા

મેલી વિદ્યાનો વહેમ રાખી મહિલાની હત્યા

પ્રાપ્ત માહિતી મુજબ, આરોપી સુરેન્દ્રસિંહ પરમાર (ઉંમર વર્ષ 45) અને મૃતક મીનાબેન એક જ ફળિયામાં પાડોશી તરીકે રહેતા હતા. આરોપી સુરેન્દ્રસિંહ છેલ્લા ઘણા સમયથી મીનાબેન પર મેલી વિદ્યા કે તાંત્રિક વિધિ કરવાનો આશંકા અને વહેમ રાખતો હતો. આ વહેમ એટલી હદે વધી ગયો હતો કે તેણે મોડી રાત્રે મીનાબેનના ઘરમાં ઘૂસીને તેમના પર તીક્ષ્ણ હથિયાર વડે જીવલેણ હુમલો કર્યો હતો. ગંભીર ઈજાઓને કારણે મીનાબેનનું ઘટનાસ્થળે જ કમનસીબ મોત નીપજ્યું હતું.

Chhotaudepur: પોલીસની ત્વરિત કાર્યવાહી

હત્યાની જાણ થતા જ કદવાલ પોલીસની ટીમ ઘટનાસ્થળે દોડી આવી હતી. પોલીસે મૃતદેહનો કબ્જો મેળવીને તેને પોસ્ટમોર્ટમ માટે ખસેડ્યો હતો. પોલીસે ત્વરિત કાર્યવાહી કરીને આરોપી સુરેન્દ્રસિંહ પરમારને ઝડપી પાડ્યો છે. પોલીસની પ્રાથમિક પૂછપરછમાં આરોપીએ કબૂલાત કરી છે કે તેને મીનાબેન પર અંધશ્રદ્ધાને લીધે વહેમ હતો, જે આ હત્યાનું મુખ્ય કારણ બન્યું છે. હાલ પોલીસે આરોપીની ધરપકડ કરીને તેની સામે હત્યાનો ગુનો નોંધી વધુ તપાસ હાથ ધરી છે. આ ઘટનાએ ફરી એકવાર સમાજમાં પ્રવર્તતી અંધશ્રદ્ધા અને વહેમ જેવી કુપ્રથાઓ સામે ગંભીર સવાલ ઉભા કર્યા છે.

આ પણ વાંચો: Jamnagar: ધ્રોલ-લતીપર રોડ પર બે કાર વચ્ચે ભયાનક અકસ્માત, 3 લોકોના કરૂણ મોત