Basketball World Cup Qualifiers: અમદાવાદમાં 'FIBA બાસ્કેટબોલ વર્લ્ડ કપ ક્વોલિફાયર્સ'નો શાનદાર પ્રારંભ

5 જુલાઈએ લેબનોન સામે નિર્ણાયક મુકાબલો

આજે, 2 જુલાઈના રોજ ભારત પોતાના અભિયાનની શરૂઆત કતાર સામે કરી રહ્યું છે, જ્યારે 5 જુલાઈએ લેબનોન સામે નિર્ણાયક મુકાબલો ખેલાશે. નાયબ મુખ્યમંત્રી શ્રી હર્ષ સંઘવીએ આ આયોજનને આવકારતા જણાવ્યું હતું કે, ગણતરીના દિવસો પૂર્વે યોજાયેલ 'AVC મેન્સ વોલીબોલ કપ'ની સફળતા બાદ, અમદાવાદમાં આંતરરાષ્ટ્રીય સ્તરની વધુ એક ટુર્નામેન્ટ યોજવી એ ગુજરાતના વિશ્વસ્તરીય સ્પોર્ટ્સ ઇન્ફ્રાસ્ટ્રક્ચરની સાબિતી છે. અમદાવાદ હવે ઝડપથી દેશના પ્રીમિયર સ્પોર્ટ્સ હબ તરીકે સ્થાપિત થઈ રહ્યું છે.

Ahmedabad: તેજસ્વી યુવા ખેલાડીઓનો સમાવેશ

ભારતીય ટીમ હાલ પુનઃગઠનના તબક્કામાંથી પસાર થઈ રહી છે. હેડ કોચ સ્કોટ ફ્લેમિંગના માર્ગદર્શન હેઠળ, ટીમમાં કન્વર સંધુ, પ્રણવ પ્રિન્સ, પ્રિન્સપાલ સિંઘ અને હર્ષ ડાગર જેવા તેજસ્વી યુવા ખેલાડીઓનો સમાવેશ કરવામાં આવ્યો છે. FIBA રેન્કિંગમાં વિશ્વમાં 76મા સ્થાને રહેલી ભારતીય ટીમ સ્થાનિક દર્શકોના સમર્થન સાથે આ ક્વોલિફાયરમાં મજબૂત દેખાવ કરવા માટે ઉત્સુક છે.

બાસ્કેટબોલ પ્રેમીઓ માટે આ ચાર દિવસ એક મોટી તક છે. અમદાવાદના સ્પોર્ટ્સ ઇન્ફ્રાસ્ટ્રક્ચર અને રમતગમત પ્રત્યેની પ્રતિબદ્ધતાને કારણે આંતરરાષ્ટ્રીય સ્પોર્ટ્સ ફેડરેશન્સ હવે ગુજરાતને પ્રાથમિક પસંદગી આપી રહ્યા છે. ભારતનું એશિયન બાસ્કેટબોલમાં સ્થાન મજબૂત કરવા માટે આ મેચો અત્યંત મહત્વની રહેશે. ત્યારે, સમગ્ર અમદાવાદના રમતપ્રેમીઓ રાષ્ટ્રીય ટીમને પ્રોત્સાહિત કરવા માટે સ્ટેડિયમમાં મોટી સંખ્યામાં ઉમટી પડે તેવી અપેક્ષા રાખવામાં આવી રહી છે.

આ પણ વાંચો: Kutch: મુન્દ્રામાં કરોડોની ઓઇલ ચોરી ઝડપાઇ, પોલીસે કરી 11 આરોપીઓની અટકાયત