Junagadh: માંગરોળમાં મેઘતાંડવ, 'ન્યૂ સાગર સોસાયટી' જળબંબાકાર, તંત્રની નિષ્ક્રિયતા સામે લોકોમાં આક્રોશ

તંત્રની નિષ્ક્રિયતા સામે સ્થાનિકોનો આક્રોશ

સોસાયટીમાં પાણીનો નિકાલ ન થતા લોકોની કિંમતી ઘરવખરી અને ફર્નિચર પાણીમાં ગરકાવ થઈ ગયા છે. સ્થાનિક રહીશોએ રોષ વ્યક્ત કરતા જણાવ્યું હતું કે, ચોમાસું શરૂ થાય તે પહેલાં તંત્ર દ્વારા ગટર સફાઈ કે પાણીના નિકાલ માટે કોઈ પણ નક્કર કામગીરી કરવામાં આવી નથી. માત્ર કાગળ પર કામગીરીના દાવા કરવામાં આવે છે, પરંતુ વાસ્તવિકતા એ છે કે જરાક અમથા વરસાદમાં પણ આ વિસ્તાર બેટમાં ફેરવાઈ જાય છે. અનેકવાર રજૂઆત કરવા છતાં તંત્ર દ્વારા આ મુદ્દે આંખ આડા કાન કરવામાં આવતા લોકોમાં ભારે આક્રોશ ફેલાયો છે.

Junagadh: તંત્રના આશ્વાસનો વચ્ચે લોકોની હાલાકી

વરસાદી પાણી ઘરોમાં ઘૂસી જતા લોકોની ઘરવખરી પલળીને નકામી થઈ ગઈ છે, જેના કારણે આર્થિક નુકસાન પણ વેઠવાનો વારો આવ્યો છે. સ્થાનિકોનું કહેવું છે કે, “અમે દર વર્ષે આ જ પરિસ્થિતિનો સામનો કરીએ છીએ. તંત્ર માત્ર વાતો કરે છે પણ કોઈ કાયમી ઉકેલ આવતો નથી.” હાલ આ વિસ્તારમાં પાણીના નિકાલ માટે કોઈ પણ પ્રકારના પમ્પિંગ સ્ટેશન કે ડ્રેનેજની યોગ્ય સુવિધાનો અભાવ સ્પષ્ટપણે વર્તાઈ રહ્યો છે. વરસાદી આફત વચ્ચે તંત્રની આ નિષ્ક્રિયતા સામે લોકો હવે સડકો પર ઉતરી આવીને પોતાના હક માટે અવાજ ઉઠાવી રહ્યા છે. માંગરોળના આ વિસ્તારમાં હવે તાત્કાલિક ધોરણે પાણીનો નિકાલ કરવામાં આવે અને ભવિષ્યમાં આવી સ્થિતિ ન સર્જાય તે માટે યોગ્ય આયોજન કરવામાં આવે તેવી પ્રબળ માંગ ઉઠી છે.

આ પણ વાંચો: Valsad: નવનિર્મિત ઓવરબ્રિજ બન્યો જોખમી, 10 દિવસમાં જ પડ્યા મસમોટા ખાડા