Kutch: મુન્દ્રામાં કરોડોની ઓઇલ ચોરી ઝડપાઇ, પોલીસે કરી 11 આરોપીઓની અટકાયત

ઓઇલ ચોરીનું મોટુ નેટવર્ક પકડાયું

પ્રાપ્ત વિગતો અનુસાર, પ્રાગપર પોલીસ સ્ટેશનની હદમાં આવતા રતાડિયા સીમ વિસ્તારમાં આવેલા એક ગુપ્ત અડ્ડા પરથી મોટાપાયે ઓઇલ ચોરીનું વ્યવસ્થિત નેટવર્ક ચલાવવામાં આવતું હતું. SMC ની ટીમે ચોક્કસ બાતમીના આધારે અહીં ઓચિંતા દરોડા પાડ્યા હતા. આ સપાટાભરી કાર્યવાહી દરમિયાન પોલીસે ઘટનાસ્થળેથી 11 જેટલા આરોપીઓની અટકાયત કરી છે. ઝડપાયેલા શખ્સોમાં મુખ્યત્વે ઓઇલ ટેન્કરના ડ્રાઇવર, ક્લીનર અને ત્યાં કામ કરતા મજૂરોનો સમાવેશ થાય છે. આ કાર્યવાહી દરમિયાન પોલીસને સ્થળ પરથી 6 મોટા ઓઇલ ટેન્કર, પ્લાસ્ટિકના અનેક બેરલ, ઇલેક્ટ્રિક મોટર અને જંગી માત્રામાં શંકાસ્પદ ઓઇલ મળી આવ્યું હતું. આ તમામ સામગ્રી મળીને પોલીસે કુલ 4 કરોડ રૂપિયાથી વધુનો માતબર મુદ્દામાલ જપ્ત કરી લીધો છે.

Kutch: મુખ્ય ખેલાડીઓ હજુ પણ પોલીસ પકડથી દૂર

આટલા મોટા પાયે ચાલતા કૌભાંડમાં પડદા પાછળ રહીને ખેલ કરતા મુખ્ય ખેલાડીઓ હજુ પણ પોલીસ પકડથી દૂર છે. પોલીસે આ રેકેટના મુખ્ય સૂત્રધાર સહિત કુલ 5 આરોપીઓને વોન્ટેડ જાહેર કર્યા છે અને તેમને ઝડપી પાડવા માટે ચક્રો ગતિમાન કર્યા છે. તમામ આરોપીઓ સામે ભારતીય ન્યાય સંહિતા (BNS) ની વિવિધ કડક કલમો હેઠળ ગંભીર ગુનો નોંધવામાં આવ્યો છે. પશ્ચિમ કચ્છમાં સામે આવેલા આ ષડયંત્રને પગલે સમગ્ર વિસ્તારમાં ભારે ચકચાર મચી જવા પામી છે. હવે પોલીસ તપાસમાં એ ખુલશે કે આ નેટવર્ક કેટલા સમયથી કાર્યરત હતું અને તેમાં અન્ય કોની મિલીભગત હતી.

આ પણ વાંચો: Mahisagar જિલ્લામાં કુદરતનો પ્રકોપ, આકાશી વીજળી પડતાં 4 પશુના મોત, પશુપાલક પરિવારો સંકટમાં