Mahisagar Accident: લુણાવાડાના મુખ્ય માર્ગ પર અકસ્માત, બજારથી ઘરે જતી મહિલાઓ ગંભીર રીતે ઈજાગ્રસ્ત

CCTV માં કેદ થઈ મોતની રફ્તાર

આ સમગ્ર ઘટના નજીકની એક દુકાન બહાર લાગેલા CCTV કેમેરામાં સ્પષ્ટ રીતે કેદ થઈ ગઈ છે. વીડિયોમાં જોઈ શકાય છે કે, રોડની એક બાજુએ બે મહિલાઓ શાંતિથી ચાલીને જઈ રહી હતી, ત્યારે જ પાછળથી પૂરઝડપે આવતી એક કારે કોઈ પણ પ્રકારની ચેતવણી આપ્યા વિના સીધી તેમને અડફેટે લીધી હતી. ટક્કર માર્યા બાદ કાર ચાલકે વાહન થોભાવવાને બદલે વધુ ઝડપથી ત્યાંથી પસાર થઈ ગયો હતો, જે તેની બેદરકારી અને ગુનાહિત માનસિકતા દર્શાવે છે.

બજારથી પરત ફરતી વખતે સર્જાયો અકસ્માત

પ્રાથમિક તપાસમાં જાણવા મળ્યું છે કે, બંને મહિલાઓ બજારમાં ખરીદી પતાવીને પોતાના ઘરે પરત ફરી રહી હતી. અકસ્માત સર્જાતા જ આસપાસના સ્થાનિક લોકો તાત્કાલિક ઘટનાસ્થળે દોડી આવ્યા હતા અને ઈજાગ્રસ્ત મહિલાઓની મદદ માટે દોડધામ મચી ગઈ હતી. ઘટનાની ગંભીરતા જોતા તાત્કાલિક 108 ઈમરજન્સી સેવાનો સંપર્ક કરવામાં આવ્યો હતો. ગણતરીની મિનિટોમાં જ 108 એમ્બ્યુલન્સ ઘટનાસ્થળે પહોંચી હતી અને બંને ઈજાગ્રસ્ત મહિલાઓને સારવાર અર્થે નજીકની સરકારી હોસ્પિટલમાં ખસેડવામાં આવી હતી.

Mahisagar: સ્થાનિકોમાં રોષ, પોલીસ તપાસ તેજ

હોસ્પિટલના સૂત્રોના જણાવ્યા અનુસાર, બંને મહિલાઓને ગંભીર ઈજાઓ પહોંચી છે, જેના કારણે તેમની હાલત હાલ નાજુક બનેલી છે. આ ઘટનાને પગલે લુણાવાડાના નાગરિકોમાં ભારે રોષ જોવા મળી રહ્યો છે. સ્થાનિકોનું કહેવું છે કે, આ મુખ્ય માર્ગ પર વાહનોની અવરજવર સતત રહેતી હોય છે અને આવા બેફામ ચાલકોને કારણે નિર્દોષ લોકોનો જીવ જોખમમાં મુકાય છે.

આ પણ વાંચો: Rajkot News: રાજકોટ સિવિલ હોસ્પિટલનું અમાનવીય કૃત્ય! બીમાર દર્દીને 'દારૂડિયો' સમજી રસ્તા પર ફેંકી દીધો