Mehsana: યુરોપના સપના જોતા મહેસાણાનો પરિવાર લિબિયામાં બંધક, ખંડણીની માંગણીથી ખળભળાટ

• યુરોપ જવા નીકળેલો Mehsana  નો પરિવાર લીબિયામાં બંધક
• દંપતી અને પુત્રીને ગોંધી રાખી 2 કરોડની ખંડણી માંગી
• દંપતી અને 3 વર્ષની બાળકી લીબિયામાં બંધી બનાવાયા
• પીડિતોના પરિજનોની મદદ માટે રાજ્ય સરકારને રજૂઆત
• પીડિતના પરિજને મહેસાણા કલેક્ટર કચેરીએ રજૂઆત કરી
• હર્ષિત મહેતા નામના વ્યક્તિની સંડોવણી હોવાનો આક્ષેપ કરાયો

Mehsana Family Kidnapped:યુરોપમાં સ્થાયી થવાના સપના સાથે ગુજરાતમાંથી નીકળેલા મહેસાણા જિલ્લાના બાદલપુરા ગામ (Badalpura village) ના એક પરિવારને એજન્ટોએ છેતરીને પોર્ટુગલને બદલે જોખમી દેશ લિબિયા (Libya) મોકલી દેતાં ખળભળાટ મચી ગયો છે. હાલમાં આ સમગ્ર પરિવારને લિબિયામાં બંધક બનાવી દેવામાં આવ્યો છે અને તેમની મુક્તિ માટે રુ. 2 કરોડ જેટલી ખંડણીની માંગણી કરવામાં આવી રહી છે, જેના કારણે મહેસાણામાં ભારે ખળભળાટ મચી ગયો છે.

પોર્ટુગલના બદલે લિબિયા પહોંચી ગયો Mehsana નો પરિવાર

બાદલપુરા ગામના રહેવાસી કિસ્મતસિંહ ચાવડા (Kismat Singh Chavda) તેમનાં પત્ની હીનાબેન અને તેમની માત્ર 3 વર્ષની બાળકી સાથે દુબઈથી પોર્ટુગલ જવા માટે નીકળ્યા હતા. પરિવારને યુરોપમાં સ્થાયી કરાવવાના સપના બતાવનારા કથિત એજન્ટોએ મોટી રકમ વસૂલ્યા બાદ તેમને છેતરીને પોર્ટુગલના બદલે યુદ્ધગ્રસ્ત અને અત્યંત જોખમી ગણાતા દેશ લિબિયા મોકલી દીધા હતા.

જાનથી મારી નાખવાની ધમકી

અહેવાલ છે કે લિબિયા પહોંચ્યા બાદ આ પરિવારને એકાંત સ્થળે બંદી બનાવી દેવાયો છે. અપહરણકર્તાઓ દ્વારા આ સમગ્ર પરિવારને જાનથી મારી નાખવાની સતત ધમકીઓ આપવામાં આવી રહી છે. બંધક પરિવારે મહેસાણા ખાતેના પોતાના પરિવારજનોનો સંપર્ક કરીને આ દુઃખદ પરિસ્થિતિની જાણ કરી હતી. શરૂઆતમાં અપહરણકર્તાઓ દ્વારા 54,000 ડોલરની માંગણી કરવામાં આવી હતી. જોકે, આ કાવતરામાં સંડોવાયેલા દુબઈના એજન્ટો (Dubai Agents) એ હવે પરિવારને મુક્ત કરવા માટે વધુ રુ. 1 કરોડની ખંડણીની માંગણી કરી છે. આમ, કુલ ખંડણીની રકમ 54,000 ડોલર અને રુ. 1 કરોડ મળીને લગભગ રુ. 2 કરોડ સુધી પહોંચી શકે છે.

સ્થાનિક એજન્ટની સંડોવણીના ગંભીર આક્ષેપો

પીડિત કિસ્મતસિંહ ચાવડાના પરિવારે આ સમગ્ર કાવતરામાં હર્ષિત મહેતા (Harshit Mehta) નામના એક વ્યક્તિની સંડોવણી હોવાનો ગંભીર આક્ષેપ કર્યો છે. પરિવારજનોનો દાવો છે કે આ વ્યક્તિ અને અન્ય એજન્ટોના વિશ્વાસઘાતને કારણે તેમનો પરિવાર હાલમાં લિબિયામાં મોત અને જિંદગી વચ્ચે ઝોલા ખાઈ રહ્યો છે. પોલીસે આ મામલે તાત્કાલિક તપાસ હાથ ધરીને સંડોવાયેલા એજન્ટો સામે કડક કાર્યવાહી કરે તેવી માંગ ઉઠી છે.

કલેક્ટર કચેરીએ રજૂઆત

મુસીબતમાં ફસાયેલા કિસ્મતસિંહ ચાવડાના પરિવારજનોએ આ અંગે મહેસાણા કલેક્ટર કચેરીએ લેખિતમાં રજૂઆત કરી છે. તેમણે ગુજરાત સરકાર પાસે તાત્કાલિક મદદની આજીજી કરી છે. પરિવારે વિનંતી કરી છે કે વિદેશમાં ફસાયેલા આ પરિવારને, ખાસ કરીને નાની બાળકીને ધ્યાનમાં લઈને, કોઈ પણ ભોગે હેમખેમ પરત લાવવામાં આવે. હાલમાં આ મામલે મહેસાણા જિલ્લા વહીવટી તંત્ર દ્વારા કાર્યવાહી હાથ ધરવામાં આવી છે.

આ પણ વાંચોઃ Lokrakshak Bharti: લોકરક્ષકનું આખરી પરિણામ જાહેર, જાણો

Disclaimer : આ સમાચાર પીડિત પરિવાર દ્વારા કરવામાં આવેલી રજૂઆત અને પ્રાપ્ત મીડિયા અહેવાલો પર આધારિત છે. આંતરરાષ્ટ્રીય અને સંવેદનશીલ બાબત હોવાથી, સત્તાવાર તપાસ અને સરકારી સમર્થનની રાહ જોવી અનિવાર્ય છે.