Ahmedabad: સગીર દીકરી પર દુષ્કર્મ કરનાર સાવકા પિતાને 20 વર્ષની કેદ, DNA રિપોર્ટ બન્યો મહત્વનો પુરાવો

મુખ્ય સાક્ષી અગાઉની જુબાનીથી ફરી ગયા હતા.

આ કેસની ટ્રાયલ દરમિયાન એક એવો વળાંક આવ્યો જેણે કાયદાકીય તંત્રને પણ આશ્ચર્યમાં મૂકી દીધું. મુખ્ય સાક્ષી એવી પીડિતા અને તેની માતા બંને અચાનક પોતાની અગાઉની જુબાનીથી ફરી ગયા હતા. માતાએ દલીલ કરી હતી કે "ઘરમાં કમાનાર એકમાત્ર પતિ છે, તે જેલમાં જશે તો ઘરનું ગુજરાન કોણ ચલાવશે?" તો બીજી તરફ સગીર દીકરીએ પણ ભય કે દબાણવશ જુબાની ફેરવી નાખી અને કહ્યું કે પિતાએ કશું ખોટું કર્યું નથી.

માતા-પુત્રીએ એક થઈને જુબાની બદલી નાખી હતી

પોતાના પતિ અને સાવકા પિતાને બચાવવા માટે માતા-પુત્રીએ એક થઈને જુબાની બદલી નાખી હતી. તેમ છતાં, સરકારી વકીલ અને કોર્ટે કાયદાની મર્યાદામાં રહીને વૈજ્ઞાનિક પુરાવાઓ પર વિશેષ ધ્યાન આપ્યું. એફ.એસ.એલ. (FSL) ના અહેવાલો અને તબીબો દ્વારા હાડકાના એક્સ-રેના આધારે તૈયાર કરવામાં આવેલા પુરાવા આરોપી સામે મજબૂત સાક્ષી બનીને ઉભા રહ્યા. DNA ટેસ્ટમાં સાબિત થયું કે સાવકો પિતા જ અપરાધી છે.

Ahmedabad: આરોપીને 20 વર્ષની સખત કેદની સજા ફટકારી

તમામ પુરાવાઓ અને સંજોગોને ધ્યાનમાં રાખીને સિટી સિવિલ સેશન્સની પોક્સો કોર્ટે આરોપીને 20 વર્ષની સખત કેદની સજા ફટકારી હતી. આ ઉપરાંત, કોર્ટે પીડિતાને 4.50 લાખ રૂપિયાનું વળતર ચૂકવવાનો પણ હુકમ કર્યો છે. આ ચુકાદાએ સાબિત કર્યું છે કે વ્યક્તિગત જુબાનીઓ ભલે બદલાય, પરંતુ વૈજ્ઞાનિક પુરાવાઓ સત્યને ક્યારેય છુપાવી શકતા નથી. કાયદાએ ફરી એકવાર સાબિત કર્યું છે કે ગુનેગાર ગમે તેટલા પ્રયત્નો કરે, પણ તે કાયદાની પકડમાંથી છટકી શકતો નથી.

આ પણ વાંચો: Gujarat Mega Quiz Contest: સુરતના દીપ ખૂંટે 'કોણ બનશે ગુજરાતનો જીનિયસ'માં મારી બાજી