સાબરકાંઠા જિલ્લામાં છેલ્લા કેટલાક સમયથી અસહ્ય ગરમી અને બફારાનો સામનો કરી રહેલા લોકોને આજે મોટી રાહત મળી છે. જિલ્લાના વાતાવરણમાં અચાનક આવેલા પલટાને પગલે વિજયનગર, ચિઠોડા અને પ્રાંતિજ સહિતના વિસ્તારોમાં મેઘરાજાએ ધમાકેદાર એન્ટ્રી કરી છે.
વિજયનગર અને ગ્રામ્ય પંથકમાં વરસાદ
વિજયનગર તાલુકાના ભાખરા, વજેપુર, મોદરી, આશ્રમ, ઝેર અને ટોલડુંગરી જેવા વિસ્તારોમાં મેઘમહેર થતા ખેડૂતોના ચહેરા પર ખુશી જોવા મળી હતી. ખેતીના પાકો માટે આ વરસાદ અત્યંત આશીર્વાદરૂપ માનવામાં આવે છે. ચિઠોડા તાલુકાના ગ્રામ્ય વિસ્તારોમાં પણ વરસાદ વરસતા વાતાવરણમાં ઠંડક પ્રસરી ગઈ હતી અને ધરતીપુત્રોમાં આનંદની લાગણી છવાઈ હતી.
પ્રાંતિજમાં ગાજવીજ સાથે વરસાદ
બીજી તરફ, પ્રાંતિજ અને તેની આસપાસના વિસ્તારોમાં પણ ગાજવીજ સાથે વરસાદ વરસ્યો હતો. પોગલુ, અમીનપુર, જેશિંગપુરા અને કમાલપુર સહિતના વિસ્તારોમાં વરસાદના કારણે વાતાવરણ ખુશનુમા બની ગયું હતું. જોકે, આ વરસાદની કેટલીક આડઅસરો પણ જોવા મળી હતી. પ્રાંતિજ શહેરની કેટલીક સોસાયટીઓના આંતરિક રસ્તાઓ પર વરસાદી પાણી ભરાઈ ગયા હતા, જેના કારણે સ્થાનિક રહીશો અને વાહનચાલકોને ભારે હાલાકીનો સામનો કરવો પડ્યો હતો.
Sabarkantha rain: લોકોને ગરમીથી મળી રાહત
સ્થાનિકોનું કહેવું છે કે વરસાદને કારણે બફારામાંથી મુક્તિ મળી છે, પરંતુ નગરપાલિકા દ્વારા જો સમયસર ડ્રેનેજ સિસ્ટમની સફાઈ કરવામાં આવી હોત તો સોસાયટીઓમાં પાણી ભરાવાની સમસ્યા સર્જાઈ ન હોત. હાલમાં સમગ્ર સાબરકાંઠા જિલ્લામાં વરસાદી માહોલ જામ્યો છે અને હવામાન વિભાગ દ્વારા આગામી દિવસોમાં પણ વાતાવરણમાં ફેરફારની શક્યતા વ્યક્ત કરવામાં આવી છે. ખેડૂતો હાલમાં વાવણીના તૈયારીઓમાં જોતરાઈ ગયા છે, ત્યારે આ વરસાદ તેમના માટે સારો સંકેત લઈને આવ્યો છે.
આ પણ વાંચો: Rajkot Upleta monsoon shock: ઉપલેટામાં માત્ર 5 મીમી વરસાદમાં, રસ્તા પર પડ્યા મોટા ભૂવા
