ChhotaUdepur : ભારજ નદીના ડાયવર્ઝનમાં કૌભાંડની આશંકા, બે વર્ષમાં સાડા છ કરોડ વેડફાયા પરંતુ...

Chhota Udepur : કોન્ટ્રાક્ટરે કર્યું સરકારના કરોડો રૂપિયાનું આંધણ

ભારજ નદી પરનો આ પુલ ગુજરાત અને મધ્ય પ્રદેશને જોડતા મહત્વના માર્ગ પર આવેલો છે, જે જિલ્લા મુખ્યમથક છોટાઉદેપુરને પણ જોડે છે. પુલ તૂટ્યા બાદ રાહદારીઓને 40 કિમીના ચક્કર લગાવવા પડે તેને ટાળવા માટે સરકારે ડાયવર્ઝન બનાવવાનું કામ કર્યું હતું. પરંતુ સ્થાનિકોના જણાવ્યા અનુસાર, કોન્ટ્રાક્ટરે આ કામમાં બેદરકારી દાખવી છે. અગાઉના ડાયવર્ઝનમાં પાણીના નિકાલ માટે અંદાજે 140 પાઈપો નાખવામાં આવી હતી, પરંતુ હવે ત્રીજી વાર બની રહેલા ડાયવર્ઝનમાં ફક્ત 6થી 8 તૂટેલા પાઈપો જ નાખીને કામ પૂર્ણ કરવામાં આવ્યું છે. આને કારણે ચોમાસા પહેલા જ ડાયવર્ઝન તૂટી જશે તેવી ભીતિ વ્યક્ત કરવામાં આવી રહી છે.

કામ કરવાની જગ્યાએ ઉતારી વેઠ

રાહદારીઓ અને સ્થાનિકોના આરોપ છે કે કોન્ટ્રાક્ટરને કામ આપવામાં આવ્યું તેને જાણે વેઠ ઉતારવી હોય તેમ તકલાદી કામ કરવામાં આવ્યું છે. અગાઉની ડિઝાઈનમાં રેતી, માટી અને પાઈપોનું યોગ્ય માળખું હતું, પરંતુ હવે કોન્ટ્રાક્ટરે મનમાની કરીને ડિઝાઈન બદલી નાખી છે. ભારજ નદીમાં ચોમાસામાં પાણીનો પ્રવાહ ખૂબ જોરદાર હોય છે અને સુખી ડેમનું પાણી પણ આ નદીમાં જ છોડવામાં આવે છે, જેથી આ તકલાદી ડાયવર્ઝન ટકી શકશે કે કેમ તે અંગે સવાલો ઉઠી રહ્યા છે.

છોટાઉદેપુર-બોડેલીને જોડતો રોડ

આ માર્ગ મધ્ય પ્રદેશ, છોટાઉદેપુર અને બોડેલીને જોડે છે, પરંતુ ભારે વાહનો માટે અવરજવર પર પ્રતિબંધ છે. જેથી વાહનોને 50 કિમીથી વધુના ચક્કર લગાવવા પડે છે, જેના કારણે વેપારીઓ અને ખેડૂતોને મુશ્કેલી પડી રહી છે. માર્કેટમાં માલ વેચવા જતા વેપારીઓને વધુ ભાવ ચૂકવવા પડે છે અને ખેડૂતોને મંડીમાં માલ વેચવું મુશ્કેલ બન્યું છે. હાલમાં પુલનું કામ ચાલુ છે, પરંતુ તે મંથર ગતિએ થતું હોવાથી રાહદારીઓ જલ્દી કામ પૂર્ણ થાય તેવી માંગ કરી રહ્યા છે.

બે વર્ષમાં કરોડો રૂપિયા પાણીમાં વહ્યાં

સ્થાનિકોનું કહેવું છે કે જિલ્લાના અધિકારીઓ અને નેતાઓ આ માર્ગ પરથી પસાર થાય છે, પરંતુ તેઓને આ તકલાદી કામ પર નજર જતી નથી. કોન્ટ્રાક્ટરને ટકાઉ ડાયવર્ઝન બનાવવા માટે આદેશ કેમ આપવામાં આવતા નથી તેવા સવાલો ઉઠી રહ્યા છે. છેલ્લા બે વર્ષમાં સરકારના કરોડો રૂપિયા વેડફાયા છે, પરંતુ રાહદારીઓની મુશ્કેલીનું કાયમી નિરાકરણ આવ્યું નથી. આ બાબતે તંત્રને ગંભીરતા લેવી જોઈએ અને કોન્ટ્રાક્ટર તેમજ અધિકારીઓ સામે પગલાં લેવા જોઈએ તેવી માંગ વ્યાપી રહી છે.

આ ઘટના ઇન્ફ્રાસ્ટ્રક્ચર પ્રોજેક્ટ્સમાં પારદર્શિતા અને જવાબદારીના અભાવને ઉજાગર કરે છે. જો તકલાદી કામ આમ જ ચાલુ રહેશે તો ચોમાસામાં વધુ મુશ્કેલીઓ વધશે અને આર્થિક નુકસાન પણ વધશે. સરકાર અને અધિકારીઓને આ બાબતે તાત્કાલિક પગલાં લેવા જરૂરી છે જેથી રાહદારીઓને કાયમી રાહત મળી શકે.

આ પણ વાંચો- રીબડા GIDC ખાડામાંથી 4 વર્ષીય બાળક મળી આવ્યું : તાત્કાલિક સારવાર બાદ રાજકોટ હોસ્પિટલમાં ખસેડાયું