• Shivrajpur Beach : શિવરાજપુરના સૌંદર્યથી બે વર્ષમાં ૧૩.૫ લાખથી વધુ પ્રવાસીઓ અભિભૂત
• દ્વારકાના સાંનિધ્યમાં સ્થિત શિવરાજપુર, સ્વચ્છતા અને જળ રમતોને કારણે વૈશ્વિક નકશા પર ચમક્યું; VGRC થકી સ્થાનિક અર્થતંત્રને મળશે વધુ વેગ.

Shivrajpur Beach -ગુજરાતનું પ્રવાસન ક્ષેત્ર રાજ્યના આર્થિક વિકાસમાં નોંધપાત્ર યોગદાન આપી રહ્યું છે, જેનો જીવંત પુરાવો દ્વારકા નજીક સ્થિત શિવરાજપુર દરિયાકિનારો છે. માત્ર બે વર્ષના ગાળામાં જ આ બીચે ૧૩ લાખ ૫૮ હજારથી વધુ પ્રવાસીઓને આકર્ષિત કરીને આંતરરાષ્ટ્રીય સ્તરે પોતાની ખ્યાતિ સ્થાપિત કરી છે.

શ્રી કૃષ્ણની પવિત્ર નગરી દ્વારકાથી માત્ર ૧૨ કિલોમીટરના અંતરે આવેલો શિવરાજપુર બીચ સ્થાનિક અને વિદેશી પ્રવાસીઓ માટે હવે નવું આકર્ષણ કેન્દ્ર બન્યો છે. ગુજરાત પ્રવાસન વિકાસ નિગમ લિમિટેડ (TCGL)ના આંકડા મુજબ, વર્ષ ૨૦૨૩માં ૬,૭૮,૬૪૭ અને ૨૦૨૪માં ૬,૮૦,૩૨૫ પ્રવાસીઓએ આ દરિયાકિનારાની મુલાકાત લીધી હતી. પ્રવાસીઓની આ વધતી સંખ્યા સ્થાનિક રોજગારીને પ્રોત્સાહન આપીને રાજ્યના વૈવિધ્યપૂર્ણ સાંસ્કૃતિક વારસાને ઉજાગર કરવામાં મહત્ત્વની ભૂમિકા ભજવે છે.

Shivrajpur Beach :  બ્લૂ ફ્લેગ સર્ટિફિકેશન: વૈશ્વિક માન્યતા

શિવરાજપુર દરિયાકિનારો વર્ષ ૨૦૨૦માં બ્લૂ ફ્લેગ બીચ સર્ટિફિકેશન- Blue Flag Certification પ્રાપ્ત કર્યા બાદ ભારતના બ્લૂ ફ્લેગ બીચની યાદીમાં સામેલ થયો છે. આ પ્રમાણપત્ર મેળવવું એ દરિયાકિનારાની ઉત્તમ ગુણવત્તાનું પ્રતીક છે. આ સર્ટિફિકેશન પાણીની સ્વચ્છતા, પર્યાવરણની જાળવણી, સુરક્ષા અને સેવાઓ સહિત કુલ ૩૨ માપદંડોના આધારે આપવામાં આવે છે.

બ્લૂ ફ્લેગ સ્ટેટસ મેળવ્યા બાદ શિવરાજપુર બીચ પર પ્રવાસીઓ માટે સ્કુબા ડાઇવિંગ, બોટિંગ અને સ્કિઇંગ જેવી એડવેન્ચર સ્પોર્ટ્સ પ્રવૃત્તિઓની સુવિધા પણ ઉપલબ્ધ છે, જે તેને એડવેન્ચર પ્રવાસીઓ માટે લોકપ્રિય સ્થળ બનાવે છે.

Shivrajpur Beach-'દેખો અપના દેશ' પહેલમાં યોગદાન

શિવરાજપુરની સફળતા વડાપ્રધાન નરેન્દ્ર મોદી(PM Narendra Modi)દ્વારા જાન્યુઆરી ૨૦૨૦માં શરૂ કરાયેલી રાષ્ટ્રવ્યાપી પહેલ ‘દેખો અપના દેશ’ સાથે સુસંગત છે. આ પહેલનો મુખ્ય ઉદ્દેશ્ય આધ્યાત્મિક, સંસ્કૃતિ અને વારસો, પ્રકૃતિ અને વન્યજીવન, એડવેન્ચર અને અન્ય એમ પાંચ શ્રેણીઓ હેઠળ સ્થાનિક પ્રવાસનને પ્રોત્સાહન આપવાનો છે. શિવરાજપુર દરિયાકિનારો 'એડવેન્ચર' અને 'પ્રકૃતિ' બંને શ્રેણીઓમાં મહત્ત્વપૂર્ણ યોગદાન આપીને આ અભિયાનને આગળ ધપાવે છે.

VGRC થકી પ્રવાસન ક્ષેત્રને પ્રોત્સાહન

આ વિસ્તારમાં પ્રવાસન અને સ્થાનિક આર્થિક વિકાસને વધુ પ્રોત્સાહન આપવા માટે રાજ્ય સરકારે મોટી પહેલો હાથ ધરી છે. ક્ષેત્ર વિશિષ્ટ રોકાણ મેળવવાના ઉદ્દેશ્ય સાથે **વાઇબ્રન્ટ ગુજરાત રિજનલ કૉન્ફરન્સ (VGRC)**નું આયોજન કરવામાં આવી રહ્યું છે.

આ કૉન્ફરન્સની બીજી આવૃત્તિ ૮-૯ જાન્યુઆરીએ રાજકોટમાં યોજાશે, જે મુખ્યત્વે કચ્છ અને સૌરાષ્ટ્ર વિસ્તાર પર કેન્દ્રિત હશે. આ કૉન્ફરન્સમાં શિવરાજપુર જેવા પ્રવાસન આકર્ષણોને ખાસ ઉજાગર કરવામાં આવશે. આનાથી સ્પષ્ટ થાય છે કે ગુજરાત સરકાર પ્રાકૃતિક સંસાધનો અને સાંસ્કૃતિક વારસાનો આયોજનબદ્ધ રીતે ઉપયોગ કરીને વિકસિત ગુજરાત @ ૨૦૪૭ Vikasit Gujarat @ 2047 ના લક્ષ્ય તરફ ઝડપથી આગળ વધી રહી છે.