Surat: કામરેજથી ગુમ થયેલો બાળક વારાણસીથી મળી આવ્યો, વાલીએ ઠપકો આપતા ઘરેથી જતો રહ્યો હતો

વાલીઓએ બાળકને સામાન્ય ઠપકો આપ્યો હતો

આ સમગ્ર ઘટના પાછળનું કારણ આજની પેઢીમાં વધતી મોબાઈલની લત અને સંવેદનશીલતા દર્શાવે છે. પ્રાપ્ત માહિતી અનુસાર, ઘરે મોબાઈલ ફોન વાપરવા બાબતે વાલીઓએ બાળકને સામાન્ય ઠપકો આપ્યો હતો. માતા-પિતાના આ ઠપકાથી બાળકને અત્યંત માઠું લાગી ગયું હતું અને તે ગુસ્સામાં કોઈને પણ કહ્યા વગર ઘરેથી ભાગી છૂટ્યો હતો. બાળક અચાનક ગાયબ થઈ જતાં ચિંતિત પરિવારે તાત્કાલિક કામરેજ પોલીસ મથકે ફરિયાદ નોંધાવી હતી.

Surat: પોલીસે ટીમો બનાવી તપાસ શરૂ કરી હતી

બાળકના ગુમ થવાની ગંભીરતાને સમજીને સુરત પોલીસ (Surat Police) એ તાત્કાલિક અલગ-અલગ ટીમો બનાવી તપાસ શરૂ કરી હતી. પોલીસે સ્થાનિક વિસ્તાર અને રેલવે સ્ટેશન આસપાસના ૭૦થી વધુ સીસીટીવી કેમેરા (CCTV Footage) ના ફૂટેજ બારીકાઈથી તપાસ્યા હતા. આ સઘન ચેકિંગ દરમિયાન એક સીસીટીવી ફૂટેજમાં બાળક રેલવે સ્ટેશન પર ટ્રેનમાં બેસતો સ્પષ્ટપણે કેદ થયો હતો. આ મહત્વની કડી મળતા જ કામરેજ પોલીસે મોડું કર્યા વગર રેલવે પોલીસ ફોર્સ (RPF) અને જે-તે રૂટની રેલવે પોલીસને બાળકના ફોટા સાથે તાત્કાલિક એલર્ટ મોકલી આપ્યું હતું.

બાળકને પોલીસે સુરક્ષિત રીતે શોધી કાઢ્યો

સુરત પોલીસ તરફથી મળેલી ચોક્કસ માહિતીના આધારે વારાણસી રેલવે સ્ટેશન (Varanasi Railway Station) પર તૈનાત એલર્ટ પોલીસ કર્મીઓએ આ બાળકને ઓળખી કાઢ્યો હતો અને તેને પોતાની કસ્ટડીમાં લીધો હતો. સ્થાનિક વારાણસી પોલીસે તુરંત જ કામરેજ પોલીસનો સંપર્ક સાધી બાળક સુરક્ષિત હોવાની પુષ્ટિ કરી હતી. આ સુખદ સમાચાર મળતા જ પોલીસે બાળક અને તેના પરિવારને પોલીસ સ્ટેશન બોલાવ્યા હતા. પોતાના વહાલસોયા દીકરાને સહેમત પાછો મેળવીને પરિવારની આંખોમાં હર્ષના આંસુ આવી ગયા હતા અને તેમણે કામરેજ પોલીસની કામગીરીની પ્રશંસા કરી દિલથી આભાર માન્યો હતો.

આ પણ વાંચો: Junagadh: સિંહબાળ મોત કેસમાં મોટી કાર્યવાહી, વન વિભાગે ફરાર આરોપી બાવન ચાવડાને પોરબંદરથી ઝડપ્યો