સુરતના પાંડેસરા વિસ્તારમાં રસ્તો બેસી જવાની ગંભીર ઘટના બની છે. વરસાદી પાણી ભરાવવાને કારણે કાદવ-કીચડ વાળા કાચા રસ્તા પર ટેમ્પો પસાર થઈ રહ્યો હતો, ત્યારે અચાનક જમીન બેસી જતાં ટેમ્પો ખાડામાં ખાબક્યો હતો.
Surat Road Collapse: સુરત (Surat) શહેરમાં હાલ ચોમાસાની સિઝન અને ભારે વરસાદને કારણે અનેક સ્થળોએ રોડ-રસ્તા બેસી જવાની ઘટનાઓ સામે આવી રહી છે. પાંડેસરા (Pandesara) વિસ્તારમાં આજે એક ચોંકાવનારો કિસ્સો બન્યો હતો, જ્યાંથી પસાર થતો એક આઇશર ટેમ્પો અચાનક જમીનમાં ગરકાવ થઈ ગયો હતો. ઘટના સમયે ટેમ્પો ચાલક પણ અંદર જ હતો, પરંતુ તેણે સમયસૂચકતા દાખવીને તાત્કાલિક બહાર નીકળી જતાં એક મોટી દુર્ઘટના ટળી હતી.
કેવી રીતે બની ઘટના?
પ્રાપ્ત માહિતી અનુસાર, પાંડેસરા વિસ્તારમાં રોડની હાલત અત્યંત ખરાબ હતી. વરસાદી પાણી ભરાઈ જવાને કારણે રસ્તો કાદવ-કીચડમાં ફેરવાઈ ગયો હતો. જ્યારે ટેમ્પો ચાલક આ રસ્તા પરથી પસાર થઈ રહ્યો હતો, ત્યારે રસ્તાનું નીચેનું પડ નરમ હોવાને કારણે અચાનક રોડ બેસી ગયો હતો. ટેમ્પોના પાછળના ટાયર આખા ખાડામાં ગરકાવ થઈ ગયા હતા અને વાહન એકતરફ નમી ગયું હતું. આ ઘટનાને જોતા જ આસપાસના લોકો પણ હેબતાઈ ગયા હતા.
Surat Road Collapse: સ્થાનિકોમાં પાલિકા તંત્ર સામે ભારે રોષ
શહેરમાં અવાર-નવાર આવી ઘટનાઓ સામે આવી રહી છે, જેને લઈને સ્થાનિકોમાં પાલિકા તંત્ર સામે ભારે રોષ જોવા મળી રહ્યો છે. ચોમાસા પૂર્વે કરવામાં આવેલી કામગીરી અને રોડની ગુણવત્તા સામે પણ પ્રશ્નો ઉભા થયા છે. તંત્ર દ્વારા તાત્કાલિક ધોરણે આ વિસ્તારના રસ્તાઓનું સમારકામ કરવામાં આવે તેવી માંગણી ઉઠી રહી છે, જેથી કોઈ નિર્દોષ નાગરિક ભવિષ્યમાં આવી ઘટનાનો ભોગ ન બને.
આ પણ વાંચો: Donkey Wedding Tradition : લો બોલો! વરસાદ લાવવા માટે અહીં ગધેડાના લગ્ન કરાવાયા, જાણો આખી પરંપરા
