Surendranagar: પાટડીના મધ્યાહન ભોજનના અનાજમાં જીવાત, બાળકો બિમાર પડશે તો કોની જવાબદારી?

અનાજની બોરીઓમાં જીવાતો નીકળી

પ્રાપ્ત માહિતી મુજબ, શાળામાં જ્યારે મધ્યાહન ભોજન રાંધવા માટે અનાજની બોરીઓ ખોલવામાં આવી ત્યારે અંદરથી જીવતી જીવાતો નીકળી હતી. આટલી હદે બગડેલું અને જીવાતવાળું અનાજ બાળકોને ખવડાવવાની તૈયારી કરવામાં આવી રહી હતી તે જોઈને ત્યાં ઉપસ્થિત લોકો સ્તબ્ધ થઈ ગયા હતા. શાળાની આ પ્રકારની બેદરકારી સામે ગ્રામજનો અને વાલીઓમાં ભારે રોષની લાગણી જોવા મળી રહી છે. વાલીઓએ આક્રોશ વ્યક્ત કરતા જણાવ્યું હતું કે, "અમારા બાળકોના સ્વાસ્થ્ય સાથે આ પ્રકારની રમત કેવી રીતે રમી શકાય? જો આ અનાજ ખાઈને બાળકો બીમાર પડે તો તેની જવાબદારી કોની રહેશે?"

Surendranagar: અનાજની ગુણવત્તા જ જોખમી

મધ્યાહન ભોજન યોજનાનો હેતુ ગરીબ અને જરૂરિયાતમંદ બાળકોને પૌષ્ટિક આહાર મળે તે છે, પરંતુ અહીં તો અનાજની ગુણવત્તા જ જોખમી જણાઈ રહી છે. આ મામલો બહાર આવતા જ સ્થાનિક તંત્ર હરકતમાં આવ્યું છે. તંત્ર દ્વારા તપાસના આદેશ આપવામાં આવ્યા છે અને જવાબદાર અધિકારીઓ સામે કડક કાર્યવાહીની ખાતરી આપવામાં આવી છે. જોકે, વાલીઓનો પ્રશ્ન છે કે શું આ પહેલીવાર બન્યું છે કે વર્ષોથી બાળકોને આવું જ અનાજ પીરસવામાં આવતું હતું? હવે જોવાનું એ રહેશે કે શિક્ષણ વિભાગ દ્વારા આ મામલે કેવા પગલાં લેવામાં આવે છે અને બાળકોના ભવિષ્ય તેમજ સ્વાસ્થ્યને સુરક્ષિત રાખવા માટે શું વ્યવસ્થા કરવામાં આવે છે.

આ પણ વાંચો: સચિવાલયમાં વહીવટી હલચલ: 2 IAS અધિકારીઓને સોંપાઈ મહત્વની જવાબદારી