Vadodara: કારના પૈડાં 5 મહિનાની બાળકી પર ફરી વળતા મોત, બિલ્ડર સામે નોંધાયો ગુનો
Share
- વડોદરા (Vadodara) ભાયલી કન્સ્ટ્રક્શન સાઇટ પર કરુણ અકસ્માત
- બિલ્ડરની ઇનોવા કારના પૈડાં 5 મહિનાની બાળકી પર ફરી વળતા મોત
- માતા–પિતાની આંખો સામે 5 મહિનાની માસુમ બાળકી અનન્યાનું મોત
- બાળકી ગેટ પાસે ગોદડી પર સુતી હતી ત્યારે ઘટના બની
- માથા પર ગંભીર ઇજા થતા ઘટના સ્થળે જ લોહીલુહાણ
- પોલીસે બિલ્ડર જીતુ પટેલ સામે ગુનો નોંધ્યો
- નિર્દોષ અનન્યાના મોતથી મજૂર પરિવાર તૂટી પડ્યો
Vadodara: વડોદરા ભાયલી કન્સ્ટ્રક્શન સાઇટ પર કરુણ અકસ્માત સર્જાયો છે. જેમાં બિલ્ડરની કારના પૈડાં 5 મહિનાની બાળકી પર ફરી વળતા તેનું મોત થયું છે. માતા–પિતાની આંખો સામે 5 મહિનાની માસુમ બાળકી અનન્યાનું મોત થયુ છે. બાળકી ગેટ પાસે ગોદડી પર સુતી હતી ત્યારે આ ઘટના બની હતી. બાળકીને માથા પર ગંભીર ઇજા થતા ઘટના સ્થળે જ લોહીલુહાણ થઈ હતી. બાળકીને ગોત્રી હોસ્પિટલ સારવાર અર્થે લઇ જતા ડોક્ટરોએ અનન્યાને મૃત જાહેર કરી હતી. આ મામલે પોલીસે બિલ્ડર જીતુ પટેલ સામે ગુનો નોંધ્યો છે. જ્યારે નિર્દોષ અનન્યાના મોતથી મજૂર પરિવાર તૂટી પડ્યો છે.
Vadodara ભાયલી કન્સ્ટ્રક્શન સાઇટ પર દુખદ ઘટના
મળતી માહિત મુજબ મૂળ દાહોદ જિલ્લાના વતની અને હાલ શેરખી ગામમાં રહેતા વિનુભાઈ પણડા તેમજ તેમની પત્ની માનસીબેન પોતાના બે નાના બાળકો સાથે રોજગાર માટે કડિયાકામ કરીને ગુજરાન ચલાવે છે. છેલ્લા ચાર દિવસથી આ પરિવાર ભાયલીની 'સોપાન-55' નામની બાંધકામ સાઇટ પર પેવર બ્લોક નાખવાનું કામ કરી રહ્યો હતો. સવારે કામ શરૂ કરતાં પહેલાં માનસીબેને પોતાની 5 મહિનાની પુત્રી અનન્યાને સાઇટના મુખ્ય ગેટ પાસે એક ગોદડી પર સુવડાવી દીધી હતી, જ્યારે તેમનો નાનો દીકરો આર્યન નજીકમાં જ રમી રહ્યો હતો.
ગોદડી પર સૂતેલી બાળકી પર કારનું પૈડું ફરી વળ્યું
માતા-પિતા બંને કામમાં વ્યસ્ત થઈ ગયા હતા.સવારે આશરે 9:30વાગ્યે સાઇટના બિલ્ડર જીતુ પટેલ પોતાની ઇનોવા કાર લઈને સાઇટમાં દાખલ થયા. કાર ગેટમાંથી પસાર થતી વખતે તેનું આગળનું પૈડું સીધું જ ગોદડી પર સૂતેલી નાનકડી અનન્યા પર ફરી વળ્યું. આ ઘટનાથી બાળકીને માથાના ભાગે અત્યંત ગંભીર ઇજા થઈ અને તે લોહીલુહાણ હાલતમાં ચીસ પાડવા લાગી. નજીકમાં રમતા ભાઈ આર્યનની બૂમો સાંભળીને વિનુભાઈ અને માનસીબેન દોડી આવ્યા, પરંતુ ત્યાં સુધીમાં બાળકીની હાલત અત્યંત ગંભીર બની ચૂકી હતી.પરિવારજનોએ તાત્કાલિક અનન્યાને ભાયલીના સરકારી દવાખાનામાં લઈ જવાઈ, ત્યાંથી108 એમ્બ્યુલન્સ દ્વારા ગોત્રી મેડિકલ કોલેજ હોસ્પિટલમાં ખસેડવામાં આવી. જોકે, હોસ્પિટલ પહોંચતાં જ ડોક્ટરોએ બાળકીને મૃત જાહેર કરી દીધી.
બિલ્ડર જીતુ પટેલ સામે ગુનો નોંધાયો
પોતાની આંખો સામે જ લાડકવાઈ દીકરીનો જીવ જતો જોવાના આઘાતથી માતા-પિતા તથા સંપૂર્ણ પરિવાર તૂટી પડ્યો હતો અને હોસ્પિટલમાં આક્રંદનો માહોલ સર્જાયો હતો.આ ઘટનાની જાણ થતાં જ વડોદરા તાલુકા પોલીસે બિલ્ડર જીતુ પટેલ સામે ગુનો નોંધીને તપાસ શરૂ કરી દીધી છે. પોલીસ અકસ્માતની ચોક્કસ વિગતો જાણવા સાઇટ પર લાગેલા સીસીટીવી ફૂટેજ મેળવવાના પ્રયાસો કરી રહી છે. આ દુખદ ઘટનાએ બાંધકામ સાઇટ્સ પર કામ કરતા શ્રમિક પરિવારોના નાના બાળકોની સુરક્ષા અંગે મોટા પ્રશ્નો ઉભા કર્યા છે. બિલ્ડરની કથિત બેદરકારીને કારણે એક નિર્દોષ માસૂમનો જીવ ગયો છે, જેના કારણે સ્થાનિક શ્રમિક વર્ગમાં રોષની લાગણી પ્રસરી રહી છે.