VADODARA : વાઘોડિયામાં હિટ એન્ડ રન, ડમ્પરની અડફેટે બાળકીનું મોત
VADODARA : વડોદરા જિલ્લામાં બેફામ બનેલા ડમ્પર ચાલકે ટુ વ્હીલર પર જતા માતા-સંતાનને અડફેટે લીધા હતા. જેમાં એક દિકરી પર ડમ્પર ફરી વળતા તે ગંભીર ઇજાગ્રસ્ત થઇ હતી. જે બાદ તેને તાત્કાલિક સારવાર માટે હોસ્પિટલમાં લઇ જવામાં આવી હતી. જ્યાં ટૂંકી સારવાર બાદ તેનું મોત નિપજ્યું હતું. આ ઘટનામાં ડમ્પર ચાલક બિંદાસ્ત પણે જાણે કંઇ બન્યું જ નથી તેમ સ્થળ પરથી જતો રહ્યો હોવાનું સીસીટીવીમાં જોવા મળી રહ્યું છે. ઘટનાને પગલે પરિવારમાં ગમગીની છવાઇ ગઇ છે. સાથે જ જિલ્લામાં યમરાજ બનીને ફરતા ડમ્પર ચાલકો સામે પોલીસની કાર્યવાહી ઢીલી પડી હોવાનો અંદાજો આ ઘટના પરથી લગાડવામાં આવી રહ્યો છે. આ ઘટના 27, માર્ચના રોજ બની છે, જેમાં ગતરોજ વાઘોડિયા પોલીસ મથકમાં ફરિયાદ દાખલ કરવામાં આવી છે. (HIT AND RUN, GIRL CHILD LOST LIFE AFTER ACCIDENT WITH DUMPER - WAGHODIA, VADODARA)
જિલ્લામાં હિટ એન્ડ રનની ઘટના સામે આવી
વડોદરા શહેર જિલ્લામાં કાળ બનીને ફરતા ડમ્પર ગમે ત્યારે ગમે તેને ભરખી જાય છે. અકસ્માતની ઘટનાઓ સામે આવ્યા બાદ પોલીસ તંત્ર ડમ્પર ચાલકો સામે કડકાઇ દાખવે છે. પરંતુ સમય જતા બધુ પાછુ જેમ હતું તેમ જ થઇ જાય છે. જેને પગલે અકસ્માતની ઘટનાઓ અટકવાનું નામ નથી લેતી. વડોદરા જિલ્લાના વાઘોડિયામાં હિટ એન્ડ રનની ઘટના સામે આવી છે. વાઘોડિયાના માડોઘર રોડ પર મહિલા તેના બે સંતાનોને લઇને ટુ વ્હીલર પર જતા હતા.
Hit & Run in Waghodia: Vadodara ના વાઘોડિયામાં હિટ એન્ડ રનની ઘટના | Gujarat First
ડમ્પર ચાલકે એક્ટિવા પર જતી માતા-પુત્રીને લીધી એડફેટે
અકસ્માત બાદ ડમ્પર ચાલક થયો ફરાર
માતા-પુત્રીને સારવાર અર્થે હોસ્પિટલ ખસેડાઈ
ટુંકી સારવાર બાદ પુત્રી કાવ્યાનું થયું મોત
અકસ્માતની ઘટના સીસીટીવીમાં… pic.twitter.com/RvbBJNoAFi— Gujarat First (@GujaratFirst) March 29, 2025
કાવ્યા પટેલનું ટૂંકી સારવાર બાદ મોત નીપજ્યું
તે દરમિયાન એક ડમ્પર ચાલકે ટુ વ્હીલરને અડફેટે લેતા તેઓ રોડ પર પટકાયા હતા. આ ઘટનામાં દિકરી કાવ્યા પટેલ (ઉં. 12) ને ગંભીર ઇજાઓ પહોંચી હતી. અને સ્નેહાલીબેન પટેલ (ઉં. 32) તથા જીયાબેન પટેલ (ઉં. 10) ને નાની-મોટી ઇજાઓ પહોંચી હતી. જે બાદ તમામને સારવાર અર્થે હોસ્પિટલ લઇ જવામાં આવ્યા હતા. જ્યાં કાવ્યા પટેલનું ટૂંકી સારવાર બાદ મોત નીપજ્યું છે. જેને પગલે પરિવારમાં ગમગીની છવાઇ ગઇ છે. કાવ્યા પટેલના પિતા વિદેશમાં હોવાથી તેમને ઘટના અંગે જાણ કરી દેવામાં આવી છે. આ ઘટનામાં બેદરકાર ડમ્પર ચાલક સામે વાઘોડિયા પોલીસ મથકમાં ફરિયાદ નોંધવામાં આવી છે. જે બાદ પોલીસે સમગ્ર મામલે વધુ કાર્યવાહી હાથ ધરી હોવાનું જાણવા મળી રહ્યું છે.
આ પણ વાંચો --- VADODARA : શ્રી કુબેર ભંડારી મંદિરમાં વિવાદ વકર્યો, દાનપેટી હટાવાઇ