Monsoon Viral Infection: વરસાદની ઋતુમાં કેમ વધે છે વાયરલ ઇન્ફેક્શન?
ચોમાસા દરમિયાન તાપમાન અને હવામાં ભેજનું પ્રમાણ સતત બદલાતું રહે છે, જે શ્વસનતંત્રને પ્રભાવિત કરતા વાયરસને ફેલાવા માટે અનુકૂળ વાતાવરણ પૂરું પાડે છે. સંક્રમિત વ્યક્તિની ઉધરસ કે છીંકમાંથી નીકળતા ટીપાં હવામાં ભળીને અન્ય લોકોને સરળતાથી બીમાર કરી શકે છે. વળી બદલાતા હવામાન સાથે શરીરને ઢળવામાં થોડો સમય લાગે છે. જો આ સમયગાળામાં પૂરતી ઊંઘ, સંતુલિત આહાર અને શારીરિક સ્વચ્છતાનું ધ્યાન રાખવામાં ન આવે, તો રોગપ્રતિકારક શક્તિ નબળી પડતાં સંક્રમણનો ખતરો ઘણો વધી જાય છે.
Monsoon Viral Infection: વાયરલ ઇન્ફેક્શનના મુખ્ય લક્ષણો અને ઓળખ
વાયરલ ઇન્ફેક્શનની શરૂઆતમાં સામાન્ય રીતે ગળામાં દુખાવો, નાક વહેવું, સતત છીંકો આવવી અને શરીરના દુખાવા સાથે હળવો તાવ આવે છે. કેટલાક દર્દીઓમાં અશક્તિ અને ભૂખ ન લાગવાની સમસ્યા પણ જોવા મળે છે. સામાન્ય રીતે આ લક્ષણો થોડા દિવસોમાં આપોઆપ મટી જાય છે, પરંતુ જો તાવ લાંબો સમય રહે, શ્વાસ લેવામાં તકલીફ પડે કે છાતીમાં દુખાવો થાય, તો તેને બિલકુલ અવગણવો જોઈએ નહીં. આ દિવસોમાં કોવિડ-19, સ્વાઈન ફ્લૂ અને ડેન્ગ્યુ જેવા ગંભીર રોગોના લક્ષણો પણ સરખા હોઈ શકે છે, તેથી ડૉક્ટરની સલાહ લેવી ખૂબ જ જરૂરી છે.
સંક્રમણથી બચવાના અને ઝડપી રિકવરીના સરળ ઉપાયો
નાના બાળકો, વૃદ્ધો, સગર્ભા સ્ત્રીઓ અને નબળી રોગપ્રતિકારક શક્તિ ધરાવતા લોકોએ ભીડભાડવાળી જગ્યાઓ જેમ કે ઓફિસ, સ્કૂલ કે પબ્લિક ટ્રાન્સપોર્ટમાં ખાસ સાવચેતી રાખવી જોઈએ. વાયરલ ઇન્ફેક્શનના લક્ષણોને ઓછા કરવા માટે ડૉક્ટરની સલાહ મુજબ જ દવાઓ લેવી હિતાવહ છે. બીમારી દરમિયાન શરીરમાં પાણીની અછત ન થાય તે માટે ગરમ પાણી, સૂપ, દાળ, નાળિયેર પાણી અને વિટામિન-સી યુક્ત ફળોનું સેવન કરવું જોઈએ. ખાસ નોંધવું કે વાયરલ ઇન્ફેક્શનમાં મનસ્વી રીતે એન્ટીબાયોટીક દવાઓ લેવી નુકસાનકારક સાબિત થઈ શકે છે.
ખાસ નોંધઃ ઉપરોક્ત જણાવેલી માહિતી સામાન્ય જાણકારી માટે છે. ગુજરાત ફર્સ્ટ કોઈ પુષ્ટિ નથી કરતું. કોઈ પણ મેડિકલ જાણકારી માટે તમારા ડૉક્ટરનો સંપર્ક કરવો જોઈએ.
આ પણ વાંચો--- Cancer Drug Launched : કેન્સરની સારવારમાં આવશે નવી ક્રાંતિ! ભારતમાં લોન્ચ થઈ આ દવા, જાણો કેવી રીતે કરશે જડમૂળથી ઇલાજ
