• માત્ર 10 મિનિટના વરસાદથી ડૂબ્યું New York !
• ગણતરીના સમયમાં જ ન્યૂયોર્ક પાણી પાણી
• ન્યૂયોર્કમાં વરસાદનો કહેર, રસ્તા બન્યા નદી

New York Heavy Rain : ન્યૂ યોર્ક શહેરે ગુરુવારે એક અણધાર્યો અને વિનાશક વરસાદ અનુભવ્યો. માત્ર 10 મિનિટના મુશળધાર વરસાદે શહેરના ઘણા ભાગોમાં જળબંબાકાર પરિસ્થિતિ ઊભી કરી દીધી. આ અચાનક પડેલા વરસાદે ન માત્ર ન્યૂ યોર્કના જનજીવનને અસર કર્યું, પરંતુ 2 લોકોએ આ વરસાદમાં પોતાનો જીવ ગુમાવ્યો.

માત્ર 10 મિનિટમાં શહેર ડૂબી ગયું

હવામાન વિભાગના આંકડા મુજબ, ગુરુવારે પડેલો વરસાદ છેલ્લા કેટલાક વર્ષોના તમામ રેકોર્ડ તોડી ગયો. 10 મિનિટની અંદર જ એટલો ભારે વરસાદ પડ્યો કે બ્રુકલિન, મેનહેટન અને ક્વીન્સ જેવા વિસ્તારોમાં રસ્તાઓ અને સબવે ટ્રેક પાણીમાં ગરકાવ થઈ ગયા. અનેક ઇમારતોના ભોંયરાઓમાં પાણી ભરાઈ ગયું, જેના કારણે રહેવાસીઓ મુશ્કેલીમાં મુકાયા. શહેરના ઉદ્યાન વિભાગને વૃક્ષો પડી જવાના 140થી વધુ કોલ મળ્યા, જ્યારે હજારો ઘરોમાં વીજ પુરવઠો ખોરવાઈ ગયો. JFK, LaGuardia અને Newark એરપોર્ટ પર ફ્લાઇટ્સ મોડી પડી અથવા રદ થઈ ગઈ. સબવે સેવાઓ પણ ખોરવાઈ ગઈ, જેના કારણે મુસાફરો સ્ટેશનો પર ફસાઈ ગયા.

બ્રુકલિનમાં દુર્ઘટના : કૂતરાને બચાવતા માણસનો જીવ ગયો

બ્રુકલિનના ફ્લેટબુશ વિસ્તારમાં બનેલી ઘટના હૃદયદ્રાવક હતી. અહીં 39 વર્ષીય વ્યક્તિ પોતાના ઘરના ભોંયરામાં ફસાઈ ગયો હતો. સ્થાનિક રહેવાસી રેની ફિલિપ્સે મીડિયાને જણાવ્યું કે મૃતક વ્યક્તિએ પહેલા પોતાના એક કૂતરાને ભોંયરામાંથી બહાર કાઢ્યો હતો, પરંતુ બીજું કૂતરું બચાવવા પાછો ગયો અને પાણીના પ્રવાહમાં ફસાઈ ગયો. ફાયર વિભાગની સ્કુબા ડાઇવિંગ ટીમ સ્થળ પર પહોંચી, પરંતુ ત્યાં સુધીમાં બહુ મોડું થઈ ગયું હતું. વ્યક્તિને હોસ્પિટલ લઈ જવામાં આવ્યો હતો, પરંતુ ડોક્ટરોએ તેને મૃત જાહેર કર્યો. દુર્ભાગ્યવશ, તેનું બીજું કૂતરું પણ બચાવી શકાયું ન હતું.

મેનહેટનમાં બીજી દુર્ઘટના

બીજી ઘટના મેનહેટનના વોશિંગ્ટન હાઇટ્સ વિસ્તારમાં બની હતી. અહીં 43 વર્ષીય વ્યક્તિ એક ઇમારતના બોઈલર રૂમમાં મૃત હાલતમાં મળી આવ્યો. પોલીસના જણાવ્યા મુજબ, જ્યારે બચાવ ટીમો સ્થળ પર પહોંચી, ત્યારે તે વ્યક્તિનું મૃત્યુ થઈ ચૂક્યું હતું. બંને કેસોની તપાસ ચાલુ છે, જોકે મૃતકોના નામ હજી જાહેર કરવામાં આવ્યા નથી.

મેયર એરિક એડમ્સે શોક વ્યક્ત કર્યો

ન્યૂ યોર્કના મેયર એરિક એડમ્સે સોશિયલ મીડિયા પર શોક વ્યક્ત કરતાં લખ્યું, “આજના વરસાદમાં 2 ન્યૂ યોર્કવાસીઓએ પોતાનો જીવ ગુમાવ્યો. આ ખૂબ દુઃખદ ઘટના છે. અમે શહેરના નાગરિકોને સતર્ક રાખવા અને પૂર જેવી પરિસ્થિતિઓ માટે વધુ સજ્જ રહેવા પ્રયત્નશીલ છીએ.” મેયરે વધુમાં જણાવ્યું કે શહેરમાં કટોકટી ટીમોને તૈનાત કરવામાં આવી છે અને પાણી ભરાયેલા વિસ્તારોમાંથી લોકોના સ્થળાંતર માટે રાહત કામગીરી ચાલુ છે.

શહેરની તંત્રની કસોટી

આ અચાનક પડેલા વરસાદે ન્યૂ યોર્કના પુરવઠા તંત્રની મજબૂતી પર સવાલ ઊભા કર્યા છે. માત્ર થોડા મિનિટના વરસાદે શહેરની ડ્રેનેજ સિસ્ટમ કેવી રીતે રોકાઈ જાય છે તે સ્પષ્ટ થઈ ગયું. સબવે ટ્રેક, રસ્તાઓ અને ઇમારતોમાં પાણી ભરાઈ જતાં શહેરની ગતિ સંપૂર્ણ રીતે થંભી ગઈ હતી. વિશ્વના સૌથી આધુનિક શહેરોમાંનું ગણાતું ન્યૂ યોર્ક પણ અણધાર્યા હવામાન સામે નિશક્ત જણાયું. નિષ્ણાતોનું માનવું છે કે હવામાન પરિવર્તન (Climate Change) અને અતિશય શહેરીકરણ (Urbanization) આવા અચાનક વરસાદ અને પૂર જેવી પરિસ્થિતિઓમાં મોટું યોગદાન આપે છે.

આ પણ વાંચો :   અમેરિકામાં ₹4000 કરોડનું કૌભાંડ: ભારતીય મૂળના CEO બ્રહ્મભટ્ટ પર લોન ફ્રોડનો આરોપ