બોલિવિયન એરફોર્સનું C-130 હર્ક્યુલસ પ્લેન રસ્તા પર થયું ક્રેશ
પ્લેન ક્રેશમાં 15 લોકોના મોત, 30થી વધુ લોકો ઈજાગ્રસ્ત
Bolivian Plane Crash : બોલિવિયામાં એક મોટી દુર્ઘટના સર્જાઈ છે. શુક્રવાર (27 ફેબ્રુઆરી)ના રોજ બોલિવિયન એરફોર્સનું C-130 હર્ક્યુલસ વિમાન રાજધાની લા પાઝ નજીક આવેલા એલ અલ્ટો શહેરમાં દુર્ઘટનાગ્રસ્ત થયું હતું. આ અકસ્માતમાં 15 લોકોના મોત થયા હોવાની અને 30 લોકો ઈજાગ્રસ્ત થયાની માહિતી સામે આવી છે. ઈજાગ્રસ્તમાંથી કેટલાકની હાલત ગંભીર હોવાનું સામે આવી રહ્યું છે.
Bolivian Plane Crash : બોલિવિયામાં રસ્તા પર થયું પ્લેન ક્રેશ
સ્થાનિક મીડિયા અહેવાલો મુજબ, જેમાં એલ ડેબર અને યુનિટેલનો સમાવેશ થાય છે, ઘટના સાંજે અંદાજે 6 વાગ્યે બની હતી. વિમાન લેન્ડિંગ અથવા ટેકઓફ દરમિયાન એલ અલ્ટો ઇન્ટરનેશનલ એરપોર્ટ પર રનવે પરથી લપસી ગયું હતું. ત્યારબાદ તે એરપોર્ટની બાઉન્ડ્રી તોડી નજીકના રસ્તા પર પહોંચી ગયું અને અનેક વાહનો સાથે અથડાયું હતું, જેના કારણે ભારે નુકસાન થયું હતું.
આ પણ વાંચો: PAK-Afghanistan War: પાકિસ્તાન–અફઘાનિસ્તાન વચ્ચે યુદ્ધ, સરહદ પર ભીષણ સંઘર્ષ, રશિયાએ કરી શાંતિની આપીલ
પ્લેન ક્રેશમાં 15 લોકોના મોત
કેટલાક અહેવાલો અનુસાર વિમાન દેશના અન્ય ભાગોમાં નવી છપાયેલી નોટો લઈ જઈ રહ્યું હતું. અકસ્માત બાદ રસ્તા પર નોટો વિખેરાઈ ગયાની ચર્ચા સોશિયલ મીડિયામાં ચાલી રહી છે, પરંતુ સત્તાવાર રીતે આ બાબતની પુષ્ટિ કરવામાં આવી નથી.
30થી વધુ લોકો ઈજાગ્રસ્ત
અકસ્માત બાદ પોલીસ અને ફાયર બ્રિગેડની ટીમો તરત જ ઘટના સ્થળે પહોંચી ગઈ હતી અને ઈજાગ્રસ્તને નજીકની હોસ્પિટલોમાં ખસેડ્યા હતા. વિમાનમાં કુલ કેટલા લોકો સવાર હતા અને તેમની સ્થિતિ શું છે તેની સત્તાવાર માહિતી હજુ બહાર પાડવામાં આવી નથી.
અકસાનને પગલે એલ અલ્ટો ઇન્ટરનેશનલ એરપોર્ટને તાત્કાલિક અસરથી બંધ કરી દેવામાં આવ્યું હતું. અકસ્માતના કારણો અંગે બોલિવિયન એરફોર્સ અથવા સરકાર તરફથી હજી સુધી કોઈ સત્તાવાર નિવેદન આપવામાં આવ્યું નથી.
