Canada student visa fraud: 80 લાખની ઠગાઈ
કૅનેડાના ઓન્ટારિયો પ્રાંતમાં વિદ્યાર્થીઓ સાથે 1.26 લાખ કૅનેડિયન ડોલર એટલે કે અંદાજે 80 લાખ રૂપિયાની છેતરપિંડી થઈ છે. આ કૌભાંડમાં લેમ્બટન કોલેજમાં પ્રવેશ અપાવવાનું આશ્વાસન આપીને આર્થિક ઉચાપત કરવામાં આવી છે. ફેબ્રુઆરી 2025માં તપાસ શરૂ થયા બાદ આ સમગ્ર કૌભાંડ બહાર આવ્યું છે. તપાસમાં જાણવા મળ્યું છે કે, વિદ્યાર્થીઓને કોઈપણ કોલેજ પ્રોગ્રામમાં રજિસ્ટર કરવામાં આવ્યા નહોતા. વિદ્યાર્થીઓને માત્ર નકલી દસ્તાવેજો પકડાવીને પ્રવેશ મળી ગયો હોવાનો વિશ્વાસ અપાવવામાં આવ્યો હતો.
Canada student visa fraud: તપાસ અને દરોડાની કાર્યવાહી
બોર્ડર અધિકારીઓએ આ કેસમાં એક ઘર અને એક વ્યવસાયિક પરિસરમાં દરોડા પાડીને ઇલેક્ટ્રોનિક ઉપકરણો કબજે કર્યા છે. આ સાધનોમાંથી મહત્વના ડિજિટલ પુરાવા મળી શકે છે તેવી એજન્સીને આશંકા છે. આરોપીઓમાં 35 વર્ષીય જેનીશકુમાર પટેલ અને 38 વર્ષીય હાર્દિક દવેનો સમાવેશ થાય છે. બંને સામે 5,000 ડોલરથી વધુની છેતરપિંડી અને ખોટી માહિતી આપવા બદલ કેસ દાખલ કરવામાં આવ્યા છે. જેનીશકુમાર પટેલ સામે ધરપકડ વોરંટ જારી કરાયું છે, પોલીસ શંકા સેવી રહી છે કે, આરોપીઓ દેશ છોડીને ભાગી ગયા છે.
ઇમિગ્રેશન કન્સલ્ટન્ટનું કૌભાંડ
મળતી માહિતી મુજબ, જેનીશકુમાર પટેલ પાસ્કલ ઇમિગ્રેશન ઇન્ક નામની કંપનીનો સ્થાપક છે. તેની પ્રોફાઇલ મુજબ તેને 15 વર્ષથી વધુનો ઇમિગ્રેશન અનુભવ હોવાનો દાવો કરવામાં આવ્યો છે. ભારત, કૅનેડા અને યુએઈમાં કંપનીની શાખાઓ હોવાની પણ માહિતી છે. આ કેસમાં 1 નવેમ્બર 2024 થી 18 જૂન 2025 દરમિયાન ઓછામાં ઓછા 4 વિદ્યાર્થીઓ સાથે ઠગાઈ થયાનું બહાર આવ્યું છે. સીબીએસએ અને કોલેજ પ્રશાસન હાલમાં વધુ કોઈ ટિપ્પણી કરવાથી દૂર રહ્યા છે.
વિદ્યાર્થીઓની સંખ્યામાં ઘટાડો અને અસર
નોંધનીય છે કે, કૅનેડામાં ઇન્ટરનેશનલ સ્ટુડન્ટ્સની સંખ્યામાં નોંધપાત્ર ઘટાડો જોવા મળ્યો છે. 2024માં સ્ટડી પરમિટ ધારકો 10 લાખથી ઘટીને આશરે 4.08 લાખ થઈ ગયા છે. લેમ્બટન કોલેજમાં પણ દાખલામાં 75 ટકા જેટલો મોટો ઘટાડો આવ્યો છે. વિદ્યાર્થીઓની સંખ્યા ઘટવાથી કોલેજને 10.2 મિલિયન કૅનેડિયન ડોલરના બજેટ ખાધનો સામનો કરવો પડી રહ્યો છે. આવી છેતરપિંડીઓ વિદેશ ભણવા જવા ઈચ્છતા વિદ્યાર્થીઓ માટે મોટી મુશ્કેલી ઊભી કરી રહી છે.
આ પણ વાંચો--- China Shoe Factory Fire : ચીનની શૂઝ ફેક્ટરીમાં ભયાનક આગ! 28 લોકોના કરુણ મોત, શી જિનપિંગે આપ્યા કડક તપાસના આદેશ
