China Mine Collapse : ચીનમાં ગેરકાયદેસર ખાણ ધસી પડતા પાંચ શ્રમિકોના કરૂણ મોત

China Mine Collapse : ચીનના યુનાન [Yunnan] પ્રાંતમાં રવિવારે વહેલી સવારે એક ગમખ્વાર દુર્ઘટના સર્જાઈ છે. યુનાનના હુઇજી કાઉન્ટી [Huize County] ના બાયવુ ગામ [Baiwu Village] ખાતે આવેલી એક ગેરકાયદેસર ખાણ [Illegal Mine] ધસી પડતા પાંચ શ્રમિકોના કરૂણ મોત નિપજ્યા છે, જ્યારે એક વ્યક્તિ ગંભીર રીતે ઇજાગ્રસ્ત થયો છે.

China Mine Collapse : ખાણ દુર્ઘટનામાં પાંચ શ્રમિકોના મોત

મળતી માહિતી મુજબ, રવિવારે સવારે લગભગ 4:30 વાગ્યાના સુમારે આ ખાણ અચાનક ધસી પડી હતી. આ ઘટનામાં કુલ છ લોકો અંદર ફસાઈ ગયા હતા. સ્થાનિક વહીવટીતંત્ર અને બચાવ ટીમોએ તાત્કાલિક ઘટનાસ્થળે પહોંચીને તમામ લોકોને બહાર કાઢ્યા હતા, પરંતુ હોસ્પિટલમાં સારવાર દરમિયાન પાંચ લોકોએ અંતિમ શ્વાસ લીધા હતા. એક બચી ગયેલા શ્રમિકની હાલત હાલ સ્થિર હોવાનું જાણવા મળ્યું છે.

ગેરકાયદેસર ખાણકામ સામે પ્રશ્નો

આ ખાણ કયા ખનિજના ઉત્ખનન માટે કાર્યરત હતી તે અંગે હજુ સુધી કોઈ સત્તાવાર સ્પષ્ટતા કરવામાં આવી નથી. સ્થાનિક સત્તાવાળાઓએ આ સમગ્ર મામલે તપાસના આદેશ આપ્યા છે. નોંધનીય છે કે, ચીનમાં ખાણકામ ક્ષેત્રે સુરક્ષાના નિયમોનું ઉલ્લંઘન એક મોટી સમસ્યા બની રહ્યો છે.

એક અઠવાડિયામાં બીજી મોટી દુર્ઘટના

માત્ર એક અઠવાડિયા પહેલા જ ઉત્તર ચીનના શાંક્સી [Shanxi] પ્રાંતમાં એક કોલસાની ખાણમાં થયેલા ભીષણ વિસ્ફોટમાં 82 લોકોએ પોતાના જીવ ગુમાવ્યા હતા. તે ઘટનામાં પણ ખાણ સંચાલકો દ્વારા કાયદાનું "ગંભીર ઉલ્લંઘન" કરવામાં આવ્યું હોવાનું સામે આવ્યું હતું. વારંવાર બનતી આવી દુર્ઘટનાઓ બાદ ચીની પ્રશાસનની કામગીરી પર હવે ગંભીર સવાલો ઉભા થઈ રહ્યા છે.

આ પણ વાંચો:  રણમાં ચીનનો 'પરમાણુ પ્રોજેક્ટ',સેટેલાઇટ તસવીરોએ ખોલી દીધી ડ્રેગનની પોલ!