Congo school fire accident : ડેમોક્રેટિક રિપબ્લિક ઓફ કોંગો ના બુકાવુ પ્રદેશમાં એક અત્યંત હૃદયદ્રાવક અકસ્માત સર્જાયો છે. અહીં એક ગીચ વસ્તીવાળા વિસ્તારમાં ભીષણ આગ ફાટી નીકળવાને કારણે બે શાળાઓ આગની લપેટમાં આવી ગઈ હતી, જેમાં ઓછામાં ઓછા 24 માસૂમ બાળકોના કરુણ મોત નિપજ્યા છે અને ડઝનબંધ લોકો ગંભીર રીતે ઘાયલ થયા છે.
શાળાઓ ખાખ થતાં 24 બાળકોના કરુણ મોત
સ્થાનિક પ્રશાસનના જણાવ્યા અનુસાર, આગ સૌપ્રથમ એક રહેણાંક મકાનમાં લાગી હતી અને જોતજોતામાં તે આસપાસના વિસ્તારમાં ફેલાઈ ગઈ હતી. આ ભયાનક આગે ફુરાહા માધ્યમિક શાળા અને ઉજામા પ્રાથમિક શાળા ને પોતાની ચપેટમાં લઈ લીધી હતી. શાળાઓમાં અચાનક ધુમાડો ફેલાઈ જવાના કારણે ઘણા વિદ્યાર્થીઓ અંદર જ ફસાયા હતા અને ગૂંગળામણના કારણે તેમનું મૃત્યુ થયું હતું.
Advertisement ![Navratri Banner]()
સમગ્ર વિસ્તારમાં 300 જેટલા ઘર બળીને ખાખ
આ વિસ્તાર ઉપર M23 Rebel Groupનું નિયંત્રણ હોવાથી રાહત અને બચાવ કામગીરીમાં મુશ્કેલીઓ નડી રહી છે. બળવાખોરો દ્વારા પુષ્ટિ કરવામાં આવી છે કે આ દુર્ઘટનામાં 24 લોકોએ જીવ ગુમાવ્યા છે, જ્યારે 29 જેટલા ઘાયલોની સ્થાનિક હોસ્પિટલમાં સારવાર ચાલી રહી છે. આ ભીષણ આગના કારણે અંદાજે 300 જેટલા ઘરો પણ બળીને ખાખ થઈ ગયા છે, જેના કારણે સેંકડો લોકો બેઘર બન્યા છે.
આગ લાગવાનું કારણ અકબંધ
ઘટનાસ્થળ પરથી સામે આવેલા દ્રશ્યો ખૂબ જ દયનીય છે, જ્યાં બાળકો હોસ્પિટલના ફ્લોર પર રડતા નજરે પડે છે. હાલમાં આ ભયાનક આગ લાગવાનું ચોક્કસ કારણ અજ્ઞાત છે. પ્રશાસન અને સ્થાનિક આરોગ્ય કેન્દ્રો દ્વારા બચી ગયેલા લોકોને ત્વરિત સહાય પૂરી પાડવામાં આવી રહી છે, પરંતુ મૃત્યુઆંક હજુ વધવાની આશંકા વ્યક્ત કરવામાં આવી રહી છે. આ દુર્ઘટનાએ સમગ્ર આફ્રિકન પ્રદેશમાં શોકનું મોજુ ફેલાવી દીધું છે અને વાલીઓમાં ભારે આક્રોશ જોવા મળી રહ્યો છે.
આ પણ વાંચો : Nepal Students Missing : જળપ્રલય બાદ નેપાળમાં ચિંતાજનક સ્થિતિ! 500થી વધુ વિદ્યાર્થીઓ ગુમ, ડઝનબંધ શાળાઓ જમીનદોસ્ત
