એક શંકાસ્પદની ધરપકડ, પોલીસની તપાસ તેજ

એક અહેવાલ મુજબ પોલીસે આ કેસમાં એક શંકાસ્પદ (Suspect) વ્યક્તિની ધરપકડ કરી છે. પોલીસે જણાવ્યું કે યુવાઓ માટે બનાવવામાં આવેલા એક સેન્ટર (Youth Centre) નજીક ગોળીબાર થયો હતો. આ ઘટના શહેરના દક્ષિણ ભાગમાં આવેલી ડેન્કર્સસ્ટ્રાસે (Dankersstrasse) રોડ પર બની હતી, જ્યાં પોલીસ દ્વારા મોટા પાયે સર્ચ અને તપાસ અભિયાન ચલાવવામાં આવી રહ્યું છે. હાલ સુધી મૃતકોની ઓળખ અથવા હુમલાખોર અને પીડિતો વચ્ચેના સંબંધ અંગે કોઈ માહિતી જાહેર કરવામાં આવી નથી. સ્ટેડ શહેરની વસ્તી આશરે 50 હજાર જેટલી છે અને તે હેમ્બર્ગ (Hamburg) શહેરથી લગભગ 40 કિલોમીટર દૂર આવેલું છે.

લોકોને વિસ્તારથી દૂર રહેવાની અપીલ

પોલીસ અધિકારીઓએ નાગરિકોને અપીલ કરી છે કે તેઓ ઘટનાસ્થળ નજીક ન જાય અને તપાસ દરમિયાન ઇમરજન્સી સેવાઓ દ્વારા આપવામાં આવતી સૂચનાઓનું પાલન કરે. સમગ્ર વિસ્તારને કોર્ડન કરી દેવામાં આવ્યો છે અને ફોરેન્સિક (Forensic) નિષ્ણાતોની ટીમ સ્થળ પરથી પુરાવા એકત્ર કરી રહી છે. અધિકારીઓનું કહેવું છે કે તપાસ પૂર્ણ થયા બાદ જ ગોળીબાર પાછળનું સાચું કારણ, મૃતકોની ઓળખ અને ઘટનાની સંપૂર્ણ વિગતો જાહેર કરવામાં આવશે.

છેલ્લા 2 વર્ષમાં જર્મનીમાં વધી હિંસક ઘટનાઓ

સ્ટેડમાં થયેલી આ ઘટના છેલ્લા 2 વર્ષમાં જર્મનીમાં બનેલી અનેક હિંસક (Violence) ઘટનાઓની કડી તરીકે જોવામાં આવી રહી છે. ફેબ્રુઆરી 2025માં પૂર્વ બોક્સર બેસાર નિમાની (Besar Nimani)ની હત્યા સાથે જોડાયેલા કેસની સુનાવણી દરમિયાન બીલેફેલ્ડ (Bielefeld)ની કોર્ટ નજીક પણ ગોળીબાર થયો હતો, જેમાં 4 લોકો ઘાયલ થયા હતા. તે સમયે પોલીસે 2 શંકાસ્પદોને કસ્ટડીમાં લીધા હતા અને તપાસ શરૂ કરી હતી કે હુમલો કોર્ટમાં ચાલી રહેલા કેસ સાથે સંબંધિત હતો કે નહીં.

જર્મનીમાં તાજેતરની હિંસક ઘટનાઓ

તે પહેલાં ડિસેમ્બર 2024માં સાઉદી મૂળના એક મનોચિકિત્સક (Psychiatrist)એ મેગડેબર્ગ (Magdeburg)માં ક્રિસમસ માર્કેટ (Christmas Market)માં ભીડ વચ્ચે ભાડાની કાર ઘુસાડી દીધી હતી. આ હુમલામાં 6 લોકોના મોત થયા હતા અને સેંકડો લોકો ઘાયલ થયા હતા. બાદમાં આરોપીને આજીવન કેદ (Life Imprisonment)ની સજા ફટકારવામાં આવી હતી. જર્મન અધિકારીઓના જણાવ્યા અનુસાર આરોપીના વિચારો ઇસ્લામ વિરોધી (Anti-Islam) હતા અને તે દક્ષિણપંથી વિચારધારાનો સમર્થક હતો. સ્ટેડમાં થયેલી તાજી ગોળીબારની ઘટનાએ ફરી એકવાર જર્મનીમાં જાહેર સુરક્ષા (Public Safety) અને કાયદો-વ્યવસ્થા અંગે ગંભીર ચિંતાઓ ઊભી કરી છે. પોલીસ હાલ હુમલા પાછળના હેતુ અને સમગ્ર ઘટનાક્રમની દરેક દિશામાં તપાસ કરી રહી છે.

આ પણ વાંચો : US Firing News : અમેરિકામાં ફરી એકવાર ગોળીબાર, અનેક લોકો ઘાયલ