India US military exercise: ભારત અને અમેરિકા વચ્ચે ટેરિફને લઈને ચાલી રહેલા વિવાદની વચ્ચે પણ બંને દેશોએ અલાસ્કામાં અત્યાર સુધીનો સૌથી મોટો સંયુક્ત સૈન્ય અભ્યાસ શરૂ કર્યો છે. આ સિવાય, આ વર્ષે નવેમ્બરમાં વેસ્ટર્ન પેસિફિક ક્ષેત્રમાં 'ક્વાડ' દેશો - ભારત, અમેરિકા, જાપાન અને ઓસ્ટ્રેલિયા - વચ્ચે માલાબાર નૌસૈન્ય અભ્યાસ યોજવાની પણ યોજના છે.
રક્ષા સંબંધોમાં મજબૂતાઈ
ભલે રાષ્ટ્રપતિ ડોનાલ્ડ ટ્રમ્પ દ્વારા ભારતીય ચીજવસ્તુઓ પર 50% ટેરિફ લાદવામાં આવ્યા બાદ બંને દેશોના સંબંધોમાં તણાવ દેખાયો હોય, પરંતુ સંરક્ષણ અધિકારીઓનું કહેવું છે કે છેલ્લા બે દાયકાથી ચાલી રહેલી વ્યૂહાત્મક ભાગીદારી હજુ તૂટવાના ભયમાં નથી. આ ભાગીદારીનો પાયો રક્ષા સહયોગ છે.
Advertisement ![Navratri Banner]()
ભારત અને અમેરિકા વચ્ચે સંરક્ષણ ડીલ (India US military exercise)
ભારત અને અમેરિકા વચ્ચેની સંરક્ષણ ડીલ સતત આગળ વધી રહી છે. ભારતીય કંપની HAL સાથે અમેરિકી કંપની જનરલ ઇલેક્ટ્રિક (GE) દ્વારા 99 GE-F404 ટર્બોફેન એન્જિનની ડિલિવરી, જે બે વર્ષથી વિલંબિત હતી, તે હવે શરૂ થઈ રહી છે. આ ઉપરાંત, ભારત GE સાથે ₹833 કરોડના ખર્ચે વધુ 113 એન્જિન માટે પણ ડીલ કરવાની તૈયારીમાં છે.
અલાસ્કામાં હાઈ-એલ્ટીટ્યુડ ટ્રેનિંગ અને માલાબાર અભ્યાસ
અલાસ્કાના ફોર્ટ વેનરાઈટમાં થઈ રહેલા આ સૈન્ય અભ્યાસમાં મદ્રાસ રેજિમેન્ટના 450થી વધુ સૈનિકો ભાગ લઈ રહ્યા છે. તેઓ 14 સપ્ટેમ્બર સુધી અમેરિકાની 11મી એરબોર્ન ડિવિઝનની સાથે હાઈ-એલ્ટીટ્યુડની ઘણી સૈન્ય કવાયતો કરશે.
ક્વાડ દેશો માટે મહત્વપૂર્ણ પ્લેટફોર્મ
આ સાથે, ભારત, અમેરિકા, ઓસ્ટ્રેલિયા અને જાપાન ગુઆમ નજીક 29મા માલાબાર નૌસૈન્ય અભ્યાસની તૈયારીઓને અંતિમ રૂપ આપી રહ્યા છે. આ અભ્યાસ 1992માં ભારત અને અમેરિકા વચ્ચે દ્વિપક્ષીય રીતે શરૂ થયો હતો, પરંતુ હવે તે 'ક્વાડ' દેશો માટે એક મહત્વપૂર્ણ પ્લેટફોર્મ બની ગયો છે.
ચીન અને પાકિસ્તાનને સ્પષ્ટ સંદેશ (India US military exercise)
અલાસ્કામાં થઈ રહેલો 'યુદ્ધ અભ્યાસ 2025' માત્ર સૈન્ય તાલીમ પૂરતો સીમિત નથી, પરંતુ તે એક વ્યૂહાત્મક સંદેશ પણ આપે છે. આ અભ્યાસ એક તરફ ઈન્ડો-પેસિફિક ક્ષેત્રમાં ચીનના વધતા વર્ચસ્વ સામે સખત જવાબ ગણાય છે, જ્યારે બીજી તરફ તે પાકિસ્તાન માટે પણ સ્પષ્ટ સંકેત છે કે અમેરિકા હવે પ્રાદેશિક સુરક્ષાના સમીકરણોમાં ભારતની સાથે ઊભું છે.
આ પણ વાંચો : Donald Trump : "હવે ખૂબ મોડું થઈ ગયું છે," PM મોદીને પુતિન-જિનપિંગ સાથે જોઈ ટ્રમ્પને ખટક્યું
