Khamenei Funeral PM Modi : પીએમ મોદી જશે ઇરાન? સુપ્રીમ લીડરના અંતિમ સંસ્કાર માટે રાષ્ટ્રપતિનું ખાસ આમંત્રણ

ખામેનેઈના સત્તાવાર અંતિમ સંસ્કાર માટે પીએમ મોદીને આમંત્રણ

પશ્ચિમ એશિયાના ભૌગોલિક-રાજકીય સમીકરણો વચ્ચે ઇરાન તરફથી ભારતને એક ખૂબ જ મહત્વપૂર્ણ રાજદ્વારી નિમંત્રણ મળ્યું છે. વિદેશી મીડિયા અહેવાલો અનુસાર, ઇરાનના રાષ્ટ્રપતિ મસૂદ પેઝેશકિયાને વડાપ્રધાન નરેન્દ્ર મોદીને સંબોધીને સત્તાવાર પત્ર પાઠવ્યો છે. આ પત્રમાં ભારતના વડાપ્રધાનને આગામી સમયમાં યોજાનારા ઇરાનના સર્વોચ્ચ નેતાના અંતિમ સંસ્કારમાં વ્યક્તિગત રીતે અથવા ઉચ્ચ સ્તરીય પ્રતિનિધિમંડળ સાથે ભાગ લેવા વિનંતી કરવામાં આવી છે .

ફેબ્રુઆરીમાં અમેરિકા અને ઇઝરાયેલના સંયુક્ત હવાઈ હુમલામાં અયાતુલ્લા અલી ખામેનેઈના અવસાન (Ayatollah Ali Khamenei Demise) બાદ સમગ્ર મધ્ય પૂર્વમાં ભારે આક્રોશ અને યુદ્ધ જેવી સ્થિતિ સર્જાઈ હતી. આ ભયંકર સંઘર્ષના કારણે લાંબા સમય સુધી મોકૂફ રાખવામાં આવેલા સત્તાવાર અંતિમ સંસ્કારના કાર્યક્રમો હવે આગામી જુલાઈ મહિનામાં યોજાવા જઈ રહ્યા છે. જોકે, નવી દિલ્હી તરફથી આ હાઈ-પ્રોફાઈલ અંતિમ સંસ્કારમાં ભારતનું પ્રતિનિધિત્વ કોણ કરશે તે અંગે હજુ સુધી કોઈ સત્તાવાર જાહેરાત કરવામાં આવી નથી. આ પૂર્વે 28 ફેબ્રુઆરીના રોજ નવી દિલ્હી સ્થિત ઇરાની દૂતાવાસની મુલાકાત લઈને ભારતના વિદેશ સચિવ વિક્રમ મિસ્રીએ શોક પુસ્તિકા પર હસ્તાક્ષર કર્યા હતા.

તેહરાનથી મશહદ સુધીની અંતિમયાત્રાનો સત્તાવાર કાર્યક્રમ અને વૈશ્વિક નેતાઓનું આગમન

લાંબા સમય સુધી ચાલેલા પ્રાદેશિક સૈન્ય સંઘર્ષ અને નાજુક યુદ્ધવિરામ બાદ, ઇરાન પ્રશાસને સત્તાવાર જાહેરાત કરી છે કે ખામેનેઈના અંતિમ સંસ્કારની વિધિ 4 જુલાઈથી ધામધૂમ પૂર્વક શરૂ થશે. સૌથી પહેલા ખામેનેઈના પાર્થિવ દેહને 4 જુલાઈએ તેહરાનના ભવ્ય ગ્રાન્ડ મોસલ્લા કોમ્પ્લેક્સ (Tehran Grand Mosalla Complex) ખાતે જાહેર દર્શનાર્થે મૂકવામાં આવશે. ત્યારબાદ તેહરાન અને પવિત્ર શહેર કોમમાં વિશાળ જાહેર સરઘસો અને શોક સભાઓ કાઢવામાં આવશે.

આ સિવાય પડોશી દેશ ઇરાકના પવિત્ર શહેરો ગણાતા નજફ અને કરબલામાં પણ વિશેષ પ્રાર્થના સભાઓનું આયોજન કરવામાં આવ્યું છે, જ્યાં લાખો શિયા મુસ્લિમો એકત્રિત થાય તેવી સંભાવના છે. અંતે, 9 જુલાઈના રોજ ખામેનેઈના પૈતૃક શહેર મશહદમાં આવેલી પવિત્ર ઇમામ રઝા દરગાહ ખાતે તેમને સુપુર્દ-એ-ખાક કરવામાં આવશે. ઇરાની સત્તાવાળાઓને અપેક્ષા છે કે લગભગ ચાર દાયકા સુધી દેશનું સુકાન સંભાળનારા નેતાને અંતિમ વિદાય આપવા માટે દેશ-વિદેશમાંથી લાખો લોકો મશહદ પહોંચશે, જેના લીધે સુરક્ષા વ્યવસ્થા અત્યંત કડક કરવામાં આવી છે.

ભારત અને ઇરાન વચ્ચેના સદીઓ જૂના રાજદ્વારી સંબંધો અને કટોકટીના સમયમાં દ્વિપક્ષીય વાટાઘાટો

ભારત હંમેશા ઇરાનને તેના વિસ્તૃત પડોશના એક અત્યંત મહત્વપૂર્ણ હિસ્સા તરીકે જુએ છે, જેની સાથે ભારતના સદીઓ જૂના સાંસ્કૃતિક અને સભ્યતાગત સંબંધો રહેલા છે. મે 2024 માં જ્યારે તત્કાલીન ઇરાની રાષ્ટ્રપતિ ઇબ્રાહિમ રાયસીનું હેલિકોપ્ટર અકસ્માતમાં અવસાન થયું હતું, ત્યારે ભારત સરકારે રાષ્ટ્રીય શોકની જાહેરાત કરીને સરકારી ઇમારતો પર રાષ્ટ્રધ્વજ અડધી કાઠીએ ઝુકાવ્યો હતો. તે સમયે ભારતે તત્કાલીન ઉપરાષ્ટ્રપતિ જગદીપ ધનખડને તેહરાન મોકલીને ભારતીય પ્રતિનિધિમંડળનું નેતૃત્વ સોંપ્યું હતું.

તાજેતરમાં પશ્ચિમ એશિયામાં ફાટી નીકળેલા ચાલીસ દિવસના ભયંકર સૈન્ય તણાવ દરમિયાન પણ પીએમ મોદી અને વિદેશ મંત્રી એસ જયશંકરે ઇરાની સત્તાવાળાઓ સાથે સતત ફોનિક વાટાઘાટો ચાલુ રાખી હતી. તાજેતરમાં જ બ્રિક્સ (BRICS) વિદેશ મંત્રીઓની બેઠકમાં ભાગ લેવા નવી દિલ્હી આવેલા ઇરાનના વિદેશ મંત્રી અબ્બાસ અરાગચીએ પીએમ મોદી અને એસ જયશંકર સાથે દ્વિપક્ષીય બેઠકો યોજી હતી. ઇરાને આ અંતિમ સંસ્કાર માટે ભારત ઉપરાંત પાકિસ્તાન, ઇરાક, અફઘાનિસ્તાન, સીરિયા, લેબનાન, રશિયા, ચીન અને મધ્ય એશિયાના અનેક દેશોને ખાસ આમંત્રણ પાઠવ્યું છે, જે મધ્ય પૂર્વમાં એક નવા રાજદ્વારી સમીકરણનો સંકેત આપે છે

આ પણ વાંચો : US Supreme Court deportation decision: અમેરિકન સુપ્રીમકોર્ટનો મોટો નિર્ણય, ગુનામાં સંડોવાયેલા ગ્રીન કાર્ડ ધારકોનો થશે દેશનિકાલ