• Israel attacks in Lebanon : લેબનોનમાં ઇઝરાયલી હુમલો, 11નાં મોત
• ઇઝરાયલના હુમલાથી લેબનોનમાં હાહાકાર
• મહિલા અને બાળકો સહિત 11નાં મોતથી ખળભળાટ

Israel attacks in Lebanon : મધ્ય પૂર્વમાં ચાલી રહેલો સંઘર્ષ હવે વધુ ગંભીર અને હિંસક સ્વરૂપ ધારણ કરી રહ્યો છે. તાજેતરમાં ઇઝરાયેલી વાયુસેનાએ દક્ષિણ અને મધ્ય લેબનોનના અનેક વિસ્તારોને નિશાન બનાવીને ભીષણ હવાઈ હુમલા કર્યા છે. સ્થાનિક મીડિયા અને લેબનોનના આરોગ્ય મંત્રાલયના અહેવાલો અનુસાર, આ હુમલાઓમાં ઓછામાં ઓછા 11 લોકોના મોત થયા છે અને અનેક લોકો ગંભીર રીતે ઘાયલ થયા છે. મૃતકોમાં મહિલાઓ અને બાળકો પણ સામેલ હોવાની આશંકા છે.

હુમલામાં 11 લોકોના મોત

લેબનોન (Lebanon) અને ઇઝરાયલ (Israel) વચ્ચેનો સંઘર્ષ હવે વધુ ગંભીર સ્વરૂપ ધારણ કરી રહ્યો છે. લેબનોનની નેશનલ ન્યૂઝ એજન્સી (National News Agency) અનુસાર, તાજેતરના ઇઝરાયલી હુમલાઓમાં ઓછામાં ઓછા 11 લોકોના મોત થયા છે, જેમાં નિર્દોષ બાળકો પણ સામેલ છે. સતત વધી રહેલા હુમલાઓને કારણે દક્ષિણ લેબનોનના વિસ્તારોમાં ભય અને અશાંતિનું વાતાવરણ સર્જાયું છે.

ઇઝરાયેલ સંરક્ષણ દળનું નિવેદન - Israel attacks in Lebanon

"અમે લેબનોનમાંથી ઇઝરાયેલી નાગરિકો પર થઈ રહેલા રોકેટ હુમલાના જવાબમાં આ કાર્યવાહી કરી રહ્યા છીએ. હિઝબુલ્લાહ નાગરિક વસ્તીનો ઉપયોગ ઢાલ તરીકે કરી રહ્યું છે. જ્યાં સુધી અમારી ઉત્તરી સરહદ સુરક્ષિત નહીં થાય ત્યાં સુધી હુમલા ચાલુ રહેશે." બીજી તરફ, હિઝબુલ્લાહે આ હુમલાની આકરી નિંદા કરી છે અને ઇઝરાયેલને ગંભીર પરિણામો ભોગવવાની ચેતવણી આપી છે. હિઝબુલ્લાહે પણ વળતો પ્રહાર કરતા ઉત્તર ઇઝરાયેલના સૈન્ય મથકો પર ડઝનબંધ રોકેટ અને ડ્રોન છોડ્યા છે, જેના કારણે ઇઝરાયેલના સરહદી વિસ્તારોમાં સાયરન ગુંજી ઉઠ્યા હતા.

આ પણ વાંચો : UAE ના ફુજૈરાહ બંદર પાસેથી જહાજ હાઈજેક, ઈરાની જળસીમા તરફ લઈ જવાતા ખળભળાટ

જીયાહ વિસ્તારમાં વિનાશના દ્રશ્યો

લેબનોનની રાજધાની બેરૂત (Beirut)થી લગભગ 20 કિલોમીટર દક્ષિણમાં આવેલા જીયાહ (Jiyah) વિસ્તારમાં ઇઝરાયલે ભારે હવાઈ હુમલા કર્યા હતા. હુમલાઓ બાદ બહાર આવેલી તસવીરોમાં અનેક કારો સંપૂર્ણ રીતે બળી ગયેલી જોવા મળી હતી. બોમ્બ વિસ્ફોટના કારણે વાહનોના બાહ્ય ભાગો ગંભીર રીતે નુકસાન પામ્યા હતા. સ્થાનિક લોકોના જણાવ્યા મુજબ, હુમલાઓ બાદ વિસ્તારમાં અફરાતફરી મચી ગઈ હતી અને ઘણા પરિવારોને પોતાના ઘરો છોડવાની ફરજ પડી હતી. બચાવ ટીમો સતત રાહત અને રેસ્ક્યુ કામગીરીમાં જોડાઈ રહી છે.

નાગરિકો પર વધી રહેલી અસર

દક્ષિણ લેબનોનના ટાયર (Tyre) શહેરમાંથી મળી રહેલી જાણકારી મુજબ, આ સંઘર્ષ સતત વધી રહ્યો છે અને તેની સૌથી વધુ અસર સામાન્ય નાગરિકો પર પડી રહી છે. સ્થાનિક ન્યૂઝ એજન્સીએ કહ્યું કે, “આ વિસ્તારોમાં રહેતા લોકો માટે પરિસ્થિતિ ખૂબ જ ભયજનક બની ગઈ છે. સતત હુમલાઓને કારણે લોકો સુરક્ષા માટે સ્થળાંતર (Displacement) કરવા મજબૂર બન્યા છે.”

તણાવ શાંત કરવા અમેરિકાની તૈયારી

આ વધતા તણાવ વચ્ચે અમેરિકા (United States) દ્વારા મધ્યસ્થી કરાયેલા લેબનોન અને ઇઝરાયલ વચ્ચેના સીધા સંવાદનો નવો રાઉન્ડ ગુરુવારે વોશિંગ્ટન (Washington)માં યોજાય તેવી શક્યતા વ્યક્ત કરવામાં આવી હતી. પરંતુ હિઝબુલ્લાહ (Hezbollah)એ આ ચર્ચાઓનો વિરોધ કર્યો હતો. હિઝબુલ્લાહના લડવૈયાઓ હાલમાં ઉત્તર ઇઝરાયલ અને દક્ષિણ લેબનોનના કેટલાક વિસ્તારોમાં પ્રવેશ કરેલા ઇઝરાયલી સૈનિકો સામે હુમલા કરી રહ્યા હોવાનું કહેવાય છે.

આ પણ વાંચો : UAE ની નવી પાઇપલાઇનથી ઈરાનનું 'ઘમંડ' થશે ચકનાચૂર, હોર્મુઝ સ્ટ્રેટને બાયપાસ કરવા માટે પ્રોજેકટ કરાશે શરૂ!