કીર સ્ટારમરે ભાવુક થઈને પદ પરથી હટી જવાનો નિર્ણય કર્યો જાહેર
લંડન સ્થિત વડાપ્રધાનના સત્તાવાર નિવાસસ્થાન 10 ડાઉનિંગ સ્ટ્રીટની (10 Downing Street) બહાર દેશને સંબોધિત કરતા વડાપ્રધાન કીર સ્ટારમરે (Keir Starmer) અત્યંત ભાવુક થઈને પોતાના પદ પરથી હટી જવાનો નિર્ણય જાહેર કર્યો હતો. છેલ્લા કેટલાક મહિનાઓથી તેમની ઘટતી જતી લોકપ્રિયતા અને લેબર પાર્ટીની અંદર જ નેતૃત્વ બદલવાની સતત વધી રહેલી માંગને કારણે તેઓ ભારે દબાણ હેઠળ હતા.
કેરટેકર વડાપ્રધાન તરીકે નિભાવશે જવાબદારી
સ્ટારમરે પોતાના સંબોધનમાં સ્પષ્ટ કર્યું કે, તેમણે સંસદીય પક્ષ અને પોતાની પાર્ટીના સાંસદોની ચિંતાઓને ખૂબ જ ગંભીરતાથી સાંભળી છે અને તેથી તેઓ પદ છોડી રહ્યા છે. જોકે, જ્યાં સુધી લેબર પાર્ટી દ્વારા તેમના ઉત્તરાધિકારી એટલે કે નવા વડાપ્રધાનની ચૂંટણી પ્રક્રિયા સત્તાવાર રીતે પૂર્ણ ન થાય, ત્યાં સુધી તેઓ કેરટેકર વડાપ્રધાન તરીકે પોતાની જવાબદારીઓ નિભાવતા રહેશે.
જુલાઈ 2024 ની ઐતિહાસિક જીતથી અત્યાર સુધીની રાજકીય સફર
કીર સ્ટારમરનું આ રીતે અચાનક પદ છોડવું તે બ્રિટિશ રાજકારણ માટે ખૂબ જ મોટો ફેરફાર માનવામાં આવે છે. જુલાઈ 2024 ની સામાન્ય ચૂંટણીઓમાં તેમણે લેબર પાર્ટીને (Labour Party) પ્રચંડ બહુમતી અપાવીને 14 વર્ષના કન્ઝર્વેટિવ શાસનનો અંત આણ્યો હતો. પરંતુ સત્તા સંભાળ્યાના 2 વર્ષથી પણ ઓછા સમયમાં તેમણે રાજીનામું આપવું પડ્યું છે.
પોતાના કાર્યકાળનો બચાવ કરતા સ્ટારમરે જણાવ્યું કે, "જ્યારે 6 વર્ષ પહેલા મેં લેબર પાર્ટીની કમાન હાથમાં લીધી હતી, ત્યારે લોકો કહેતા હતા કે આપણી પાર્ટી ખતમ થઈ ગઈ છે. પરંતુ અમે દેશની જનતાની વાત સાંભળીને પક્ષને સંપૂર્ણપણે બદલી નાખ્યો." તેમણે ઉમેર્યું કે તેમની સરકારે મજબૂત અર્થતંત્ર, મજૂરોના અધિકારોમાં ઐતિહાસિક સુધારા અને આશરે ૫ લાખ લોકોને ગરીબી રેખામાંથી બહાર કાઢવાનું ભગીરથ કાર્ય કર્યું છે. તેમ છતાં, પક્ષની અંદર આગામી ચૂંટણીમાં તેમના નેતૃત્વ હેઠળ જીતવા અંગે ગંભીર સવાલો ઉભા થઈ રહ્યા હતા.
એન્ડી બર્નહામની સંસદીય ચૂંટણીમાં જીત અને સ્ટારમર પર વધેલું દબાણ
છેલ્લા કેટલાક અઠવાડિયાથી સ્ટારમર વિરુદ્ધ અસંતોષની જવાળા સળગી રહી હતી, પરંતુ ગ્રેટર મેન્ચેસ્ટરના પૂર્વ મેયર એન્ડી બર્નહામ (Andy Burnham) મેકરફિલ્ડ પેટાચૂંટણી જીતીને વેસ્ટમિન્સ્ટર સંસદમાં પરત ફરતાની સાથે જ આ દબાણ ચરમસીમાએ પહોંચી ગયું હતું. બર્નહામે નાઇજેલ ફરાજની 'રિફોર્મ યુકે' (Reform UK) પાર્ટીના ઉમેદવારને 50% થી વધુ મતોથી પરાજિત કરીને મોટો આંચકો આપ્યો હતો.
લેબર પાર્ટીના અનેક વરિષ્ઠ સાંસદો અને કેબિનેટ મંત્રીઓએ બર્નહામની આ જીતને એક પુરાવા તરીકે જોઈ હતી કે તેઓ પાર્ટીનું ભવિષ્ય બદલી શકે છે. વીકેન્ડ દરમિયાન કીર સ્ટારમરે ચેકર્સ સ્થિત પોતાના કન્ટ્રી હાઉસ ખાતે પત્ની વિક્ટોરિયા અને નજીકના સાથીઓ સાથે ગહન મંથન કર્યું હતું. શુક્રવાર સુધી નેતૃત્વના પડકારનો સામનો કરવાની વાત કરનારા સ્ટારમરે આખરે પક્ષના હિતમાં પીછેહઠ કરવાનો મોટો ફેંસલો લીધો હતો.
બ્રિટનમાં આગામી વડાપ્રધાન કોણ? સપ્ટેમ્બર સુધીમાં ચિત્ર સ્પષ્ટ થશે
કીર સ્ટારમરના આ નિર્ણય બાદ યુનાઇટેડ કિંગડમને છેલ્લા 10 વર્ષની અંદર પોતાના 7 મા વડાપ્રધાન (UK Seventh Prime Minister) મળવા જઈ રહ્યા છે, જે બ્રિટિશ શાસનની ભારે રાજકીય અસ્થિરતા દર્શાવે છે. હાલની સ્થિતિએ એન્ડી બર્નહામ વડાપ્રધાન પદની રેસમાં સૌથી મોખરે ચાલી રહ્યા છે અને તેમને આશરે200 થી વધુ સાંસદોનું સમર્થન હોવાનો દાવો કરાયો છે.
નવા નેતાની ચૂંટણી માટેની સત્તાવાર પ્રક્રિયા જુલાઈ મહિનાથી શરૂ થશે અને સંસદના સમર વેકેશન બાદ સપ્ટેમ્બર મહિના સુધીમાં બ્રિટનના નવા વડાપ્રધાનના નામની સત્તાવાર જાહેરાત કરી દેવામાં આવશે. ત્યાં સુધી કીર સ્ટારમર વડાપ્રધાન કાર્યાલયનો વહીવટ સંભાળશે.
આ પણ વાંચો : Qatar Gas Plant Explosion: કતરમાં મોટો વિસ્ફોટ, બરઝાન ગેસ પ્લાન્ટમાં આગ લાગતા 54 ઘાયલ, 18 ગુમ
