Kuwait Airport Drone Attack: કુવૈત એરપોર્ટ પર ડ્રોન હુમલામાં એક ભારતીયનું મોત, ફ્લાઇટ્સ સેવા કરાઇ સ્થગિત
Kuwait Airport Drone Attack : કુવૈત (Kuwait) ના મુખ્ય એરપોર્ટ પર થયેલા અચાનક ડ્રોન હુમલાને કારણે સમગ્ર ખાડી દેશોમાં ભારે ખળભળાટ મચી ગયો છે. અધિકારીઓના જણાવ્યા અનુસાર, એરપોર્ટ પરિસરમાં અનેક ડ્રોન ત્રાટકતા પેસેન્જર ટર્મિનલને ભારે નુકસાન પહોંચ્યું છે. આ દુર્ભાગ્યપૂર્ણ ઘટનામાં એક ભારતીય નાગરિકનું મૃત્યુ થયું છે, જ્યારે અન્ય ઘણા લોકો ગંભીર રીતે ઘાયલ થયા હોવાના અહેવાલ છે. સુરક્ષાના કારણોસર કુવૈત સરકારે તાત્કાલિક અસરથી તમામ સ્થાનિક અને આંતરરાષ્ટ્રીય ફ્લાઇટ્સને સ્થગિત કરી દીધી છે.
Kuwait Airport Drone Attack : ઈરાન-અમેરિકા તણાવ અને વધતી સુરક્ષા ચિંતાઓ
આ હુમલો એવા સમયે થયો છે જ્યારે મધ્ય પૂર્વ (Middle East) માં ઈરાન અને અમેરિકા વચ્ચેનો તણાવ ચરમસીમાએ છે. બંને દેશો વચ્ચે લશ્કરી કાર્યવાહી અને વળતા હુમલાઓની આશંકાએ સમગ્ર વિસ્તારની સુરક્ષા વ્યવસ્થાને જોખમમાં મૂકી દીધી છે. ઈરાન દ્વારા યુદ્ધવિરામ અંગેની વાતચીત અસ્થાયી રૂપે અટકાવી દેવાતા પરિસ્થિતિ વધુ ગંભીર બની છે. કુવૈતી ઉડ્ડયન અધિકારીઓએ હાલમાં ઈમરજન્સી પ્લાન (Emergency Plan) અમલમાં મૂકીને સમગ્ર એરપોર્ટને સુરક્ષા ઘેરામાં લઈ લીધું છે.
An Indian national killed in attack on Kuwait airport: Indian Embassy in Kuwait.
— Press Trust of India (@PTI_News) June 3, 2026
સુરક્ષા તપાસ અને ફ્લાઇટ સેવાઓ પર અસર
હુમલા બાદ એરપોર્ટ પર સઘન સુરક્ષા તપાસ શરૂ કરવામાં આવી છે. ઘણી આવનારી ફ્લાઇટ્સને ડાયવર્ટ કરવામાં આવી છે, જેના કારણે આંતરરાષ્ટ્રીય સ્તરે મુસાફરો મુશ્કેલીમાં મુકાયા છે. ભારતીય એરલાઇન ઇન્ડિગો [IndiGo] એ સુરક્ષાના કારણોસર કુવૈત જતી પોતાની ફ્લાઇટ્સ અસ્થાયી રૂપે રદ કરવાનો નિર્ણય લીધો છે. કુવૈત સરકાર દ્વારા રાહત અને બચાવ ટીમોને તૈનાત કરવામાં આવી છે અને નુકસાનનું આકલન કરવામાં આવી રહ્યું છે. મુસાફરોને મુસાફરી પહેલા ફ્લાઇટ સ્ટેટસ [Flight Status] તપાસવાની સલાહ આપવામાં આવી છે.
આ પણ વાંચો: Middle East Update : ઈરાનના સર્વોચ્ચ નેતા અંગે અમેરિકાનો મોટો ખુલાસો