3 અલગ-અલગ જહાજો પર હુમલા

ભારત સરકારના જણાવ્યા અનુસાર 8 જૂને પલાઉ (Palau)ના ધ્વજ હેઠળ સંચાલિત તેલ ટેન્કર ‘મેરિવેક્સ’ (Marivex) પર અમેરિકી સૈન્યે હુમલો કર્યો હતો. આ જહાજમાં 24 ભારતીય નાવિકો સવાર હતા. જોકે આ હુમલામાં તમામ ક્રૂ સભ્યોને સુરક્ષિત રીતે બચાવી લેવામાં આવ્યા હતા. ત્યારબાદ 10 જૂને પલાઉના જ ધ્વજ હેઠળ ચાલતા બીજા ટેન્કર ‘સેટેબેલો’ (Settebello) પર હુમલો થયો હતો. આ જહાજમાં પણ 24 ભારતીય નાવિકો હતા, જેમાંથી 3 ભારતીયોના મોત થયા હતા. આ પછી 11 જૂને ‘જલવીર’ (Jalveer) નામના ટેન્કર પર હુમલો કરવામાં આવ્યો હતો. ગિની-બિસાઉ (Guinea-Bissau)ના ધ્વજ હેઠળ ચાલતા આ જહાજમાં 20 ભારતીય ક્રૂ સભ્યો હાજર હતા. સતત થઈ રહેલા આ હુમલાઓને લઈને ભારતે ગંભીર નારાજગી વ્યક્ત કરી છે.

અમેરિકી નૌકાદળ જવાબદાર : વિદેશ મંત્રાલય

ભારતના વિદેશ મંત્રાલય (Ministry of External Affairs - MEA)ના પ્રવક્તા રણધીર જયસ્વાલએ મીડિયા બ્રીફિંગ દરમિયાન જણાવ્યું કે મેરિવેક્સ, સેટેબેલો અને જલવીર પર થયેલા હુમલાઓ અમેરિકી નૌકાદળ દ્વારા કરવામાં આવ્યા હતા. અમેરિકી સેન્ટ્રલ કમાન્ડ (US Central Command) દ્વારા સોશિયલ મીડિયા પર કરાયેલી પોસ્ટમાં જણાવાયું હતું કે જલવીરને નષ્ટ કરવામાં આવ્યું કારણ કે જહાજે અમેરિકી દળોના નિર્દેશોનું પાલન કર્યું નહોતું. વધુમાં એવો દાવો પણ કરાયો હતો કે જહાજ ઈરાની તેલ (Iranian Oil) લઈ જઈ રહ્યું હતું અને તે પ્રતિબંધો (Sanctions)નું ઉલ્લંઘન કરી રહ્યું હતું.

ભારતે અમેરિકાને સખત સંદેશ આપ્યો (Middle East conflict)

સેટેબેલો પર થયેલા હુમલા અને ભારતીયોના મૃત્યુ બાદ ભારતે અમેરિકાના કાર્યકારી રાજદૂત (Charge d’Affaires) જેસન મીક્સ (Jason Meeks)ને તલબ કર્યા હતા. તેમને સત્તાવાર વિરોધપત્ર (Demarche) સોંપીને ભારતની કડક નારાજગી વ્યક્ત કરવામાં આવી હતી. રણધીર જયસ્વાલે જણાવ્યું કે ભારત પોતાના નાવિકોની સુરક્ષા અને કલ્યાણને સર્વોચ્ચ પ્રાથમિકતા આપે છે. તેમણે સ્પષ્ટ શબ્દોમાં કહ્યું કે, આવા હુમલાઓ તાત્કાલિક બંધ થવા જોઈએ અને વિવાદોના ઉકેલ માટે સંવાદ (Dialogue) અને કૂટનીતિ (Diplomacy) જ યોગ્ય માર્ગ છે.

હુમલાનું કારણ શું?

વિદેશ મંત્રાલયના જણાવ્યા અનુસાર 3માંથી 2 જહાજો પર અમેરિકી ટ્રેઝરી વિભાગની એજન્સી ‘ઓફિસ ઓફ ફોરેન એસેટ્સ કંટ્રોલ’ (Office of Foreign Assets Control - OFAC) દ્વારા પ્રતિબંધો લાગુ હતા. જ્યારે ત્રીજા જહાજને નિયમોનું પાલન ન કરનાર (Non-Compliant) ગણવામાં આવ્યું હતું. OFAC એવી એજન્સી છે જે ઈરાન અને રશિયા (Russia) સંબંધિત અમેરિકી પ્રતિબંધોના ઉલ્લંઘન સામે કાર્યવાહી કરે છે. મંત્રાલયે એ પણ સ્પષ્ટ કર્યું કે હુમલાનો ભોગ બનેલા ત્રણેય જહાજો વિદેશી ધ્વજ હેઠળ સંચાલિત હતા અને તે ભારતીય માલિકીના નહોતા. જોકે તેમાં મોટી સંખ્યામાં ભારતીય નાવિકો કાર્યરત હતા.

મૃતકોના પરિવારોને સહાય

ભારત સરકારે જણાવ્યું છે કે, આ દુર્ઘટનામાં જીવ ગુમાવનાર દરેક ભારતીય નાવિકના પરિવારને સીમેન વેલફેર ફંડ સોસાયટી (Seamen Welfare Fund Society) મારફતે 10-10 લાખ રૂપિયાની આર્થિક સહાય આપવામાં આવશે. ભારતે સાથે જ હોર્મુઝ જળમાર્ગ (Strait of Hormuz)માં આંતરરાષ્ટ્રીય કાયદા મુજબ અવરોધ વિના અવરજવર ચાલુ રહેવી જોઈએ તેવો પોતાનો સ્પષ્ટ અભિપ્રાય પણ વ્યક્ત કર્યો છે.

આ પણ વાંચો : US-Iran War : અમેરિકા-ઈરાન તણાવ ફરી ઉગ્ર બન્યો, હવાઈ હુમલાઓ બાદ strait of hormuz બંધ કરવાની ઈરાનની જાહેરાત