• મિસ વર્લ્ડ 2025 વિવાદમાં!
• મિસ ઇંગ્લેન્ડનો ગંભીર આક્ષેપ
• હૈદરાબાદ સ્પર્ધા દરમિયાન દુર્વ્યવહાર?
• મિસ વર્લ્ડ સ્પર્ધા પર સવાલો ઊઠ્યા
• મિસ ઇંગ્લેન્ડે સ્પર્ધા અધવચ્ચે છોડી

Miss England Milla Magee claims : હૈદરાબાદમાં યોજાઈ રહેલી મિસ વર્લ્ડ 2025 સ્પર્ધા એક મોટા વિવાદમાં ફસાઈ ગઈ છે. આ સુંદરતાની સ્પર્ધામાં ભાગ લેવા માટે ભારત આવેલી મિસ ઇંગ્લેન્ડ 2024, મિલા મેગીએ સ્પર્ધા અધવચ્ચે છોડી દીધી છે. 24 વર્ષીય મિલાએ આયોજકો પર ગંભીર આરોપ લગાવ્યા છે, જેમાં તેમણે દાવો કર્યો છે કે તેલંગાણામાં તેની સાથે અયોગ્ય વર્તન કરવામાં આવ્યું હતું અને તેને "વેશ્યા જેવો અનુભવ" કરાવવામાં આવ્યો હતો. આ આરોપોએ સ્પર્ધાની પારદર્શિતા અને આયોજન પર સવાલો ઉભા કર્યા છે.

મિલા મેગીના આરોપો અને તેનો અનુભવ

મિલા મેગીએ બ્રિટિશ અખબાર 'ધ સન' સાથેની વાતચીતમાં પોતાના અનુભવને "અગ્નિપરીક્ષા" ગણાવી. તેમણે જણાવ્યું કે, સ્પર્ધકોને આખો દિવસ મેકઅપ અને બોલ ગાઉનમાં રહેવાનું દબાણ કરવામાં આવ્યું હતું, નાસ્તા દરમિયાન પણ. આ ઉપરાંત, તેમને સ્પર્ધાના ફાઇનાન્સરો સાથે વાતચીત વધારવા અને તેમનું મનોરંજન કરવા માટે દબાણ કરવામાં આવ્યું હતું. મિલાએ કહ્યું, "દરેક ટેબલ પર છ મહેમાનો સાથે બે સ્પર્ધકોને બેસાડવામાં આવતી હતી અને આખી સાંજ તેમનું મનોરંજન કરવાનું કહેવામાં આવ્યું હતું. આ ખોટું હતું. હું લોકોનું મનોરંજન કરવા માટે સ્પર્ધામાં નહોતી ગઈ."

મિલાએ વધુમાં જણાવ્યું કે તે આ સ્પર્ધામાં પરિવર્તન લાવવાના ઉદ્દેશ્ય સાથે ગઈ હતી, પરંતુ તેને લાગ્યું કે તેની સાથે "વાંદરાઓની જેમ" વર્તવામાં આવી રહ્યું છે. તેણે ઉમેર્યું, "જ્યાં સુધી તમે તમારો અવાજ ન ઉઠાવો અને પરિવર્તન ન લાવો, ત્યાં સુધી દુનિયાના મુગટ અને ખેસનો કોઈ અર્થ નથી." મિલાએ 7 મેના રોજ હૈદરાબાદમાં સ્પર્ધામાં ભાગ લેવા આવી હતી અને 16 મેના રોજ લંડન પરત ફરી હતી, જેનાથી તેના ચાહકો અને અન્ય સ્પર્ધકોને આઘાત લાગ્યો હતો.

તપાસમાં આરોપોના પુરાવા ન મળ્યા

મિલા મેગીના આરોપોની તપાસ તેલંગાણાના વરિષ્ઠ IAS અધિકારી જયેશ રંજન દ્વારા કરવામાં આવી હતી. PTI અનુસાર, તેમણે જણાવ્યું કે મિલાના ઉત્પીડનના આરોપોના કોઈ નક્કર પુરાવા મળ્યા નથી. તેમણે આરોપોને નકારતાં કહ્યું કે, તપાસમાં કોઈ ગેરરીતિના સંકેતો મળ્યા નથી. આ તપાસના પરિણામે વિવાદ વધુ ગરમાયો છે, કારણ કે મિલાના આરોપો અને તપાસના અહેવાલ વચ્ચે વિરોધાભાસ જોવા મળી રહ્યો છે.

તેલંગાણા સરકારની પ્રતિક્રિયા

રવિવારે, તેલંગાણાના મંત્રી કેટી રામા રાવે આ ઘટના પર પ્રતિક્રિયા આપી અને મિલા મેગી સાથે થયેલા વર્તનની નિંદા કરી. તેમણે મિલાની માફી માંગતાં જણાવ્યું કે, તેલંગાણામાં મહિલાઓનું સન્માન કરવામાં આવે છે, અને આ ઘટના રાજ્યના મૂલ્યોનું પ્રતિનિધિત્વ કરતી નથી. તેમણે આ મામલે વધુ વિગતવાર તપાસની માંગ કરી છે, જેથી સત્ય બહાર આવે અને જવાબદારી નક્કી થઈ શકે.

આ પણ વાંચો :  પતિના મોતથી દુઃખી પત્નીએ AI રોબોટ સાથે કર્યા લગ્ન! છૂટાછેડા સુધી પહોંચી હતી વાત, પણ હવે...