James Webb Telescope Discovery: NASAના જેમ્સ વેબ ટેલિસ્કોપે શોધ્યા 13 અબજ વર્ષ જૂના 'પ્રાચીન તારાઓ'
- NASA એ 13 અબજ વર્ષ પહેલાના તારાની કરી શોધ (James Webb Telescope Discovery)
- જૂના 'POP-III' તારાઓની શોધ કરી
- આ તારા LAP1-B નામની ગેલેક્સીમાં જોવા મળ્યા
નાસાના જેમ્સ વેબ સ્પેસ ટેલિસ્કોપ (JWST) એ બ્રહ્માંડના ઉદભવ સાથે જોડાયેલા એક અત્યંત મહત્વપૂર્ણ રહસ્ય પરથી પડદો ઉઠાવ્યો છે. તાજેતરમાં ખગોળશાસ્ત્રીઓએ બ્રહ્માંડના સૌથી પ્રથમ અને જૂના તારાઓનું અવલોકન કર્યું છે, જેનો જન્મ 13 અબજ વર્ષ પહેલાં 'બિગ બેંગ' ના ટૂંકા સમય બાદ થયો હતો. આ તારાઓને વૈજ્ઞાનિક ભાષામાં 'પોપ્યુલેશન III' (POP-III) તરીકે ઓળખવામાં આવે છે.'ધ એસ્ટ્રોફિઝિકલ જર્નલ લેટર્સ'માં પ્રકાશિત થયેલા અહેવાલ મુજબ, આ પ્રાચીન તારાઓ પૃથ્વીથી 13ના અબજ પ્રકાશ-વર્ષ દૂર LAP1-B નામની ગેલેક્સીમાં જોવા મળ્યા છે. ખગોળશાસ્ત્રી એલી વિસ્બલની આગેવાની હેઠળની ટીમે જણાવ્યું હતું કે, JWST ના ઇન્ફ્રારેડ સ્પેક્ટ્રમ દ્વારા જાણવા મળ્યું છે કે આ તારાઓ અત્યંત તીવ્ર અલ્ટ્રાવાયોલેટ પ્રકાશનું ઉત્સર્જન કરે છે અને તેમનું દળ સૂર્ય કરતા લગભગ 100 ગણું વધારે છે.
James Webb Telescope Discovery: કેવી રીતે શક્ય બની આ શોધ?
આટલા દૂર આવેલા તારાઓને જોવા સામાન્ય રીતે અશક્ય છે, પરંતુ ગુરુત્વાકર્ષણ લેન્સિંગ (Gravitational Lensing) નામની કુદરતી ઘટનાએ આ કામ સરળ બનાવ્યું. ગેલેક્સી ક્લસ્ટરના ગુરુત્વાકર્ષણને કારણે પ્રકાશ વળાંક લેતા તે 100 ગણો વિસ્તૃત દેખાયો, જેના કારણે જેમ્સ વેબ ટેલિસ્કોપ તેને કેપ્ચર કરી શક્યું.
James Webb Telescope Discovery: આ તારાઓ કેમ ખાસ છે?
ધાતુની અછત: આ તારાઓ હાઇડ્રોજન અને હિલીયમ જેવા વાયુઓના વાતાવરણમાં રચાયા હતા, જેમાં અન્ય ધાતુઓનો અભાવ હતો.
બ્રહ્માંડના બિલ્ડીંગ બ્લોક્સ: આ તારાઓ મોટી તારાવિશ્વો (Galaxies) ની રચના માટેના પાયાના પથ્થરો માનવામાં આવે છે.
અદભૂત તેજ: પ્રવર્તમાન સિદ્ધાંતો મુજબ, આ તારાઓ આપણા સૂર્ય કરતા અબજ ગણા વધુ તેજસ્વી હોઈ શકે છે.
વૈજ્ઞાનિકો હવે આગામી તબક્કામાં આ 'પોપ્યુલેશન-III' તારાઓ કેવી રીતે પછીની પેઢીના 'પોપ્યુલેશન-II' તારાઓમાં રૂપાંતરિત થયા તેનું વિગતવાર સિમ્યુલેશન કરવા માંગે છે, જેથી બ્રહ્માંડના ઉત્ક્રાંતિના રહસ્યો વધુ સ્પષ્ટ રીતે સમજી શકાય.
આ પણ વાંચો : Google એ લોન્ચ કર્યું AI બ્રાઉઝર Disco, આદેશ આપતા જ બનાવી દેશે કસ્ટમાઇઝ App