• સાંસદે સંસદમાં બતાવ્યો નગ્ન ફોટો?
• ન્યુઝીલેન્ડના મહિલા સાંસદ લૌરા મેકક્લુરે ટેકનોલોજીના દૂરોપયોગ વિશે સમજાવ્યું
• મહિલા સાંસદે સંસદમાં પોતાનો જ AI-જનરેટ કરેલો નગ્ન ફોટો બતાવ્યો
• ડીપફેક વિરુદ્ધ કડક કાયદાની હિમાયત કરી

New Zealand female MP Laura McClure : આર્ટિફિશિયલ ઇન્ટેલિજન્સ (AI) અને ડીપફેક ટેકનોલોજીની ચર્ચા આજે વૈશ્વિક સ્તરે થઈ રહી છે. આ ટેકનોલોજીના ફાયદા સાથે તેની ગંભીર આડઅસરો પણ સામે આવી રહી છે, ખાસ કરીને ગોપનીયતા અને વ્યક્તિગત સુરક્ષા પરના જોખમો. ડીપફેકનો ઉપયોગ કરીને નકલી ચિત્રો અને વીડિયો બનાવવામાં આવે છે, જે લોકોની પ્રતિષ્ઠા અને માનસિક સ્થિતિને નુકસાન પહોંચાડે છે. આવી જ એક ઘટના ન્યુઝીલેન્ડના મહિલા સાંસદ લૌરા મેકક્લુર સાથે બની, જેમણે આ મુદ્દે સંસદમાં બોલ્ડ પગલું ભરીને વૈશ્વિક ચર્ચાનો વિષય બનાવ્યો.

સંસદમાં નકલી ફોટોનું પ્રદર્શન

લૌરા મેકક્લુરે ન્યુઝીલેન્ડની સંસદમાં પોતાનો એક નગ્ન ફોટો બતાવીને સૌને આશ્ચર્યમાં મૂકી દીધા. તેમણે સ્પષ્ટ કર્યું કે, આ ફોટો ડીપફેક ટેકનોલોજીનો ઉપયોગ કરીને પોતે જ બનાવ્યો છે, અને તે નકલી છે. લૌરાએ જણાવ્યું કે આવા ડીપફેક ચિત્રો બનાવવા માટે ઇન્ટરનેટ પર માત્ર 5 મિનિટથી ઓછો સમય લાગે છે, જે ટેકનોલોજીના દુરુપયોગની ગંભીરતા દર્શાવે છે. આ પગલું ભરીને તેમણે ડીપફેકના જોખમો અને તેની સામે કડક કાયદાની જરૂરિયાત પર ભાર મૂક્યો.

 

View this post on Instagram

 

A post shared by Laura McClure MP (@lauramcclure)

ડીપફેક વિરુદ્ધ કડક કાયદાની હિમાયત

લૌરા મેકક્લુરે સંસદમાં ડીપફેક ટેકનોલોજીના દુરુપયોગની ટીકા કરતાં કહ્યું, “આ ટેકનોલોજીનો ઉપયોગ મહિલાઓ અને છોકરીઓને અપમાનિત અને શોષિત કરવા માટે થઈ રહ્યો છે, જે તેમની પરવાનગી વિના થાય છે. આવી ઘટનાઓ રોકવા માટે આપણે મજબૂત કાયદાઓ બનાવવા પડશે.” તેમણે ભારપૂર્વક જણાવ્યું કે સમસ્યા ટેકનોલોજીમાં નથી, પરંતુ તેનો દુરુપયોગ કરનારા લોકોમાં છે. આ મુદ્દાને ગંભીરતાથી લેતાં, લૌરાએ ‘ડીપફેક ડિજિટલ હાર્મ એન્ડ એક્સપ્લોઇટેશન બિલ’ રજૂ કર્યું, જે પરવાનગી વિના ડીપફેક પોર્નોગ્રાફિક કન્ટેન્ટ બનાવવા અને શેર કરવા પર સંપૂર્ણ પ્રતિબંધની માંગ કરે છે.

ડીપફેકની અસર: ડરામણી અને અપમાનજનક

લૌરાએ સંસદમાં ભાવુક થઈને કહ્યું, “જ્યારે કોઈ વ્યક્તિનો નકલી નગ્ન ફોટો ઇન્ટરનેટ પર વાયરલ થાય છે, ત્યારે તે પોતાને લાચાર અનુભવે છે. આ ખૂબ જ ડરામણું અને અપમાનજનક છે.” તેમણે ઉમેર્યું કે આવી ઘટનાઓ વ્યક્તિની માનસિક અને સામાજિક પ્રતિષ્ઠાને ગંભીર નુકસાન પહોંચાડે છે, અને આવી પ્રવૃત્તિઓને રોકવા માટે તાત્કાલિક પગલાં લેવા જરૂરી છે. તેમનું આ પગલું ડીપફેક ટેકનોલોજીના દુરુપયોગથી થતા નુકસાનને રોકવા માટે એક મહત્વપૂર્ણ ચેતવણી છે.

આ પણ વાંચો :  રાષ્ટ્રીય સુરક્ષાના નામે ટ્રમ્પે લીધો મોટો નિર્ણય, હવે આ 12 દેશના નાગરિકો નહીં જઇ શકે અમેરિકા