જળવાયુ પરિવર્તનથી પ્રાણીઓની 8 હજાર પ્રજાતિ લુપ્તતાના આરે, Oxford Uni નું ચોંકાવનારૂ તારણ

• દુનિયા જળવાયુ પરિવર્તનની સમસ્યા સામે ઝઝુમી રહ્યું છે
• ઓક્સફોર્ડ યુનિ.ના સંશોધકોનો ચોંકાવનારો સર્વે સામે આવ્યો
• વર્ષ 2100 સુધીમાં 8 હજાર પ્રાણીઓ લુપ્ત થઇ શકે છે

Oxford University Research : આ સદીના અંત સુધીમાં ભારે ગરમી અને જમીનના ઉપયોગના પરિવર્તનના કારણે વિશ્વભરમાં લગભગ 8,000 પ્રાણીઓની પ્રજાતિઓ પર લુપ્ત થવાનું જોખમ છે. યુકેની ઓક્સફર્ડ યુનિવર્સિટીના સંશોધકોની આગેવાની હેઠળની એક આંતરરાષ્ટ્રીય ટીમે ઉભયજીવી, પક્ષીઓ, સસ્તન પ્રાણીઓ અને સરિસૃપની લગભગ 30,000 પ્રજાતિઓનો અભ્યાસ કર્યો હતો. ગ્લોબલ ચેન્જ બાયોલોજી જર્નલમાં પ્રકાશિત થયેલા આ અભ્યાસમાં જણાવાયું છે કે, ભારે ગરમી અને જમીનના ઉપયોગના પરિવર્તનને કારણે 2100 સુધીમાં 7,895 કરોડરજ્જુધારી પ્રાણીઓની પ્રજાતિઓ વૈશ્વિક લુપ્ત થવાનો સામનો કરી શકે છે.

ચોક્કસ ડેટા મેળવવામાં આવ્યો

દરેક પ્રજાતિ માટે સચોટ રહેઠાણના ડેટા ઇન્ટરનેશનલ યુનિયન ફોર કન્ઝર્વેશન ઓફ નેચર (ICUN) માંથી મેળવવામાં આવ્યો છે, અને ભવિષ્યની પ્રજાતિઓના પ્રકારોને લેન્ડ-યુઝ હાર્મોનાઇઝેશન 2 (LUH-2) પ્રોજેક્ટમાંથી મેપ કરવામાં આવ્યા હતા, જેનું સંચાલન યુનિવર્સિટી ઓફ મેરીલેન્ડ, યુએસએ દ્વારા કરવામાં આવે છે.

વિવિધ પગલાં લેવાની જરૂરિયાત

ઓક્સફર્ડ યુનિવર્સિટીના ભૂગોળ અને પર્યાવરણ શાળાના સંશોધક, ર્યુટ વાર્ડીએ જણાવ્યું હતું કે, "અમારો અભ્યાસ અનેક જોખમોના સંભવિત પ્રભાવોને એક સાથે ધ્યાનમાં લેવાના મહત્વ પર ભાર મૂકે છે, જેથી તેમની સંભવિત અસરોનું વધુ સારી રીતે મૂલ્યાંકન કરી શકાય. આ નોંધપાત્ર જૈવવિવિધતાના નુકસાનને રોકવા માટે વિશ્વભરમાં વિવિધ પગલાં લેવાની જરૂરિયાત પર વધુ ભાર મૂકે છે."

સારી અને ખરાબ બંને સંભાવનાઓનો ઉલ્લેખ

અભ્યાસમાં ચાર પાસાઓને ધ્યાનમાં લેવામાં આવ્યા હતા. સૌથી ગંભીર પરિસ્થિતિમાં, પ્રજાતિઓ તેમની શ્રેણીના 52 ટકા નુકશાનનો સામનો કરી શકે છે. જો કે, સારી પરિસ્થિતિઓમાં ફક્ત 10 ટકા પ્રજાતિઓ જ નુકશાનથી પ્રભાવિત થશે.

મુખ્ય ફેરફારોની આગાહી

આબોહવા અને જમીન-ઉપયોગમાં ફેરફારની સંયુક્ત અસરો ખાસ કરીને સાહેલ (દા.ત., સુદાન, ચાડ અને નાઇજર), મધ્ય પૂર્વ અને બ્રાઝિલ જેવા પ્રદેશોમાં ગંભીર રહેવાનો અંદાજ છે. સંશોધકોએ જણાવ્યું હતું કે, આ પરિણામો અગાઉના અભ્યાસો સાથે સુસંગત છે, જે દર્શાવે છે કે, ભવિષ્યના સંદર્ભે જમીનનો ઉપયોગ સૌથી મોટા ફેરફારોનો અનુભવ કરશે, જે આબોહવા પરિવર્તનને ઘટાડવા, અને અનુકૂલન કરવામાં નોંધપાત્ર પડકારો ઉભા કરશે.

અભ્યાસ અનેક રીતે ઉપયોગી

સંશોધકોએ જણાવ્યું હતું કે, આ અભ્યાસ નીતિ નિર્માણને સંકેત આપી શકે છે, અને ભવિષ્યના પર્યાવરણીય ફેરફારો વૈશ્વિક જૈવવિવિધતાને કેવી રીતે ગંભીર રીતે બદલી શકે છે, તે દર્શાવી શકે છે. અભ્યાસ પરસ્પર જોડાયેલા જોખમોને ઓળખવા અને તેને ઘટાડવાના મહત્વ પર પણ ભાર મૂકે છે.

આ પણ વાંચો -------  અમેરિકાનો દબાવ બેઅસર, રશિયા જોડેથી ઓઇલ ખરીદીમાં ભારતની હિસ્સેદારી વધી