Pakistan airstrike in Afghanistan: પાકિસ્તાન-અફઘાનિસ્તાન વચ્ચે વધતો તણાવ
કરાચી શહેરમાં તાજેતરમાં થયેલા આતંકવાદી હુમલા બાદ બંને પડોશી દેશો વચ્ચે રાજદ્વારી અને સૈન્ય ગતિરોધ ચરમસીમાએ પહોંચ્યો છે. પાકિસ્તાન સરકારે આ આતંકી ઘટના માટે અફઘાનિસ્તાનની ધરતીનો ઉપયોગ થયો હોવાનો આક્ષેપ કર્યો હતો. આ વિવાદના બદલામાં પાકિસ્તાની વાયુસેનાએ સરહદ પાર કરીને રાત્રિના અંધારામાં ઓપરેશન હાથ ધર્યું હતું. આ સૈન્ય એક્શનના કારણે બંને દેશો વચ્ચે યુદ્ધ જેવી સ્થિતિ સર્જાઈ ગઈ છે અને આંતરરાષ્ટ્રીય સ્તરે પણ ચિંતા વધી છે.
Pakistan airstrike in Afghanistan: નાગરિકોના રહેણાંક વિસ્તારો પર હુમલો
સ્થાનિક ન્યૂઝ ચેનલના અહેવાલો મુજબ પાકિસ્તાની સેનાએ કોઈ સૈન્ય ઠેકાણાના બદલે અફઘાનિસ્તાનના પાકતિકા પ્રાંતના ગયાન જિલ્લા અને પાકતિયા પ્રાંતના સમકાની જિલ્લાના રહેણાંક વિસ્તારો પર બોમ્બમારો કર્યો હતો. પ્રત્યક્ષદર્શીઓના જણાવ્યા અનુસાર આ બોમ્બમારો એટલો ભયાનક હતો કે, અનેક પાકા મકાનો કાટમાળમાં ફેરવાઈ ગયા હતા. આ હવાઈ હુમલામાં માર્યા ગયેલા તમામ 35 લોકો સ્થાનિકો હતા. તેમાં કોઈ પણ સૈનિક કે આતંકવાદી સામેલ નહોતો. પાકિસ્તાની વાયુસેનાએ કુનાર પ્રાંતના પણ કેટલાક સરહદી ગામો પર ભારે શેલિંગ કર્યું હોવાના અહેવાલો મળી રહ્યા છે.
રેસ્ક્યુ ટીમ પર થયો બીજો હવાઈ હુમલો
પાકતિયા પોલીસ કમાન્ડના પ્રવક્તા મુનીબ જાદરાને આ સૈન્ય અત્યાચારની સત્તાવાર પુષ્ટિ કરી છે. સમકાની જિલ્લાના માંડોખેલ વિસ્તારમાં બિસ્મિલ્લાહ જાન નામના સામાન્ય નાગરિકના ઘર પર પાકિસ્તાની જેટે પ્રથમ બોમ્બ ફેંક્યો હતો. આ વિસ્ફોટ બાદ આસપાસના ગ્રામીણ લોકો કાટમાળ નીચે દબાયેલા ભોગ બનેલા પરિવારોને બચાવવા માટે ઘટનાસ્થળે દોડી આવ્યા હતા. સ્થાનિક લોકો બચાવ કામગીરી કરી રહ્યા હતા. તે જ સમયે પાકિસ્તાની જેટે તે જ જગ્યા પર બીજો મોટો હુમલો કર્યો હતો. આ બીજા હુમલાના લીધે મદદ માટે પહોંચેલા લોકો પણ મોટી સંખ્યામાં મોતને ભેટ્યા હતા.
હોસ્પિટલ પ્રશાસનનો ખુલાસો અને આંતરરાષ્ટ્રીય પ્રતિક્રિયા
સમકાની જિલ્લાના હેલ્થ સેન્ટરના તબીબો અને સારવાર લઈ રહેલા ઘાયલોએ મીડિયા સમક્ષ ચોંકાવનારા ખુલાસા કર્યા છે. હોસ્પિટલ પ્રશાસનના મતે સારવાર માટે લાવવામાં આવેલા તમામ લોકો સામાન્ય મજૂરો અને ગ્રામજનો છે. આ વિસ્તારોની આસપાસ કોઈ તાલિબાન સૈનિક કે સૈન્ય છાવણી ઉપલબ્ધ નહોતી છતાં પાકિસ્તાને જાણીજોઈને નાગરિકોને નિશાન બનાવ્યા છે. અફઘાનિસ્તાન સરકારે આ હુમલાની આકરા શબ્દોમાં નિંદા કરીને તેને આંતરરાષ્ટ્રીય નિયમોનું ઉલ્લંઘન ગણાવ્યું છે. જોકે પાકિસ્તાન સરકાર કે તેની સેનાએ હજુ સુધી આ સૈન્ય કાર્યવાહી અંગે કોઈ સત્તાવાર નિવેદન જાહેર કર્યું નથી.
આ પણ વાંચો---- Trump Tariff Warning : ફરી શરૂ ટ્રમ્પની દાદાગીરી! આ દેશો પર 100% ટેરિફ લગાવવાની આપી ધમકી
