બિશ્કેકમાં 26મી SCO સમિટ: આતંકવાદ પર ભારતનું અત્યંત આક્રમક વલણ
કિર્ગિસ્તાનના રાષ્ટ્રપતિ સદિર જાપારોવની અધ્યક્ષતામાં યોજાયેલી આ ઐતિહાસિક બેઠકમાં વડાપ્રધાન નરેન્દ્ર મોદીએ સમગ્ર વિશ્વનું ધ્યાન આતંકવાદના ગંભીર પડકાર તરફ દોર્યું હતું. તેમણે જણાવ્યું કે આતંકવાદ માત્ર કોઈ એક પ્રદેશ માટે નહીં, પરંતુ સમગ્ર માનવજાત સામેનો સૌથી મોટો ખતરો છે.
શહબાઝ શરીફની ઉપસ્થિતિમાં આતંકવાદના આખા તંત્રને ખતમ કરવાનો આહ્વાન
પાકિસ્તાની વડાપ્રધાનની સીધી ઉપસ્થિતિ વચ્ચે પીએમ મોદીએ આતંકવાદ વિરુદ્ધ લડાઈની નવી વ્યાખ્યા આપી હતી. તેમણે સ્પષ્ટ કર્યું કે આ લડાઈ માત્ર આતંકવાદીઓ સુધી સીમિત ન રહેવી જોઈએ:
આતંકીઓની ભરતી રોકવી.
ટેરર ફંડિંગ પર પૂર્ણ પ્રતિબંધ મૂકવો.
કટ્ટરપંથી વિચારધારા સામે વૈશ્વિક જાગૃતિ લાવવી.
આતંકીઓને મળતા સેફ હેવન્સ (સુરક્ષિત ઠેકાણાં) ને જડમૂળથી ઉખેડી ફેંકવા.
બેવડા માપદંડો સામે ખુલ્લો વિરોધ અને સ્ટ્રેટેજિક એસેટનો પ્રહાર
પીએમ મોદીએ આંતરરાષ્ટ્રીય સમુદાયને બેવડા માપદંડો છોડવા આહ્વાન કરતાં કહ્યું કે જે દેશો આતંકવાદને પોતાની નીતિઓના હથિયાર તરીકે વાપરે છે, તેમને સ્પષ્ટ સંદેશ મળવો જોઈએ કે ટેરરિઝમ ક્યારેય કોઈ દેશની વ્યૂહાત્મક મૂડી (Strategic Asset) બની શકે નહીં.
ભારતના મુખ્ય ત્રણ સ્તંભો: શાંતિ, કનેક્ટિવિટી અને તકો
ભારતના દ્રષ્ટિકોણને રજૂ કરતાં વડાપ્રધાને જણાવ્યું કે SCO માટે ભારતનું વિઝન ત્રણ મુખ્ય આધારસ્તંભો પર ટકેલું છે: શાંતિ અને સુરક્ષા, કનેક્ટિવિટી અને વિકાસની નવી તકો. અફઘાનિસ્તાનમાં સ્થિરતા યુરેશિયાના ભવિષ્ય માટે અત્યંત જરૂરી છે અને ભારત ત્યાં માનવીય સહાય આપવાનું ચાલુ રાખશે.
પશ્ચિમ એશિયા સંકટ, સપ્લાય ચેઈન અને ગ્લોબલ સાઉથ પર અસર
પશ્ચિમ એશિયા અને વૈશ્વિક સંઘર્ષોનો ઉલ્લેખ કરતાં પીએમ મોદીએ સમજાવ્યું કે કોઈ એક વિસ્તારનું યુદ્ધ વૈશ્વિક ઉર્જા સુરક્ષા, દરિયાઈ વેપાર અને સપ્લાય ચેઇનને વેરવિખેર કરી નાખે છે. તેનો સૌથી મોટો આર્થિક બોજ ગ્લોબલ સાઉથના વિકાસશીલ દેશો પર પડે છે. તેમણે પુનરોચ્ચાર કર્યો કે કોઈપણ વિવાદનો ઉકેલ યુદ્ધના મેદાનમાં નહીં, પરંતુ માત્ર સંવાદ અને કૂટનીતિ દ્વારા જ લાવી શકાય છે.
ડ્રગ્સ તસ્કરી અને સંગઠિત અપરાધ સામે વ્યવહારુ પગલાંની માંગ
યુવા પેઢીના ભવિષ્યને સુરક્ષિત કરવા માટે નશીલા પદાર્થોની તસ્કરીને મોટો ખતરો ગણાવવામાં આવ્યો હતો. SCO ની એજન્સીઓ માત્ર ઔપચારિક બેઠકો પૂરતી મર્યાદિત ન રહેતાં, સમયસર સંયુક્ત ઓપરેશન હાથ ધરે તેવી માંગ ભારતે મૂકી છે.
વૈશ્વિક અર્થતંત્રમાં SCO ની તાકાત અને 'SCO Plus' ફોર્મેટનો વિસ્તાર
SCO સંગઠનની સ્થાપનાના ૨૫ વર્ષ પૂર્ણ થવાના અવસરે આ બેઠક યોજાઈ રહી છે. વર્ષ 2017થી ભારત આ સંગઠનનું પૂર્ણ સભ્ય છે. વર્તમાન સમયમાં આ સંગઠન વિશ્વની કુલ જીડીપીનો આશરે ૨૫ ટકા હિસ્સો ધરાવે છે.
25 વર્ષની સફર અને સામાન્ય લોકો સુધી સીધો ફાયદો પહોંચાડવાનો સંકલ્પ
પીએમ મોદીએ ભારપૂર્વક જણાવ્યું કે SCO ની સાચી સફળતા સરહદોથી આગળ વધીને સામાન્ય નાગરિકો સુધી પહોંચવી જોઈએ. આ સંગઠન યુવાનો માટે નવી રોજગારી, વેપારીઓ માટે વૈશ્વિક બજારો અને ખેડૂતો માટે આધુનિક કૃષિ ટેકનોલોજી લાવવાનું માધ્યમ બનવું જોઈએ.
વિશ્વના દિગ્ગજ નેતાઓની ઉપસ્થિતિ અને સંયુક્ત રાષ્ટ્રની ભાગીદારી
આ સમિટમાં રશિયાના રાષ્ટ્રપતિ વ્લાદિમીર પુતિન, ચીનના રાષ્ટ્રપતિ શી જિનપિંગ, ઈરાનના રાષ્ટ્રપતિ મસૂદ પેઝેશ્કિયાન સહિત ૧૦ સભ્ય દેશોના વડાઓ ઉપસ્થિત રહ્યા હતા. વિસ્તૃત 'SCO Plus' બેઠકમાં તુર્કી, અઝરબૈજાન અને આર્મેનિયાના રાષ્ટ્રાધ્યક્ષો તેમજ સંયુક્ત રાષ્ટ્ર (UN) ના મહાસચિવ એન્ટોનિયો ગુટેરેસ પણ જોડાયા હતા.
આ પણ વાંચો : India GDP Growth : વિદેશમાં લગ્ન અને બિનજરૂરી સોનું ખરીદવા પર કેમ રોક લગાવવા માંગે છે પીએમ મોદી? જાણો 7.8% જીડીપીનું ગણિત
