• ઓસ્ટ્રેલિયાના એક મહિલા મુસ્લિમ સાંસદે પોતાના સાથીદાર પર ગંભીર આરોપ લગાવ્યા
• દારૂ પીવા અને ટેબલ પર નાચવા માટે કહેવામાં આવ્યું
• સંસદમાં ફરી જાતીય સતામણીનો કેસ
• ફાતિમા પેયમેનના ગંભીર આરોપો
• ઉચ્ચ સંસ્થામાં પણ મહિલાઓ અસુરક્ષિત!

Fatima Payman : ઓસ્ટ્રેલિયન સંસદમાં ફરી એકવાર અયોગ્ય વર્તન અને જાતીય સતામણીનો મામલો સામે આવ્યો છે. એક મહિલા મુસ્લિમ સાંસદે તેમના એક પુરુષ સાથીદાર પર ગંભીર આરોપ લગાવ્યા છે. તેમનું કહેવું છે કે એક કાર્યક્રમ દરમિયાન તેમને દારૂ પીવાનું કહેવામાં આવ્યું હતું. સાથે જ તેમની સાથે અયોગ્ય વાતો પણ કહેવામાં આવી હતી. આ ઘટનાએ સંસદીય વાતાવરણ અને કાર્યસ્થળની સંસ્કૃતિ પર ફરી એકવાર સવાલો ઉભા કર્યા છે. આ ઘટના દર્શાવે છે કે સંસદ જેવી ઉચ્ચ સંસ્થામાં પણ મહિલાઓની સુરક્ષા અને સન્માનનો પ્રશ્ન હજુ અકબંધ છે.

સેનેટર ફાતિમા પેયમેનની ફરિયાદ

ઓસ્ટ્રેલિયન સેનેટર ફાતિમા પેયમેને બુધવાર, 28 મે 2025ના રોજ, સંસદીય સમિતિમાં ઔપચારિક ફરિયાદ નોંધાવી છે. તેમણે આરોપ લગાવ્યો છે કે એક કાર્યક્રમ દરમિયાન તેમના એક પુરુષ સાથીદારે અયોગ્ય વર્તન કર્યું હતું. ફાતિમા પેયમેનનું કહેવું છે કે આ સાથીદારે ખૂબ ડ્રિંક કર્યું હતું, ત્યારબાદ તેણે, તેમને દારૂ પીવા અને ટેબલ પર નાચવા માટે કહ્યું હતું. પેયમેને સ્પષ્ટ કર્યું કે તેઓ દારૂનું સેવન કરતા નથી, અને આવી ટિપ્પણીઓએ તેમને અસ્વસ્થ કર્યા હતા. તેમણે જણાવ્યું, “સાથીદારે કહ્યું, ‘ચાલો, તમને થોડો દારૂ આપીએ અને તમને ટેબલ પર નાચતા જોઈએ.’ આ બાબતે મેં તેમને સ્પષ્ટ શબ્દોમાં કહ્યું કે દરેક વસ્તુની એક મર્યાદા હોય છે, અને તે પછી મેં ફરિયાદ નોંધાવવાનો નિર્ણય લીધો.” આ ઘટના ક્યારે બની અને આરોપી સાથીદાર કોણ હતો તે અંગે હજુ સુધી કોઈ સ્પષ્ટ માહિતી સામે આવી નથી.

સંસદમાં અગાઉની ઘટનાઓ

ઓસ્ટ્રેલિયન સંસદમાં આ પ્રકારની ઘટનાઓ નવી નથી. 2021માં ભૂતપૂર્વ રાજકીય કર્મચારી બ્રિટ્ટેની હિગિન્સે આરોપ લગાવ્યો હતો કે સંસદીય કાર્યાલયમાં તેમના એક સાથીદારે તેમના પર દુષ્કર્મ કર્યો હતો. આ ઘટનાએ દેશભરમાં વ્યાપક ચર્ચા જગાવી હતી. ત્યારબાદની એક સમીક્ષામાં જાણવા મળ્યું હતું કે ઓસ્ટ્રેલિયન સંસદમાં અતિશય દારૂનું સેવન, હેરાનગતિ અને જાતીય સતામણી જેવી સમસ્યાઓ સામાન્ય બની ગઈ છે. આવી ઘટનાઓએ સંસદની કાર્યસંસ્કૃતિ પર પ્રશ્નો ઉભા કર્યા છે અને સુધારણાની જરૂરિયાત દર્શાવી છે.

સંસદીય કાર્યસ્થળ પર સુધારણાની જરૂર

ફાતિમા પેયમેનની ફરિયાદે સંસદમાં મહિલાઓની સુરક્ષા અને સન્માનના મુદ્દાને ફરી એકવાર ચર્ચામાં લાવ્યો છે. આ ઘટના દર્શાવે છે કે ઉચ્ચ સ્તરની સંસ્થાઓમાં પણ વ્યાવસાયિક વર્તન અને સમાવેશી વાતાવરણની ખાતરી કરવા માટે વધુ કડક પગલાં લેવાની જરૂર છે. આવી ઘટનાઓ સંસદની પ્રતિષ્ઠા પર પણ આંચ આણે છે અને જાહેર વિશ્વાસને અસર કરે છે.

સેનેટર ફાતિમા પેયમેનના આરોપોએ ઓસ્ટ્રેલિયન સંસદમાં કાર્યસ્થળની સંસ્કૃતિ અને મહિલાઓની સુરક્ષા અંગે ગંભીર ચિંતાઓ ઉભી કરી છે. આ ઘટના અને અગાઉના મામલાઓ દર્શાવે છે કે સંસદમાં વધુ પારદર્શક અને સુરક્ષિત વાતાવરણ નિર્માણ માટે નક્કર પગલાં લેવાની જરૂર છે. આવા મુદ્દાઓનો ઝડપથી અને ન્યાયી રીતે તપાસ  થવી જોઈએ, જેથી ભવિષ્યમાં આવી ઘટનાઓ ન બને.

આ પણ વાંચો :  લિવરપૂલ પરેડ દરમિયાન કાર ચાલકે અનેક લોકોને કચડ્યા, 47 લોકો ઇજાગ્રસ્ત