• પાકિસ્તાનના કરાચીમાં Sindhi Culture Day ની રેલી હિંસામાં ફેરવાઈ
• રેલી દરમિયાન અથડામણ, સિંધ–પંજાબ તણાવ ફરી સપાટી પર
• શાંતિપૂર્ણ રેલીમાં ગોળીબાર અને લાઠીચાર્જ, વીડિયો વાયરલ

Sindhi Culture Day : પાકિસ્તાનના કરાચી શહેરમાં રવિવારે સિંધી સંસ્કૃતિ દિવસની ઉજવણી દરમિયાન યોજાયેલી શાંતિપૂર્ણ રેલી અચાનક હિંસક અથડામણમાં ફેરવાઈ ગઈ. પોલીસે નિર્ધારિત માર્ગ બદલવાના આદેશ સાથે બળનો ઉપયોગ કર્યો, જેના કારણે સિંધ અને પંજાબ પ્રાંતો વચ્ચેના વર્ષો જૂના રાજકીય અને આર્થિક તણાવ ફરી સપાટી પર આવ્યા છે. સમગ્ર ઘટના કરાચીના વ્યસ્ત શરિયા ફૈઝલ વિસ્તારમાં બની. પાકિસ્તાની ચેનલના અહેવાલ મુજબ, અથડામણ ત્યારે શરૂ થઈ જ્યારે પોલીસે અચાનક પ્રદર્શનકારીઓને તેમનો નિર્ધારિત રેલી માર્ગ બદલવા માટે કહ્યું. આ નિર્દેશથી રેલીમાં ભાગ લેનારા લોકો ગુસ્સે થયા અને વિરોધ શરૂ થયો.

શું કહે છે પોલીસ અને પ્રદર્શનકારીઓ?

પોલીસનો આરોપ છે કે દલીલો ઉગ્ર બનતાં, રેલીમાં સામેલ કેટલાક લોકોએ પોલીસ પર પથ્થરમારો કર્યો, જેના કારણે પોલીસની પેટ્રોલ વાન અને પાણીના ટેન્કરની બારીઓને નુકસાન થયું. પરિસ્થિતિ કાબૂ બહાર જતી જોઈને, પોલીસે ભીડને વિખેરવા માટે લાઠીચાર્જ, હવામાં ગોળીબાર કર્યો અને અનેક પ્રદર્શનકારીઓની અટકાયત કરી. આ અંધાધૂંધીને કારણે શહેરમાં ટ્રાફિક પણ નોંધપાત્ર સમય માટે ખોરવાઈ ગયો હતો. ઘટનાના ઘણા વીડિયો સોશિયલ મીડિયા પર ઝડપથી વાયરલ થયા છે, જેમાં પોલીસની કઠોર કાર્યવાહીની સખત ટીકા કરવામાં આવી રહી છે.

પ્રદર્શનકારીઓના આરોપ છે કે તેઓ અન્ય વિરોધ પ્રદર્શનોની જેમ શાંતિપૂર્ણ રીતે તેમની સંસ્કૃતિનું પ્રદર્શન કરી રહ્યા હતા, પરંતુ પોલીસે અચાનક દુર્વ્યવહાર કર્યો, અપશબ્દોનો ઉપયોગ કર્યો અને ગોળીઓ પણ ચલાવી. તેમનું કહેવું છે કે પોલીસની આ અચાનક અને કઠોર કાર્યવાહીએ શાંતિપૂર્ણ વાતાવરણને હિંસક બનાવ્યું. આ ઘટનાએ સિંધની જનતામાં પોલીસ અને કેન્દ્રીય સત્તા વિરુદ્ધના રોષને વધુ વેગ આપ્યો છે.

સિંધી સંસ્કૃતિ દિવસ

ડિસેમ્બરના પહેલા રવિવારે દર વર્ષે ઉજવાતો સિંધી સંસ્કૃતિ દિવસ સિંધી સંસ્કૃતિમાં રહેલી સહિષ્ણુતા, શાંતિ અને રાષ્ટ્રીય એકતાની ભાવનાને ઉજાગર કરે છે. પાકિસ્તાનના રાષ્ટ્રપતિ આસિફ અલી ઝરદારીએ આ દિવસે યાદ અપાવ્યું હતું કે સ્વતંત્રતા સમયે, સિંધ પાકિસ્તાન બનાવવાનો ઠરાવ પસાર કરનાર પ્રથમ પ્રાંત હતો. આ યાદ અપાવે છે કે સિંધે પાકિસ્તાનની રચનામાં કેવી મહત્વપૂર્ણ ભૂમિકા ભજવી હતી. જોકે, આ ઉજવણીની પાછળ સિંધ અને પાકિસ્તાનના સૌથી મોટા પ્રાંત પંજાબ વચ્ચેના દાયકાઓ જૂના ઊંડા રાજકીય અને આર્થિક તણાવ છુપાયેલા છે.

પંજાબનું વર્ચસ્વ અને પ્રાંતીય તણાવના મૂળ

પાકિસ્તાનની રચના થઈ ત્યારથી, પંજાબ પ્રાંત દેશના રાજકારણ અને અર્થતંત્ર પર પ્રભુત્વ ધરાવે છે, જેના કારણે અન્ય પ્રાંતોમાં અસંતોષની લાગણી જન્મે છે. આ વર્ચસ્વનું મુખ્ય કારણ પાકિસ્તાનના કુલ સ્થાનિક ઉત્પાદન (GDP) માં પંજાબનું નોંધપાત્ર યોગદાન છે. સિંધ અને અન્ય પ્રાંતો સતત આર્થિક સંસાધનોની અસમાન વહેંચણીનો મુદ્દો ઉઠાવે છે. આ તણાવનું સૌથી સંવેદનશીલ પાસું સિંધુ નદીના પાણીની વહેંચણીને લઈને છે. ચોલિસ્તાન કેનાલ પ્રોજેક્ટ જેવા પ્રોજેક્ટ્સે સિંધ પ્રાંતમાં વ્યાપક વિરોધ પ્રદર્શનોને વેગ આપ્યો છે. સિંધીઓને હંમેશા ડર રહ્યો છે કે પંજાબ તરફ પાણી વાળવાથી તેમના પ્રાંતમાં દુષ્કાળ અને કૃષિને મોટું નુકસાન થશે, જે સિંધની આર્થિક કરોડરજ્જુ છે.

આ પણ વાંચો :   પાકિસ્તાની મહિલાએ 'ન્યાય' માટે ભારતના વડાપ્રધાન જોડે મદદ માંગી