આગામી ૩0 દિવસમાં સ્ટ્રેટ ઓફ હોર્મુઝ ખોલવાની સત્તાવાર જાહેરાત
બગદાદમાં ઇરાકી વિદેશ મંત્રી ફુઆદ હુસૈન સાથે યોજાયેલી એક સંયુક્ત પત્રકાર પરિષદમાં ઇરાનના વિદેશ મંત્રી અબ્બાસ અરાઘચીએ આ ઐતિહાસિક નિર્ણયની જાહેરાત કરી હતી. ઇરાને સ્પષ્ટ કર્યું છે કે તેઓ સ્ટ્રેટ ઓફ હોર્મુઝ પરથી તમામ પ્રકારના સૈન્ય અને ભૌતિક અવરોધો હટાવી લેશે. જો કે, આ વ્યૂહાત્મક દરિયાઈ માર્ગનું સંપૂર્ણ સંચાલન અને વ્યવસ્થાપન ઇરાન દ્વારા નક્કી કરાયેલા નિયમો અનુસાર જ હાથ ધરવામાં આવશે.
વૈશ્વિક અર્થતંત્ર અને ઊર્જા સુરક્ષા માટે મહત્વપૂર્ણ સમાચાર
આ નિર્ણય વૈશ્વિક અર્થતંત્ર અને ઊર્જા સુરક્ષા માટે અત્યંત મહત્વપૂર્ણ માનવામાં આવે છે, કારણ કે વિશ્વનો એક તૃતીયાંશ દરિયાઈ ક્રૂડ ઓઇલ સપ્લાય આ સાંકડા માર્ગ પરથી પસાર થાય છે . અરાઘચીએ જણાવ્યું હતું કે, "આ આખી વ્યવસ્થાને લાગુ કરવા માટેની પ્રક્રિયાઓ શરૂ કરી દેવામાં આવી છે. આની સંપૂર્ણ જવાબદારી માત્ર ઇસ્લામિક રિપબ્લિક ઓફ ઇરાનની છે અને ઇરાન-અમેરિકા ડીલ હેઠળ અન્ય કોઈ સંસ્થા કે દેશ આમાં હસ્તક્ષેપ કરી શકશે નહીં ."
હોર્મુઝના મેનેજમેન્ટમાં બાહ્ય હસ્તક્ષેપ પર ઇરાનની કડક ચેતવણી
ઇરાની વિદેશ મંત્રીએ સ્ટ્રેટ ઓફ હોર્મુઝના સંચાલનમાં પશ્ચિમી દેશો અથવા કોઈપણ બાહ્ય સંગઠનોની દખલગીરી સામે સખત આક્રોશ વ્યક્ત કર્યો હતો. તેમણે ચેતવણી આપી હતી કે જો કોઈપણ પક્ષ આ પ્રક્રિયામાં અવરોધ ઊભો કરવાનો પ્રયાસ કરશે, તો આ મહત્વપૂર્ણ આંતરરાષ્ટ્રીય જળમાર્ગ ખોલવામાં વધુ વિલંબ થશે, જેનાથી સમગ્ર ગલ્ફ ક્ષેત્રમાં યુદ્ધની સ્થિતિ વધુ વણસી શકે છે.
અમેરિકા સાથે થયેલા MoU નું પાલન થવુ જોઈએ
છેલ્લા કેટલાક દિવસોમાં હોર્મુઝની આસપાસ બનેલી સૈન્ય ઘટનાઓનો ઉલ્લેખ કરતા ઇરાને તમામ હિતધારકોને અપીલ કરી છે કે તેઓ ઇરાન દ્વારા કરવામાં આવી રહેલી સુરક્ષા વ્યવસ્થાઓને માન આપે. તેમણે ભારપૂર્વક જણાવ્યું હતું કે અમેરિકા સાથે હસ્તાક્ષર કરાયેલા સમજૂતી પત્ર (MoU) નું અક્ષરશઃ પાલન થવું જોઈએ અને કોઈએ પણ આ નિર્ધારિત શાંતિ પ્રક્રિયાના માર્ગમાંથી ભટકવું જોઈએ નહીં.
લેબનોનમાં ઇઝરાયેલી હુમલા રોકવાની અમેરિકાની જવાબદારી
આ સંયુક્ત પ્રેસ કોન્ફરન્સ દરમિયાન ઇરાને લેબનોન પર થઈ રહેલા ઇઝરાયેલી સૈન્ય હુમલાઓનો મુદ્દો પણ આક્રમક રીતે ઉઠાવ્યો હતો . અરાઘચીએ ખુલાસો કર્યો હતો કે ઇરાન અને અમેરિકા વચ્ચે થયેલા કરારની કલમ 1 મુજબ, લેબનોન સહિતના તમામ મોરચે યુદ્ધવિરામ તાત્કાલિક લાગુ થવો અનિવાર્ય છે. તેમણે ખેદ વ્યક્ત કર્યો હતો કે આંતરરાષ્ટ્રીય દબાણ છતાં ઇઝરાયેલ સરકાર પોતાના હુમલાઓ ચાલુ રાખી રહી છે. ઇરાનનું માનવું છે કે કરાર મુજબ વાશિંગ્ટનની એ કાનૂની જવાબદારી છે કે તે ઇઝરાયેલને રોકે અને કબ્જે કરેલા વિસ્તારોમાંથી તેની સેના પાછી ખેંચે.
ખાડી દેશોનું નવું સિક્યોરિટી આર્કિટેક્ચર
વધુમાં, ગલ્ફ પ્રદેશની લાંબાગાળાની સુરક્ષા અંગે વાત કરતા ઇરાને એક નવા સુરક્ષા માળખાની જરૂરિયાત પર ભાર મૂક્યો હતો. ઇરાને ઇરાકી વિદેશ મંત્રીના '6 +2 ફોર્મેટ' ના પ્રસ્તાવને આવકાર્યો છે, જેમાં ખાડી સહયોગ પરિષદ (GCC) ના દેશો, ઇરાન અને ઇરાક વચ્ચે સીધી વાતચીત શરૂ કરવાની જોગવાઈ છે. ઇરાનનું સ્પષ્ટ માનવું છે કે આ પ્રદેશની સુરક્ષા માત્ર સ્થાનિક દેશોના સમન્વયથી જ સંભવ છે અને તેમાં કોઈપણ બાહ્ય સત્તાની હાજરી કાયમી શાંતિ માટે અવરોધરૂપ છે.
આ પણ વાંચો : PM Modi Seychelles Visit: પીએમ મોદીના 'ગ્રીન વિઝન' ને વિશ્વનું સલામ, સેશેલ્સે સર્વોચ્ચ એવોર્ડ 'ગાર્ડિયન ઓફ ધ બ્લુ હોરાઈઝન' એનાયત
