યુક્રેન દ્વારા અત્યંત આક્રમક હવાઈ અભિયાન
યુક્રેનની સેનાએ મોસ્કોના સૈન્ય અને ઉર્જા માળખાને નષ્ટ કરવા માટે એક નવું અને અત્યંત આક્રમક હવાઈ અભિયાન શરૂ કર્યું છે. આ ઓપરેશન હેઠળ યુક્રેન હવે પહેલા કરતાં વધુ લાંબી દૂરીના અને આધુનિક પશ્ચિમી હથિયારોનો ઉપયોગ કરી રહ્યું છે. યુક્રેનના જનરલ સ્ટાફે બુધવારે સત્તાવાર દાવો કર્યો હતો કે રાતોરાત ચલાવવામાં આવેલા એક ગુપ્ત ઓપરેશનમાં રશિયાના સંરક્ષણ અને ઉર્જા માળખાને અબજો ડોલરનું નુકસાન પહોંચાડવામાં આવ્યું છે.
વિશ્વના સૌથી મોટા ગેસ સંકુલમાં યુક્રેનનો ભયાનક હુમલો
યુક્રેનની વાયુસેના અનુસાર, આ હુમલાનું મુખ્ય લક્ષ્ય રશિયાનો પ્રખ્યાત ઓરેનબર્ગ ગેસ પ્રોસેસિંગ પ્લાન્ટ હતો. આ પ્લાન્ટ વિશ્વના સૌથી મોટા ગેસ સંકુલમાંનો એક ગણાય છે અને અહીં રશિયાનો એકમાત્ર હિલિયમ ઉત્પાદન પ્લાન્ટ આવેલો છે. નોંધનીય છે કે, ઓરેનબર્ગ પ્રદેશ યુક્રેનની સરહદથી અંદાજે 1200 કિલોમીટર દૂર સુરક્ષિત વિસ્તારમાં આવેલો છે. યુક્રેનિયન અધિકારીઓએ જણાવ્યું કે આ પ્લાન્ટમાં હિલિયમ અને ઇથેનનું મોટા પાયે ઉત્પાદન થાય છે, જેનો ઉપયોગ રશિયા દ્વારા રોકેટ એન્જિન, મિસાઇલ ગાઇડન્સ સિસ્ટમ, સોલિડ રોકેટ ફ્યુઅલ અને ગનપાઉડરના નિર્માણમાં કરવામાં આવતો હતો. હુમલા બાદ આ સમગ્ર પરિસરમાં ભીષણ આગ ફાટી નીકળી હતી.
વ્લાદિમીર મિલિટરી નેટવર્ક પર મોટી એર સ્ટ્રાઈક
ગેસ પ્લાન્ટ સિવાય યુક્રેને રશિયન સેનાની કમર તોડવા માટે તેના હાઈ-ટેક સેટેલાઇટ સંચાર કેન્દ્રોને પણ નિશાન બનાવ્યા છે. યુક્રેનિયન સૈન્ય એજન્સીઓના અહેવાલ મુજબ, મોસ્કોની તદ્દન નજીક આવેલા પ્રખ્યાત 'દુબના સ્પેસ કોમ્યુનિકેશન સેન્ટર' અને વ્લાદિમીર ક્ષેત્રના અન્ય એક વ્યૂહાત્મક સંચાર કેન્દ્ર પર આત્મઘાતી ડ્રોન વડે હુમલા કરવામાં આવ્યા છે.
રશિયન સૈન્ય કમાન્ડરો વચ્ચેનો સંપર્ક પ્રભાવિત
આ સ્પેસ સેન્ટરો રશિયન આર્મીના ગ્લોબલ કોમ્યુનિકેશન નેટવર્ક અને સેટેલાઇટ સર્વેલન્સ સિસ્ટમમાં મુખ્ય ભૂમિકા ભજવતા હતા. યુક્રેનનો દાવો છે કે આ હુમલા બાદ રશિયન સૈન્ય કમાન્ડરો વચ્ચેનો સંપર્ક પ્રભાવિત થયો છે. જોકે, રશિયાના સંરક્ષણ મંત્રાલયે હજુ સુધી આ નુકસાન અંગે કોઈ સત્તાવાર પુષ્ટિ આપી નથી અને તટસ્થ આંતરરાષ્ટ્રીય મીડિયા દ્વારા પણ આ નુકસાનીનું સ્વતંત્ર મૂલ્યાંકન કરવાનું બાકી છે.
સેવાસ્તોપોલમાં પાવર ગ્રીડ ઠપ્પ અને એરબેઝ પર મિસાઈલ સિસ્ટમ્સ સદંતર નષ્ટ
છેલ્લા કેટલાક અઠવાડિયાથી યુક્રેનની સેનાએ રશિયાના કબજા હેઠળના ક્રીમિયા દ્વીપકલ્પને પોતાના હુમલાનું મુખ્ય કેન્દ્ર બનાવ્યું છે. યુક્રેનનો મુખ્ય ઉદ્દેશ્ય ક્રીમિયામાં હાજર રશિયન સૈન્યની સપ્લાય લાઇનને કાપવાનો અને ત્યાંના ઉર્જા ગ્રીડને ધ્વસ્ત કરવાનો છે. ક્રીમિયાના સેવાસ્તોપોલ શહેરમાં રાતોરાત થયેલા ભયંકર ડ્રોન હુમલાના કારણે સમગ્ર લશ્કરી વિસ્તારમાં વીજ પુરવઠો સંપૂર્ણપણે ઠપ્પ થઈ ગયો હોવાના અહેવાલો છે.
રશિયન એર ડિફેન્સ મિસાઈલ સિસ્ટમ્સ સંપૂર્ણ પણે નષ્ટનો દાવો
બીજી તરફ, યુક્રેનની સુરક્ષા સેવા (SBU) એ દાવો કર્યો છે કે તેમણે ક્રીમિયામાં આવેલા રશિયાના બે સક્રિય સૈન્ય એરબેઝ પર લાંબી દૂરીની મિસાઈલો વડે હુમલો કરીને ત્યાં તૈનાત મોંઘી રશિયન એર ડિફેન્સ મિસાઈલ સિસ્ટમ્સને સંપૂર્ણપણે નષ્ટ કરી દીધી છે. રશિયાના સંરક્ષણ મંત્રાલયના જણાવ્યા મુજબ, તેમની એર ડિફેન્સ સિસ્ટમે રાત્રિ દરમિયાન 323 યુક્રેનિયન ડ્રોન તોડી પાડ્યા હતા, જ્યારે યુક્રેનિયન વાયુસેનાએ જણાવ્યું કે રશિયાએ પણ વળતા પ્રહારમાં 101 લાંબી દૂરીના કામિકાઝી ડ્રોન દાગ્યા હતા. આ આંકડાઓ સ્પષ્ટ સંકેત આપે છે કે વર્ષ 2026 માં પણ આ યુદ્ધ માત્ર સરહદી મોરચા સુધી મર્યાદિત નથી રહ્યું, પરંતુ બંને દેશો એકબીજાના આર્થિક અને ડિજિટલ માળખાને નષ્ટ કરવા માટે કોઈપણ હદ સુધી જવા તૈયાર છે.
આ પણ વાંચો : China Train Viral Video : ભારતની સરખામણીએ ચીનના ખૂબ વખાણ કરતા લોકો આ વીડિયો ખાસ જોજો!
