અમેરિકામાં રાષ્ટ્રપતિ ડોનાલ્ડ ટ્રમ્પના ઇમિગ્રેશન કાયદાને ન્યાયતંત્રનો જોરદાર આંચકો
અમેરિકન પ્રશાસનમાં રાષ્ટ્રપતિ પદ સંભાળતાની સાથે જ ઇમિગ્રેશનના નિયમો કડક કરવાના ડોનાલ્ડ ટ્રમ્પના મનસૂબા પર સુપ્રીમ કોર્ટે પાણી ફેરવી દીધું છે. સર્વોચ્ચ અદાલતે તેના મહત્વપૂર્ણ ચુકાદામાં બંધારણના 14મા સુધારાની પરંપરાગત વ્યાખ્યાને સંપૂર્ણપણે સાચી ઠેરવી છે. આ જૂના નિયમ અંતર્ગત અમેરિકી ધરતી પર જન્મ લેનારા લગભગ દરેક બાળકને જન્મજાત રીતે જ ત્યાંની નાગરિકતા મેળવવાનો કાનૂની અધિકાર મળે છે, પછી ભલે તેના માતા-પિતા કાનૂની રીતે ત્યાં રહેતા હોય કે ગેરકાનૂની રીતે.
પદભાર સંભાળ્યો તેના પહેલા દિવસે જ ઓર્ડર કર્યો હતો સાઈન
ડોનાલ્ડ ટ્રમ્પે વર્ષ 2025 ના જાન્યુઆરી મહિનામાં બીજી વખત વ્હાઇટ હાઉસની કમાન સંભાળ્યાના પહેલા જ દિવસે આ કડક આદેશ પર હસ્તાક્ષર કર્યા હતા. આ વહીવટી આદેશનો મુખ્ય ઉદ્દેશ્ય એવા બાળકોને જન્મસિદ્ધ નાગરિકતાથી વંચિત રાખવાનો હતો, જેમના માતા-પિતા અમેરિકામાં ગેરકાયદેસર રીતે વસવાટ કરે છે અથવા તો અભ્યાસ અને રોજગાર જેવા અસ્થાયી વિઝા પર ત્યાં આવેલા છે.
150 વર્ષ જૂની કાનૂની વ્યાખ્યા અકબંધ
આ સમગ્ર વિવાદ અમેરિકન બંધારણના 14મા સુધારાના ‘નાગરિકતા ક્લોઝ’ની આસપાસ કેન્દ્રિત હતો. આ કાયદામાં સ્પષ્ટ લખાણ છે કે, "યુનાઇટેડ સ્ટેટ્સમાં જન્મેલા અથવા કાનૂની પ્રક્રિયા દ્વારા નાગરિક બનેલા અને તેના અધિકારક્ષેત્રને આધીન તમામ વ્યક્તિઓ યુએસના સત્તાવાર નાગરિક છે." છેલ્લા 150 કરતાં વધુ વર્ષોથી આ નિયમનો સાર્વત્રિક અર્થ એ જ કાઢવામાં આવ્યો છે કે માતા-પિતાની કાનૂની સ્થિતિ ગમે તે હોય, યુએસની સરહદની અંદર જન્મ લેતા જ બાળકને ત્યાંનું નાગરિકત્વ મળી જાય છે. આમાં માત્ર વિદેશી રાજદૂતો અથવા દુશ્મન સેનાના બાળકો જેવા જૂજ અપવાદો જ સામેલ છે.
6-3ના ચુકાદાથી કોર્ટે નિર્ણય પર રોક લગાવી
પરંતુ ટ્રમ્પ સરકારની કાનૂની ટીમનો તર્ક હતો કે 'અધિકારક્ષેત્રને આધીન'શબ્દની વ્યાખ્યા મર્યાદિત હોવી જોઈએ. વ્હાઇટ હાઉસનું માનવું હતું કે આ દાયરામાંથી એવા બાળકોને બાકાત રાખવા જોઈએ જેમના વાલીઓ સ્ટુડન્ટ, વર્ક કે અન્ય કોઈ અસ્થાયી વિઝા પર યુએસમાં છે. જો કે, સુપ્રીમ કોર્ટના 6-3 ના બહુમતી ચુકાદાએ નીચલી અદાલતના તે આદેશને યથાવત રાખ્યો જેણે ટ્રમ્પના આ વહીવટી નિર્ણય પર રોક લગાવી હતી.
વાર્ષિક અઢી લાખ બાળકોના ભવિષ્યની સુરક્ષા
કાયદાના નિષ્ણાતોએ પણ અગાઉથી ચેતવણી આપી હતી કે જો ટ્રમ્પનો આ એક્ઝિક્યુટિવ ઓર્ડર કાનૂની રીતે માન્ય ગણાત, તો તેની અમેરિકાના સામાજિક માળખા પર ખૂબ જ ગંભીર અને નકારાત્મક અસરો થઈ હોત. એક સત્તાવાર અનુમાન મુજબ, દર વર્ષે અમેરિકામાં જન્મ લેતા અંદાજે 2,50,000 બાળકોનું ભવિષ્ય આ કાયદાને લીધે જોખમમાં મુકાઈ ગયું હોત. સાથોસાથ લાખો પરિવારોને પોતાના નવજાત શિશુઓની નાગરિકતા સાબિત કરવા માટે કાનૂની કચેરીઓના ધક્કા ખાવા પડ્યા હોત.
બંધારણીય મુલ્યોને પ્રાથમિક્તા આપી
આ ઐતિહાસિક કેસ ન્યૂ હેમ્પશાયરના કેટલાક પ્રવાસી વાલીઓ અને બાળકો દ્વારા દાખલ કરવામાં આવેલી અરજી બાદ સર્વોચ્ચ અદાલત સુધી પહોંચ્યો હતો. અદાલતે માનવ અધિકારો અને બંધારણીય મૂલ્યોને પ્રાથમિકતા આપીને ટ્રમ્પ સરકારની નીતિઓને મોટો ફટકો આપ્યો છે. વિપક્ષો અને પ્રવાસી સંગઠનો આ નિર્ણયને અમેરિકન લોકશાહી અને પ્રવાસીઓ માટે એક ઐતિહાસિક વિજય તરીકે જોઈ રહ્યા છે.
આ પણ વાંચો : Donald Trump Supreme Court : અમેરિકી સુપ્રીમ કોર્ટે રાષ્ટ્રપતિને આપી અત્યાર સુધીની સૌથી મોટી સત્તા, 91 વર્ષ જૂનો કાયદો પલટાયો
