US Iran peace talks : સ્વિટ્ઝર્લેન્ડમાં શાંતિ મંત્રણા પાટા પરથી ઉતરી, ઈરાનનો વોકઆઉટ

સ્વિટ્ઝર્લેન્ડમાં થઈ રહેલી શાંતિ વાર્તા અચાનક બંધ

મધ્ય પૂર્વમાં ચાલી રહેલા ભયાનક સૈન્ય સંઘર્ષને રોકવા માટે સ્વિટ્ઝર્લેન્ડની ધરતી પર શરૂ થયેલી શાંતિ વાર્તા રવિવારે અચાનક બંધ થઈ ગઈ છે. તસ્નીમ ન્યૂઝ એજન્સીએ ટોચના રાજદ્વારી સૂત્રોના હવાલાથી મોટો દાવો કર્યો છે કે, અમેરિકી રાષ્ટ્રપતિ ડોનાલ્ડ ટ્રમ્પના આકરા અને આક્રમક નિવેદનોના વિરોધમાં ઈરાની પક્ષે આ મંત્રણાનો બહિષ્કાર કર્યો હતો. ઈરાની પ્રતિનિધિઓએ ટ્રમ્પના વલણને સકારાત્મક વાતચીતના માહોલની વિરુદ્ધ ગણાવ્યું અને વિરોધ પ્રદર્શન કરતા તુરંત મીટિંગ હોલની બહાર નીકળી ગયા હતા.

ઈરાની પ્રતિનિધિમંડળના વરિષ્ઠ સભ્ય મેહદી ગોરબનઝાદેહે સરકારી મીડિયા સમક્ષ સત્તાવાર જાહેરાત કરી છે કે, "જ્યાં સુધી લેબનાનની વર્તમાન સ્થિતિનો યોગ્ય ઉકેલ નહીં આવે, ત્યાં સુધી અન્ય કોઈ પણ મુદ્દા પર અમેરિકા સાથે કોઈ વાતચીત થઈ શકે નહીં." તેમણે સ્પષ્ટ કર્યું કે લેબનાનમાં યુદ્ધવિરામ એ ઈરાન માટે પ્રાથમિક શરત છે.

ટ્રુથ સોશિયલ પર ટ્રમ્પની એન્ટ્રી અને ઈરાનને જોરદાર હુમલાની નવી ચેતવણી

આ આખી ઘટના ત્યારે બની જ્યારે સ્વિટ્ઝર્લેન્ડમાં પ્રથમ તબક્કાની શાંતિ મંત્રણા ચાલી રહી હતી. બરાબર તે જ સમયે અમેરિકી રાષ્ટ્રપતિ ડોનાલ્ડ ટ્રમ્પે પોતાના સોશિયલ મીડિયા પ્લેટફોર્મ 'ટ્રુથ સોશિયલ' (Truth Social) પર ઈરાનને સીધી ધમકી આપતી એક સનસનાટીપૂર્ણ પોસ્ટ શેર કરી હતી.

ટ્રમ્પે પોતાની પોસ્ટમાં કડક લહેજામાં લખ્યું, "ઈરાને લેબનાનમાં સક્રિય અને પોતાના ભારે ફંડિંગ વાળા તમામ પ્રોક્સી આતંકી સંગઠનોને તાત્કાલિક રોકવા પડશે. જો આવું કરવામાં નહીં આવે, તો અમે ઈરાન પર ફરી એકવાર બહુ મોટો સૈન્ય હુમલો કરીશું, જે ગયા અઠવાડિયે કરાયેલા હુમલા કરતાં પણ વધુ શક્તિશાળી અને વિનાશક હશે."

Strait of Hormuz પર અમેરિકી સેનાના નિયંત્રણનો દાવો

ટ્રમ્પનો આક્રોશ માત્ર સોશિયલ મીડિયા પોસ્ટ પૂરતો સીમિત ન રહ્યો. ફોક્સ ન્યૂઝ (Fox News) સાથે ટેલિફોનિક વાતચીત દરમિયાન ટ્રમ્પે ઈરાન દ્વારા વૈશ્વિક તેલ સપ્લાયના સૌથી વ્યસ્ત દરિયાઈ માર્ગ 'સ્ટ્રેટ ઓફ હોર્મુઝ' ને બંધ કરવાની ધમકી પર પણ આકરી પ્રતિક્રિયા આપી હતી.

ટ્રમ્પે ખુલ્લેઆમ જણાવ્યું કે, જો જરૂર પડશે તો અમેરિકી સશસ્ત્ર દળો આ વ્યૂહાત્મક દરિયાઈ માર્ગ પર પોતાનું સીધું લશ્કરી નિયંત્રણ સ્થાપિત કરી શકે છે. ટ્રમ્પના આ આંતરરાષ્ટ્રીય સ્તરના આક્રમક નિવેદનોએ જ ચાલુ મંત્રણામાં ઘી હોમવાનું કામ કર્યું હતું, જેના કારણે ઈરાને બેઠકમાંથી તાત્કાલિક વોકઆઉટ કરવાનો મોટો નિર્ણય લીધો.

ઈરાનનો આકરો પલટવાર: મોહમ્મદ બાઘેર ગાલિબાફની અમેરિકાને કડક સલાહ

અમેરિકી પ્રમુખ ડોનાલ્ડ ટ્રમ્પની આ ખુલ્લી સૈન્ય ધમકીના થોડી જ મિનિટો બાદ ઈરાની સંસદના અધ્યક્ષ અને વરિષ્ઠ નેતા મોહમ્મદ બાઘેર ગાલિબાફે અત્યંત તીખી પ્રતિક્રિયા આપી હતી. ગાલિબાફે ટ્રમ્પને પોતાની આંતરરાષ્ટ્રીય ભાષા પર નિયંત્રણ રાખવાની અને સાવચેતી વર્તવાની કડક સલાહ આપી હતી.

તેમણે ગર્જના કરતા કહ્યું કે, ઈરાનની સશસ્ત્ર સેનાઓ અને ઇસ્લામિક રિવોલ્યુશનરી ગાર્ડ્સ અમેરિકાની કોઈપણ પ્રકારની સૈન્ય ઉશ્કેરણી અથવા આક્રમક કાર્યવાહીનો જડબાતોડ જવાબ આપવા માટે સરહદ પર પૂરી રીતે સજ્જ છે. ગાલિબાફે વધુમાં ઉમેર્યું કે, "શું ટ્રમ્પને એ નથી સમજાતું કે જો તેમની આવી ધમકીઓની કોઈ અસર થતી હોત, તો અમેરિકા આજે આટલી હતાશાની સ્થિતિમાં ન હોત? અમે આવી પોકળ અમેરિકી ધમકીઓને કોઈ મહત્વ આપતા નથી." આ વૈશ્વિક તણાવના કારણે આંતરરાષ્ટ્રીય બજારમાં ક્રૂડ ઓઇલના ભાવમાં પણ અચાનક મોટો ઉછાળો જોવા મળી રહ્યો છે.

આ પણ વાંચો : Trump Warns Iran News : ટ્રમ્પે ઈરાનને આપી સીધી સૈન્ય હુમલાની ધમકી, વિશ્વભરમાં મચ્યો ખળભળાટ