અમેરિકાની રાજનીતિમાં ભારતીય મૂળની પિયા ડાંડિયાએ મોટી સફળતા મેળવી છે. મંગળવાર, 3 નવેમ્બર, 2026ના રોજ જાહેર થયેલા ચૂંટણી પરિણામો અનુસાર, ડેમોક્રેટિક પાર્ટીનાં ઉમેદવાર પિયા ડાંડિયાએ ફ્લોરિડાના 22મા કોંગ્રેસનલ ડિસ્ટ્રિક્ટની ચૂંટણીમાં વિજય મેળવ્યો છે. તેમણે રિપબ્લિકન પાર્ટીના ઉમેદવાર કેસી અસ્કરને હરાવ્યા છે. પિયાને 51.9 ટકા જ્યારે કેસી અસ્કરને 48.1 ટકા મત મળ્યા હતા. આ જીત સાથે પિયા અમેરિકાના પ્રતિનિધિ ગૃહમાં ચૂંટીને આવનારી બીજી ભારતીય-અમેરિકન મહિલા બન્યાં છે.
જયપુરથી અમેરિકા સુધીનો પરિવારનો પ્રવાસ
પિયા ડાંડિયાનો જન્મ અને ઉછેર અમેરિકાના ફ્લોરિડા રાજ્યના પામ બીચ કાઉન્ટીમાં થયો હતો. જોકે, તેઓ મૂળ ભારતના રાજસ્થાન સાથે જોડાયેલાં છે. તેમના માતા-પિતા 1980ના દાયકામાં જયપુરથી અમેરિકા સ્થાયી થયા હતા. પ્રથમ પેઢીનાં ભારતીય-અમેરિકન પિયા ભારતીય સંસ્કૃતિ અને પરિવારની પરંપરાઓ સાથે જોડાયેલાં રહ્યાં છે. બાળપણમાં તેઓ ભારત પણ આવતાં હતાં.
28 વર્ષની ઉંમરે બની ગયાં સ્કૂલનાં પ્રિન્સિપાલ
પિયાએ પોતાની કારકિર્દીની શરૂઆત શિક્ષિકા તરીકે કરી હતી. તેઓ ન્યૂયોર્કના હાર્લેમમાં હાઇસ્કૂલનાં શિક્ષક અને ત્યારબાદ પ્રિન્સિપાલ રહ્યાં હતાં. ખાસ વાત એ છે કે માત્ર 28 વર્ષની ઉંમરે તેઓ સ્કૂલનાં સ્થાપક પ્રિન્સિપાલ બન્યાં હતાં. તેમણે ઓછી આવક ધરાવતા પરિવારોનાં બાળકોને સારું શિક્ષણ આપીને આર્થિક રીતે આત્મનિર્ભર બનાવવાના હેતુથી શાળામાં કામ કર્યું હતું. તેમના જણાવ્યા અનુસાર, શાળાના 86 ટકા વિદ્યાર્થીઓ ઓછી આવક ધરાવતા પરિવારોમાંથી આવતા હતા. તેમના નેતૃત્વ હેઠળ શાળામાંથી ગ્રેજ્યુએટ થયેલા 100 ટકા વિદ્યાર્થીઓને કોલેજમાં પ્રવેશ મળ્યો હતો.
વ્હાઇટ હાઉસથી એપલ સુધી પહોંચેલી સફર
શિક્ષણ ક્ષેત્રે કામ કર્યા બાદ પિયા ડાંડિયાની પસંદગી વ્હાઇટ હાઉસ ફેલો તરીકે થઈ હતી. અહીં તેમણે ડોમેસ્ટિક પોલિસી કાઉન્સિલ અને અમેરિકાના શિક્ષણ વિભાગ સાથે કામ કર્યું હતું. ત્યારબાદ તેમણે ટેકનોલોજી ક્ષેત્રની જાણીતી કંપની એપલમાં પણ જાહેર ક્ષેત્રના પ્રોજેક્ટ્સનું નેતૃત્વ કર્યું હતું. શિક્ષણ અને આરોગ્ય ક્ષેત્રની વ્યવસ્થાઓને આધુનિક બનાવવા માટે પણ તેમણે કામ કર્યું હતું.
અમેરિકી કોંગ્રેસમાં સંભાળશે નવી જવાબદારી
પિયાના ચૂંટણી પ્રચારમાં શિક્ષણ, જીવનનિર્વાહનો વધતો ખર્ચ અને આર્થિક તકો જેવા મુદ્દાઓ પર વિશેષ ધ્યાન આપવામાં આવ્યું હતું. તેમની જીત ભારતીય-અમેરિકન સમુદાય માટે પણ મહત્ત્વપૂર્ણ માનવામાં આવે છે. તેઓ ફ્લોરિડાનું પ્રતિનિધિત્વ કરનારી પ્રથમ સાઉથ એશિયન અમેરિકન સાંસદ બનશે. જાન્યુઆરી 2027માં નવી કોંગ્રેસનું સત્ર શરૂ થશે ત્યારે તેઓ અમેરિકાના પ્રતિનિધિ ગૃહમાં પોતાની જવાબદારી સંભાળશે. જયપુરથી અમેરિકા ગયેલા પરિવારની દીકરીની આ રાજકીય સફળતા ભારતીય મૂળના લોકો માટે ગૌરવની ક્ષણ બની છે.
આ પણ વાંચો : US Police News : મેયરે કરી એવી જાસૂસી કે આખી પોલીસ ફોર્સે આપ્યા રાજીનામા! જાણો અમેરિકાના આ શહેરમાં શું બન્યું