યુએસ નેવીને મોટો ઝટકો: 30 મિનિટના અંતરે હેલિકોપ્ટર અને ₹60 મિલિયનનું ફાઇટર જેટ ક્રેશ

US Fighter Jet Crash : રવિવારે દક્ષિણ ચીન સાગર (South China Sea)માં અમેરિકી નૌકાદળ (US Navy)ના એક હેલિકોપ્ટર અને એક ફાઇટર જેટની (Fighter Jet Crash) અલગ-અલગ દુર્ઘટનાઓ સર્જાઈ હતી. આ ઘટનાઓ નિયમિત ઓપરેશન્સ (Regular Operations) દરમિયાન થઈ હતી. આ અકસ્માતો એવા સમયે થયા જ્યારે અમેરિકી રાષ્ટ્રપતિ ડોનાલ્ડ ટ્રમ્પ (Donald Trump) આસિયાન સમિટ માટે ક્વૉલા લમ્પુરના પ્રવાસે હતા.

અમેરિકી નૌકાદળના પેસિફિક સી યુનિટ (US Navy Pacific Sea Unit)ના જણાવ્યા અનુસાર, પહેલી દુર્ઘટનામાં MH-60R સી હૉક હેલિકોપ્ટર (MH-60R Sea Hawk) સામેલ હતું. આ હેલિકોપ્ટર એરક્રાફ્ટ કેરિયર યુએસએસ નિમિટ્ઝ (USS Nimitz) પરથી સામાન્ય કામગીરી કરતી વખતે દક્ષિણ ચીન સાગરમાં ક્રેશ થયું હતું. નૌકાદળના નિવેદનમાં જણાવાયું છે કે, તેમાં સવાર ત્રણેય ક્રૂ સભ્યોને (Crew Members Rescued) શોધ અને બચાવ દળ દ્વારા સુરક્ષિત રીતે બચાવી લેવામાં આવ્યા હતા.

પ્રથમ દુર્ઘટનાના લગભગ 30 મિનિટ પછી, એક બોઇંગ F/A-18F સુપર હૉર્નેટ ફાઇટર જેટ (F/A-18F Super Hornet) પણ આ જ એરક્રાફ્ટ કેરિયરમાંથી નિયમિત ઓપરેશન દરમિયાન દક્ષિણ ચીન સાગરમાં દુર્ઘટનાગ્રસ્ત થયું હતું. અમેરિકી નૌકાદળે પુષ્ટિ કરી કે તેમાં સવાર બંને ક્રૂ સભ્યો સફળતાપૂર્વક ઇજેક્ટ (Ejected Safely) થઈ ગયા હતા અને તેમને પણ સુરક્ષિત રીતે બચાવી લેવાયા છે.

અમેરિકી નૌકાદળે રવિવારની સાંજે સોશિયલ મીડિયા પર માહિતી આપી હતી કે MH-60R સી હૉક હેલિકોપ્ટર, જે હેલિકોપ્ટર મેરીટાઇમ સ્ટ્રાઇક સ્ક્વોડ્રન (HSM) 73ના "બેટલ કેટ્સ" સાથે સંકળાયેલું હતું, તે સ્થાનિક સમય અનુસાર બપોરે 2:45 વાગ્યે ક્રેશ થયું. જ્યારે બીજું F/A-18F સુપર હૉર્નેટ (સ્ટ્રાઇક ફાઇટર સ્ક્વોડ્રન 22ના "ફાઇટિંગ રેડકૉક" સાથે સંકળાયેલું) બરાબર 3:15 વાગ્યે પડ્યું. નૌકાદળે જણાવ્યું છે કે, "સામિલ તમામ કર્મચારીઓ સુરક્ષિત અને સ્થિર સ્થિતિમાં છે." હાલમાં બંને ઘટનાઓના કારણોની તપાસ ચાલુ છે.

આ ઘટનાઓ અમેરિકાના એશિયા પ્રવાસ દરમિયાન થઈ છે, જ્યાં ડોનાલ્ડ ટ્રમ્પ વેપાર મુદ્દે ચર્ચા માટે ચીનના રાષ્ટ્રપતિ શી જિનપિંગને (Xi Jinping) મળવાના હતા. આ વર્ષની શરૂઆતમાં પણ લાલ સાગરમાં બે સુપર હૉર્નેટ જેટ ક્રેશ થયા હતા. CNN ના અહેવાલ મુજબ, USS નિમિટ્ઝ દુનિયાના સૌથી મોટા એરક્રાફ્ટ કેરિયર્સમાંનું એક છે, જે અમેરિકી નૌકાદળનું સૌથી જૂનું છે અને આવતા વર્ષે તેને નિવૃત્ત કરવાનું છે. આ સતત દુર્ઘટનાઓએ અમેરિકી નૌકાદળના સુરક્ષા પ્રોટોકોલ અને સાધનોની જાળવણી પર ગંભીર સવાલો ઊભા કર્યા છે.