• ટેરિફ વધારા સાથે Trump ની હજુ પણ ચીમકી!
• હજુ તમે ઘણા બધા ગૌણ પ્રતિબંધો જોશોઃ ટ્રમ્પ
• ડોનાલ્ડ ટ્રમ્પે કહ્યું હજુ તો તમે ઘણું બધું જોશો
• 'મિત્ર' Trump ટેરિફના મામલે છેલ્લી કક્ષાએ ઉતર્યાં!
• ડોનાલ્ડ ટ્રમ્પે ભારત પર 50 ટકા ટેરિફની કરી જાહેરાત
• 25 ટકા ટેરિફ પર વધુ 25 ટેરિફની જાહેરાત કરી
• ભારત સાથે ટ્રેડ ડિલ પૂર્વે ટ્રમ્પની લુખ્ખી દાદાગીરી
• રશિયા પાસેથી ક્રૂડ ઓઈલ ખરીદવા મુદ્દે ટ્રમ્પને વાંધો
• ભારતે આંકડા દેખાડી વિરોધ કર્યો તો 50 ટકા ટેરિફ!
• વિશ્વના અનેક દેશો કરતાં વધારે ટેરિફ ભારત પર!

Donald Trump's tariff Bomb : અમેરિકાના રાષ્ટ્રપતિ ડોનાલ્ડ ટ્રમ્પે ભારત પર આર્થિક દબાણ વધારવા માટે ફરી ટેરિફ લાદવાની નીતિ અપનાવી છે. બુધવારે, ટ્રમ્પ (Donald Trump) એ રશિયા સાથેના વેપાર અને ખાસ કરીને ક્રૂડ ઓઇલની ખરીદીને લઈને ભારત પર વધારાના 25 ટકા ટેરિફની જાહેરાત કરી. આ નવા ટેરિફ સાથે, ભારતીય ઉત્પાદનો પર અમેરિકામાં લાગુ થતો કુલ ટેરિફ હવે 50 ટકા સુધી પહોંચી ગયો છે.

કયા સેક્ટર પર પડશે અસર

ભારત છેલ્લા ઘણા વર્ષોથી અમેરિકાના રાષ્ટ્રપતિ ડોનાલ્ડ ટ્રમ્પ (Donald Trump) ને પોતાના ખાસ મિત્ર તરીકે સમજે છે. ત્યારે જે એક મિત્ર જોડે આશા હોય તેનાથી વિપરિત આજે ટ્રમ્પના નિર્ણયો જોવા મળી રહ્યા છે. ગત અઠવાડિયે ટ્રમ્પે ભારત પર 25 ટકા ટેરિફની જાહેરાત કરી જે ચોંકાવનારું હતું પરંતુ તે પછી ગઇકાલે બુધવાર (6 ઓગસ્ટ) એ તેમણે ભારત પર વધારાના 25 ટકા ટેરિફની જાહેરાત કરી, જે હવે કુલ 50 ટકા સુધી પહોચ્યો છે, જે પછી સૌ કોઇ ચોંકી ગયા છે. આ પગલાંથી ભારતના કાપડ, ચામડા, અને દરિયાઈ ઉત્પાદનો જેવા નિકાસ ક્ષેત્રોને નોંધપાત્ર નુકસાન થવાની શક્યતા છે. ટ્રમ્પે આ ઉપરાંત ભારત પર ગૌણ પ્રતિબંધો લાદવાની પણ ધમકી આપી છે, જે આર્થિક સંબંધોને વધુ જટિલ બનાવી શકે છે.

ટેરિફની શરૂઆત અને ભારતનો વિરોધ

ગયા અઠવાડિયે ટ્રમ્પે ભારત પર 25 ટકા ટેરિફ લાદવાની જાહેરાત કરી હતી, જેનું મુખ્ય કારણ રશિયા સાથે ભારતનો ચાલુ વેપાર હતો. આ પછી, બુધવારે વધારાના 25 ટકા ટેરિફનો એક્ઝિક્યુટિવ ઓર્ડર જારી કરવામાં આવ્યો, જેનાથી ભારતીય માલ પર કુલ ટેરિફ 50 ટકા થઈ ગયો છે. આ નિર્ણયની ભારતે સખત ટીકા કરી છે અને તેને "અન્યાયી અને ગેરવાજબી" ગણાવ્યો છે. ભારતના વિદેશ મંત્રાલયે એક નિવેદનમાં જણાવ્યું કે આવા પગલાં દ્વિપક્ષીય વેપાર સંબંધોને નુકસાન પહોંચાડે છે અને ભારત પોતાના રાષ્ટ્રીય હિતોનું રક્ષણ કરવા માટે તમામ જરૂરી પગલાં લેશે.

રશિયા સાથેના વેપાર પર Trump નો આક્ષેપ

ટ્રમ્પનું આ પગલું ખાસ કરીને રશિયા પાસેથી ભારતની ક્રૂડ ઓઇલ અને લશ્કરી સાધનોની ખરીદીને લઈને છે. ટ્રમ્પે રશિયા સાથેના આવા વેપારને "અસ્વીકાર્ય" ગણાવ્યો છે અને ભારતને આ માટે દંડિત કરવાની નીતિ અપનાવી છે. ભારતે આ નિર્ણય સામે આંકડાઓનો ઉપયોગ કરીને પોતાનો વિરોધ નોંધાવ્યો હતો, પરંતુ ટ્રમ્પે તેની અવગણના કરીને ટેરિફમાં વધારો કર્યો. ટ્રમ્પનું કહેવું છે કે ભારત રશિયા સાથેના વેપારને ચાલુ રાખે તો તેને વધુ આર્થિક પ્રતિબંધોનો સામનો કરવો પડશે.

ગૌણ પ્રતિબંધોની ધમકી

ટ્રમ્પે સ્પષ્ટ કર્યું છે કે 50 ટકા ટેરિફ એ તેમની નીતિનો અંત નથી. તેમણે કહ્યું, "તમે હજુ ઘણા ગૌણ પ્રતિબંધો જોશો," જેનો અર્થ એ છે કે રશિયા સાથે વેપાર કરવાને કારણે ભારત પર વધુ આર્થિક પ્રતિબંધો લાદવામાં આવી શકે છે. ગૌણ પ્રતિબંધો એવા દેશો પર લાદવામાં આવે છે જે પ્રાથમિક પ્રતિબંધો લાદવામાં આવેલા દેશો (જેમ કે રશિયા) સાથે વેપાર ચાલુ રાખે છે. આ પ્રકારના પ્રતિબંધો ભારતની અર્થવ્યવસ્થા, ખાસ કરીને નિકાસ-આધારિત ઉદ્યોગો માટે ગંભીર પડકારો ઉભા કરી શકે છે.

ટેરિફનો અમલ અને અસર

જાહેર કરાયેલા એક્ઝિક્યુટિવ ઓર્ડરમાં સ્પષ્ટ કરવામાં આવ્યું છે કે આ ટેરિફ અન્ય કોઈપણ ફી, કર, અથવા ચાર્જ ઉપરાંત લાગુ થશે. પ્રારંભિક 25 ટકા ટેરિફ 7 ઓગસ્ટ, 2025થી અમલમાં આવશે, જ્યારે વધારાનો 25 ટકા ટેરિફ 21 દિવસ પછી લાગુ થશે. આ ટેરિફની અસર ભારતના નિકાસ ઉદ્યોગો, જેમ કે કાપડ, દરિયાઈ ઉત્પાદનો, અને ચામડાના ઉત્પાદનો પર થશે, જે અમેરિકન બજાર પર નિર્ભર છે. આ ઉપરાંત, આ નિર્ણયથી ભારત-અમેરિકા વચ્ચેના વેપાર સંબંધોમાં તણાવ વધવાની શક્યતા છે.

ભારતનું સ્ટેન્ડ અને ભાવિ રણનીતિ

ભારતે ટ્રમ્પના આ નિર્ણયો બાદ સ્પષ્ટ કર્યું છે કે તે પોતાના રાષ્ટ્રીય હિતોનું રક્ષણ કરવા માટે પ્રતિબદ્ધ છે. વિદેશ મંત્રાલયે જણાવ્યું કે ટ્રમ્પની ટેરિફ નીતિ દ્વિપક્ષીય સંબંધોને નુકસાન પહોંચાડનારી છે અને ભારત આનો સખત વિરોધ કરશે. ભારત આંતરરાષ્ટ્રીય મંચો પર આ મુદ્દો ઉઠાવવાની અને આર્થિક નુકસાનને ઘટાડવા માટે વૈકલ્પિક બજારો શોધવાની રણનીતિ અપનાવી શકે છે.

આ પણ વાંચો :   Trump don't know : ભારતે અમેરિકાને અરિસો બતાવ્યો! અમને કહો છો... પોતે બંધ કરો...