આઇપીએલ ટ્રાન્સફર વિન્ડોમાં હાર્દિક પંડ્યાને લઈને ભારે સસ્પેન્સ
આઇપીએલ 2027 ની હરાજી અને મેગા ટ્રેડિંગ પ્રક્રિયા શરૂ થાય તે પહેલા જ ભારતીય ટીમના સ્ટાર ઓલરાઉન્ડર હાર્દિક પંડ્યાના ભવિષ્યને લઈને સવાલો ઊભા થયા છે . હાર્દિક પંડ્યા છેલ્લા ત્રણ સીઝનથી મુંબઈ ઇન્ડિયન્સની કમાન સંભાળી રહ્યા છે. પરંતુ તેમની કપ્તાની હેઠળ ફ્રેન્ચાઇઝીનું પ્રદર્શન અત્યંત નિરાશાજનક રહ્યું છે અને ટીમ અનુક્રમે 10મા, ચોથા અને 9મા ક્રમે રહી હતી. 2026 ની આઇપીએલ સમાપ્ત થયા બાદથી જ એવી અટકળો ચાલી રહી છે કે મુંબઈ ફ્રેન્ચાઇઝી હવે હાર્દિકથી અલગ થઈને નવા કપ્તાનની શોધ કરી શકે છે.
ચેન્નાઈ અને કોલકાતા વચ્ચે ખરાખરીનો જંગ
સત્તાવાર અહેવાલ મુજબ, આઇપીએલ ટ્રાન્સફર વિન્ડોમાં હાર્દિકને પોતાના પક્ષમાં કરવા માટે કોઈ એક કે બે નહીં, પરંતુ પૂરી 7 ટીમો વચ્ચે જોરદાર સ્પર્ધા શરૂ થઈ ગઈ છે. બાકીની બચેલી માત્ર બે ફ્રેન્ચાઇઝીઓ જ એવી છે જેઓ હાર્દિકને લેવામાં કોઈ જ રસ દાખવી રહી નથી. હાર્દિકને પોતાની સાથે જોડવાની ઈચ્છા ધરાવતી ટીમોની યાદીમાં ચેન્નાઈ સુપર કિંગ્સ (CSK), કોલકાતા નાઈટ રાઈડર્સ (KKR), રાજસ્થાન રોયલ્સ, પંજાબ કિંગ્સ, ગુજરાત ટાઇટન્સ, દિલ્હી કેપિટલ્સ અને લખનૌ સુપર જાયન્ટ્સ સામેલ છે. આ રોમાંચક રેસમાં ચેન્નાઈ સુપર કિંગ્સ સૌથી આગળ હોવાનું મનાય છે, જેમને ડિફેન્ડિંગ ચેમ્પિયન કોલકાતા નાઈટ રાઈડર્સ તરફથી કડી ટક્કર મળી રહી છે. મહેન્દ્ર સિંહ ધોનીની સીએસકે જો હાર્દિકને ટીમમાં લાવવામાં સફળ રહેશે, તો આ આઇપીએલ ઇતિહાસનો સૌથી મોટો ટ્રેડ સાબિત થશે.
બે ટીમોએ હાર્દિકમાં ન દાખવી દિલચસ્પી, ઋષભ પંતની દિલ્હીમાં વાપસી
બીજી તરફ, જે બે ફ્રેન્ચાઇઝીઓએ હાર્દિક પંડ્યાને ટ્રેડ કરવામાં બિલકુલ રસ નથી દાખવ્યો તેમાં રોયલ ચેલેન્જર્સ બેંગલુરુ (RCB) અને સનરાઇઝર્સ હૈદરાબાદ (SRH) નો સમાવેશ થાય છે. આ બંને ટીમો પોતાના વર્તમાન કોર ગ્રુપ અને કેપ્ટન સાથે જ આગળ વધવા માંગે છે. હાલમાં આ ટ્રેડ અંગે મુંબઈ ઇન્ડિયન્સ કે હાર્દિક તરફથી કોઈ સત્તાવાર પ્રેસ રિલીઝ જારી કરવામાં આવી નથી, પરંતુ ટૂંક સમયમાં મોટો નિર્ણય લેવાય તેવી પૂરી સંભાવના છે. આ દરમિયાન, આઇપીએલ 2027 પહેલા એક મોટો સત્તાવાર ટ્રેડ પૂર્ણ થઈ ચૂક્યો છે, જેમાં સ્ટાર વિકેટકીપર બેટ્સમેન ઋષભ પંત મોટા ટ્રેડિંગ સોદાના ભાગરૂપે પોતાની જૂની ફ્રેન્ચાઇઝી દિલ્હી કેપિટલ્સનો ફરી એકવાર હિસ્સો બની ગયા છે. પંતની વાપસી બાદ હવે હાર્દિક પંડ્યા પણ મુંબઈનો સાથ છોડીને નવો ઇતિહાસ રચે છે કે નહીં તે જોવું રસપ્રદ રહેશે.
મુંબઈ ઇન્ડિયન્સથી શરૂ થયેલી સફર
હાર્દિક પંડ્યા અને મુંબઈ ઇન્ડિયન્સનો સંબંધ ઘણો જૂનો અને ભાવનાત્મક છે. તેમણે વર્ષ 2015 માં મુંબઈ ઇન્ડિયન્સ સાથે જ પોતાના આઇપીએલ કરિયરની શરૂઆત કરી હતી અને 2021 સુધી તે આ ટીમનો મુખ્ય હિસ્સો રહ્યા હતા. ત્યારબાદ 2022 માં તેઓ નવી ટીમ ગુજરાત ટાઇટન્સના કેપ્ટન બન્યા અને પ્રથમ સીઝનમાં જ ટીમને ચેમ્પિયન બનાવી પોતાની ક્ષમતા સાબિત કરી હતી. પરંતુ માત્ર બે સીઝન બાદ, 2024 માં તેઓ આશ્ચર્યજનક રીતે મુંબઈમાં પાછા ફર્યા અને પાંચ આઇપીએલ ટ્રોફી જીતાડનાર સફળ કેપ્ટન રોહિત શર્માની જગ્યાએ કપ્તાન બન્યા, જેનો ચાહકો દ્વારા ભારે વિરોધ પણ થયો હતો.
હાર્દિક પંડ્યાનો સમગ્ર આઇપીએલ ટ્રેક રેકોર્ડ
જો હાર્દિક પંડ્યાના ઓવરઓલ આઇપીએલ કરિયર પર નજર કરીએ, તો તેમણે અત્યાર સુધીમાં 162 મેચ રમી છે. આ મેચોની 150 ઇનિંગ્સમાં બેટિંગ કરતા તેમણે 2955 રન બનાવ્યા છે, જેમાં 10 અર્ધસદી સામેલ છે. આ ઉપરાંત, 116 ઇનિંગ્સમાં શાનદાર બોલિંગ પ્રદર્શન કરીને હાર્દિકે 82 વિકેટ પણ પોતાના નામે કરી છે. તે એક સાચા મેચ-વિનર ઓલરાઉન્ડર છે, તેથી જ તમામ ટીમો તેમના પર કરોડોનો દાવ લગાવવા તૈયાર છે.
આ પણ વાંચો : T20I Batting Rankings : ICC રેન્કિંગમાં મોટો ઉલટફેર! ઇશાન કિશન બન્યો વિશ્વનો નંબર-1 T20 બેટ્સમેન
