• RCB નો ઐતિહાસિક વિજય!
• 17 વર્ષની રાહ અંતે પૂરી થઈ!
• આખરે “ઈ સાલા કપ નામદે”!
• કોહલીનું સપનું સાકાર થયું
• RCB ચેમ્પિયન બનતાં બેંગલુરુ ઝળહળી ઉઠ્યું
• લાલ રંગમાં રંગાયું બેંગલુરુ
• બેંગલુરુમાં અડધી રાત્રે ઉજવાઇ 'દિવાળી'

Bengaluru IPL Celebration : ઈન્ડિયન પ્રીમિયર લીગ (IPL) 2025ની ફાઇનલમાં રોયલ ચેલેન્જર્સ બેંગલુરુ (RCB)એ પંજાબ કિંગ્સ (PBKS) ને 6 રનથી હરાવીને પોતાનું પ્રથમ IPL ટાઇટલ જીત્યું. 18 વર્ષની લાંબી રાહ, અનેક નિરાશાઓ અને 3 ફાઇનલમાં (2009, 2011, 2016) હારનો સામનો કર્યા બાદ, RCBએ આખરે ચમકતી ટ્રોફી પોતાના નામે કરી. આ સાથે જ ટીમના સમર્થકો પણ ઘણા ખુશ જોવા મળ્યા હતા. RCB ની જીત બાદ રાત્રે બેંગલુરુના રસ્તાઓ લાલ જર્સી પહેરેલા ચાહકોથી ભરાઇ ગયા હતા, અને આકાશ "RCB-RCB" અને "કોહલી-કોહલી"ના નારાઓથી ગૂંજી ઉઠ્યું. આ ઐતિહાસિક જીતે બેંગલુરુના લોકોને પહેલીવાર IPL વિજયની ઉજવણીનો અનુભવ કરાવ્યો, જે અગાઉ ચેન્નાઈ, મુંબઈ, કોલકાતા, હૈદરાબાદ અને જયપુરમાં જોવા મળ્યો હતો.

બેંગલુરુમાં ઉત્સાહનું વાતાવરણ

જીતની ખબર મળતાં જ બેંગલુરુના રસ્તાઓ પર ચાહકોનો ઉત્સાહ ચરમસીમાએ પહોંચી ગયો. લોકો RCBના બેનરો, ધ્વજ અને લાલ જર્સી સાથે બાઇક અને કારમાં રસ્તાઓ પર ઉતરી આવ્યા. શહેરના ચોક-ચોરાહા "ઈ સાલા કપ નામદે"ના નારાઓથી ગુંજવા લાગ્યા. ચાહકો તેમના ચેમ્પિયન ટીમની રાહ જોતા હતા, જેઓ ટૂંક સમયમાં શહેરમાં પરત ફરીને આ ઉજવણીમાં જોડાશે. આગામી થોડા દિવસો સુધી બેંગલુરુ લાલ રંગથી ઝળહળી રહેશે, જે શહેરના ઇતિહાસમાં એક યાદગાર ક્ષણ બની રહેશે. કારણ કે આ ક્ષણની RCB ફેન છેલ્લા 17 વર્ષથી રાહ જોઇને બેઠા હતા.

રાજ્યનું ગૌરવ અને નેતાઓની પ્રતિક્રિયા

કર્ણાટકના નાયબ મુખ્યમંત્રી ડી.કે. શિવકુમારે આ જીત પર ખુશી વ્યક્ત કરતાં ઇન્સ્ટાગ્રામ પર લખ્યું, "RCBએ આ જીત સાથે કર્ણાટકના દરેક વ્યક્તિનું સ્વપ્ન સાકાર કર્યું છે. આ જીત આખી RCB સેના અને કર્ણાટકના લોકો માટે ભાવનાત્મક ક્ષણ છે. અમને અમારી ટીમ પર ગર્વ છે." આ પ્રતિક્રિયાએ દર્શાવ્યું કે આ જીત માત્ર ટીમની નહીં, પરંતુ આખા રાજ્યની હતી, જે લાંબા સમયથી આ પળની રાહ જોતું હતું.

IPLનો ઇતિહાસ અને RCBની સફળતા

IPLની શરૂઆત 2008માં થઈ હતી, અને 2025 સુધીમાં તેની 18 સીઝન પૂર્ણ થઈ ચૂકી છે. આ દરમિયાન મુંબઈ ઇન્ડિયન્સ (MI) અને ચેન્નાઈ સુપર કિંગ્સ (CSK)એ સૌથી વધુ 5-5 વખત ટાઇટલ જીત્યું છે. કોલકાતા નાઈટ રાઇડર્સ (KKR)એ 2012, 2014 અને 2024માં 3 વખત ખિતાબ જીત્યો, જ્યારે રાજસ્થાન રોયલ્સ (2008), ડેક્કન ચાર્જર્સ (2009), સનરાઇઝર્સ હૈદરાબાદ (2016), ગુજરાત ટાઇટન્સ (2022) અને હવે RCB (2025)એ પણ ચેમ્પિયનની યાદીમાં પોતાનું નામ નોંધાવ્યું. RCBની આ જીતે ટીમની 18 વર્ષની સફરને યાદગાર બનાવી, જેમાં વિરાટ કોહલીની નેતૃત્વ ક્ષમતા અને ટીમની એકતાએ મહત્વનો ફાળો આપ્યો.

ચાહકોની ભાવનાત્મક જોડાણ

RCBની આ જીત ચાહકો માટે માત્ર એક ટ્રોફી જ નહીં, પરંતુ 18 વર્ષની ભાવનાત્મક સફરનો ઉજવણી હતી. ચાહકોએ વર્ષો સુધી ટીમને ટેકો આપ્યો, અને આ વખતે તેમની આશાઓ પૂર્ણ થઈ. બેંગલુરુના રસ્તાઓ પર ચાહકોનો ઉત્સાહ, ફટાકડા અને નારાઓએ શહેરને ઉજવણીના રંગમાં રંગી દીધું. આ જીતે RCBના ચાહકોના દિલમાં એક ખાસ સ્થાન બનાવ્યું, અને ટીમના ખેલાડીઓ, ખાસ કરીને વિરાટ કોહલી, આ ઉજવણીના કેન્દ્રમાં રહ્યા.

આ પણ વાંચો :   IPL 2025 Final Match : RCB ના આ 3 હીરો બન્યા વિજયના સુત્રધાર, એક છે ટીમનો કરોડરજ્જુ